ខេត្តកំពង់ឆ្នាំង៖ អ្នកសារព័ត៌មាន ចំនួន ៣នាក់ និងអ្នកបើកបររថយន្តម្នាក់ ត្រូវបានសមត្ថកិច្ច ចាប់កាលពីថ្ងៃទី២១ ខែមេសា ឆ្នាំ២០០៧ ដោយចោទប្រកាន់ពីបទរំលោភលំនៅឋាន និងជ្រៀតជ្រែកដោយខុសច្បាប់ ក្នុងការបំពេញមុខងារជាសាធារណៈ។ ប៉ុន្តែនៅរសៀលថ្ងៃទី២២ ខែមេសា ឆ្នាំ២០២២ នេះ ត្រូវបានប៉ូលិស អនុញ្ញាតឲ្យត្រឡប់ទៅផ្ទះវិញហើយ បន្ទាប់ពីមានការសម្របសម្រួល និងធ្វើលិខិតសុំទោសចំពោះមុខដើមបណ្តឹង។
លោក អៀរ ប៊ុនធឿន ស្នងការរង និងជាអ្នកនាំពាក្យនៃស្នងការដ្ឋាននគរបាល ខេត្តកំពង់ឆ្នាំង បានឲ្យដឹងថា ដោយមានការសម្របសម្រួលពីព្រះរាជអាជ្ញានៃសាលាដំបូងខេត្ត លោកឧត្តមសេនីយ៍ទោស្នងការនគរបាលខេត្ត និងអង្គការសមាគមអ្នកសារព័ត៌មានផងនោះ អ្នកកាសែតទាំង ៣នាក់ ព្រមទាំងអ្នកបើកបររថយន្ត ត្រូវបានដោះលែងឲ្យត្រឡប់ទៅផ្ទះវិញហើយ បន្ទាប់ពីអ្នកទាំង ៤នាក់ បានធ្វើលិខិតសុំទោសចំពោះដើមបណ្តឹង។
គួររំលឹកដែរថា អ្នកកាសែតទាំង ៣នាក់ និងអ្នកបើកបររថយន្តម្នាក់ផង ត្រូវបានសមត្ថកិច្ចនគរបាលខេត្តកំពង់ឆ្នាំង ចាប់ខ្លួននៅថ្ងៃទី២១ ខែមេសា ដោយចោទប្រកាន់ ពីបទរំលោភលំនៅឋាន និងជ្រៀតជ្រែកកិច្ចការសាធារណៈ បន្ទាប់ពីអ្នកទាំងនោះ បានយកព័ត៌មាន នៅហាងម៉ូតូមួយកន្លែង ជាកម្មសិទ្ធិរបស់លោក លី ង៉ូវ ស្ថិតនៅភូមិឃ្លាំងប្រាក់ សង្កាត់ប្អេរ ក្រុងកំពង់ឆ្នាំង ដែលសង្ស័យថា មានការដាក់តាំងលក់ម៉ូតូអត់ពន្ធ។
យ៉ាងណាក៏ដោយ ជុំវិញការចាប់ខ្លួនអ្នកកាសែត ដែលគ្រាន់តែទៅយកព័ត៌មានតាមសេចក្តីរាយការណ៍ថា ហាងម៉ូតូនោះ លក់ម៉ូតូមិនមានពន្ធ បែរជាត្រូវចាប់ខ្លួនទៅវិញនោះ គឺត្រូវមហាជន និងអ្នកមានវិជ្ជាជីវៈសារព័ត៌មាន ដាក់ការសង្ស័យទៅលើសមត្ថកិច្ច ថាតើបានស្រាវជ្រាវករណីសង្ស័យថា មានម៉ូតូអត់ពន្ធដែរ ឬទេ? ហើយបើគ្រាន់តែទៅយកព័ត៌មាននៅកន្លែងលក់ម៉ូតូ ក៏ត្រូវចាប់ខ្លួនដែរនោះ តើសេរីភាពសារព័ត៌មាន នៅឯណា?
បើសិនជាហាងលក់ម៉ូតូនោះ ស្អាតស្អំ មិនមានលក់ម៉ូតូអត់ពន្ធ ក៏មិនមានបញ្ហាអ្វី រហូតដល់ទៅប្តឹងប៉ូលិស ឱ្យចាប់អ្នកកាសែត ដែលគ្រាន់តែទៅស្វែងរកព័ត៌មានពិត នៅហាងលក់ម៉ូតូ ដែលត្រូវគេសង្ស័យនោះដែរ។ បើគ្រាន់តែទៅហាងលក់ម៉ូតូនោះ ក្លាយជាបទល្មើសរំលោភលំនៅដ្ឋាន ដូច្នេះអ្នកទៅរកទិញម៉ូតូ នៅហាងម៉ូតូ លី ង៉ូវ គួរតែប្រយ័ត្នផង។ ប្រយ័ត្នម្ចាស់ហាង ប្តឹងប៉ូលិសឱ្យចាប់ដូចករណីអ្នកកាសែត និងអ្នកបើកបរឡានទាំងនេះ៕ ពៅ សុខហ៊ាន
ចែករំលែកព័តមាននេះ