ខេត្តកំពង់ឆ្នាំង ៖ ក្រុមកម្មករអ្នកបោសសំរាមតាមសួនច្បារសាធារណៈបានត្អូញត្អែថា «ក្រុមអ្នកលក់តាមរទេះចល័តតាមសួនច្បារ ធ្វើឲ្យបាត់បង់សណ្ដាប់ធ្នាប់ និងចោលសំរាមពាសវាលពាសកាល ព្រមទាំងខ្លះទៀតបានលើកធុងសំរាម ដែលគេដាក់តាមគោលដៅក្នុងសួន យកទៅរទេះរបស់ខ្លួនទៀតផង ហេតុនេះ…
ខេត្តកំពង់ឆ្នាំង ៖ ក្រុមកម្មករអ្នកបោសសំរាមតាមសួនច្បារសាធារណៈបានត្អូញត្អែថា «ក្រុមអ្នកលក់តាមរទេះចល័តតាមសួនច្បារ ធ្វើឲ្យបាត់បង់សណ្ដាប់ធ្នាប់ និងចោលសំរាមពាសវាលពាសកាល ព្រមទាំងខ្លះទៀតបានលើកធុងសំរាម ដែលគេដាក់តាមគោលដៅក្នុងសួន យកទៅរទេះរបស់ខ្លួនទៀតផង ហេតុនេះ ពួកគាត់ជាអ្នកបោសសំរាមសំណូមពរឱ្យអ្នកលក់ចល័តតាមរទេះបញ្ឈប់សកម្មភាពបែបនេះ និងស្នើដល់អាជ្ញាធរ មេត្តាជួយមានវិធានការផង។
ស្ត្រីអ្នកប្រមូលសំរាមនៅសួនច្បារវិមានឯករាជ ឈ្មោះ លី ដា បានលើកឡើងថា ក្រុមអ្នកលក់រទះចល័តបានធ្វើឲ្យបាត់បង់សណ្តាប់ធ្នាប់ និងធ្វើឲ្យប៉ះពាល់ដល់សួនច្បារសាធារណៈដូចជា ខ្លះបានយកធុងសំរាម ដែលគេដាក់មានកន្លែងត្រឹមត្រូវយកទៅតាមរទេះរបស់ខ្លួន ហើយពេលទៅលក់នៅទីណាដាក់ធុងសំរាមនៅទីនោះ សម្រាប់បោះសំរាមចូល ប៉ុន្តែពេលលក់ហើយទុកធុងសំរាមចោលនៅទីនោះ មិនយកមកដាក់នៅកន្លែងដើមឡើយ ។
ដោយឡែក ខ្លះទៀតយកទឹកបបរ ទឹកគុយទាវក្តៅៗ ចាក់ចូលក្នុងធុងសំរាមដែលធុងសំរាម គឺសម្រាប់តែដាក់សំរាមប៉ុណ្ណោះ ពេលចាក់ទឹកបបរទឹកក្តៅចូលទៅក្នុងធុងសំរាម ប៉ះចំធុងសំរាមខ្លះបែក ហូរទៅក្រោម បណ្ដាលឱ្យងាប់ស្មៅក្នុងសួនទៀតផង ។ ខ្លះទៀតយកទីតាំងតាមផ្លូវធ្វើអាជីវកម្មលក់ជាប្រចាំ ដូចជានៅកាច់ជ្រុងរបងមន្ទីរពេទ្យជាដើម ដែលធ្វើឱ្យទីនោះក្លាយទៅជាខ្មៅកក្វក់ដោយក្អែល ដោយការដាក់តាំងលក់យ៉ាងអនាធិបតេយ្យ ។ ក្នុងនាម គាត់ជាអ្នកប្រមូលសំរាម តាមសួនច្បារសូមសំណូមពរដល់ក្រុមអ្នកលក់តាមរទេះ សូមកុំលើកធុងសំរាមចេញពីកន្លែងដែលគេដាក់ ,សុមកុំចាក់ទឹកទឹកចូលទៅក្នុងធុងសំរាម និងសូមជួយសម្អាតអនាម័យទាំងអស់គ្នាទើបមានបរិស្ថានល្អ ទីក្រុងស្អាត។
ទាក់ទងបញ្ហានេះ លោក យិន សាវ៉េន អភិបាលក្រុងកំពង់ឆ្នាំងបានឱ្យដឹងថា កន្លងមកយើងមានវិធានការចំពោះអ្នកលក់អាណាធិបតេយ្យនោះហើយ ប៉ុន្តែពេលខ្លះដូចវែកចក ដេញពីមុខ លួចរត់មកលក់នៅខាងក្រោយ ។ មិនត្រឹមតែប៉ុណ្ណឹងពេលខ្លះ អ្នកលក់ទាំងនោះមើលងាយអ្នកបោះសំរាម ទៀតផងហើយពេលខ្លះលួចទាំងធុង សំរាមយកទៅបាត់ក៏មានដែរ។ លោកបានបញ្ជាក់ថា ខាងក្រសួងគេមិនឱ្យមានការផាកពិន័យ គឺត្រឹមតែអប់រំប៉ុណ្ណោះ ប្រសិនបើមានច្បាប់ផាកពិន័យលោកនឹងចាប់ផាកពិន័យអ្នកទាំងអស់នោះជាពុំខានឡើយ ៕
ចែករំលែកព័តមាននេះ