ខេត្តកំពង់ឆ្នាំង ៖ អ្នកកាសែតចំនួន៣នាក់និងអ្នកបើកបររថយន្តម្នាក់ផងដែរ ត្រូវបានសមត្ថកិច្ចនគរបាលខេត្តកំពង់ឆ្នាំង ធ្វើការឃាត់ខ្លួនពីបទរំ.លោ.ភលំនៅឋាន និងជ្រៀតជ្រែកមុខងារសាធារណៈ ។ ហេតុការណ៍នេះបានកើតឡើងនៅរសៀលថ្ងៃទី២១ ខែមេសា ស្ថិតនៅចំណុចហាងលក់ម៉ូតូមួយកន្លែង ក្នុងភូមិឃ្លាំងប្រាក់ សង្កាត់ប្អេរ ក្រុងកំពង់ឆ្នាំង។
អ្នកនាំពាក្យនៃស្នងការដ្ឋាននគរបាលខេត្តកំពង់ឆ្នាំង លោក អៀរ ប៊ុនធឿន ស្នងការរង បានឲ្យដឹងថា ជនសង្ស័យទាំង៤នាក់ ក្នុងនោះ៣នាក់ ជាអ្នកសារព័ត៌មាន និងម្នាក់ជាអ្នកបើកបររថយន្ត ១-ឈ្មោះ សាយ រស្មី ភេទប្រុស អាយុ៣១ឆ្នាំ មានទីលំនៅភូមិកណ្ដាល ឃុំបន្ទាយដែក ស្រុកកៀនស្វាយ ខេត្តកណ្ដាល អ្នកយកព័ត៌មានរស្មីស្ទឹងត្រង់។ ២-ឈ្មោះ ទួន ឈុនលី ភេទប្រុស អាយុ៥២ឆ្នាំ មានទីលំនៅជាមួយគ្នា អ្នកយកព័ត៌មានរស្មីស្ទឹងត្រង់ ។ ៣-ឈ្មោះ មិន ធី ភេទប្រុស អាយុ៤៣ឆ្នាំ មានទីលំនៅភូមិកណ្ដាលលើ ឃុំបន្ទាយដែក ស្រុកកៀនស្វាយ ខេត្តកណ្ដាល អ្នកយកព័ត៌មានរស្មីស្ទឹងត្រង់ និង៤-ឈ្មោះ ប៊ុត ចន្ថាភេទប្រុស អាយុ៦៥ឆ្នាំ មានទីលំនៅភូមិព្រៃមាន់ ឃុំព្រៃពួច ស្រុកអង្គស្នួល ខេត្តកណ្ដាល ជាអ្នកបើកបររថយន្ត។
លោក អៀរ ប៊ុនធឿន បានបញ្ជាក់ថា អ្នកទាំង៤នាក់ ត្រូវបានឃាត់ខ្លួនដោយចោទពីបទរំលោភលំនៅឋាន តាមមាត្រា២៩៩ និងបទជ្រៀតជ្រែកដោយខុសច្បាប់ទៅក្នុងការបំពេញមុខងារជាសាធារណៈតាមមាត្រាទី៩០៦ នៃក្រមព្រហ្មទណ្ឌ។
អ្នកសារព័ត៌មានទាំង៣នាក់ និងអ្នកបើកបរម្នាក់កំពុងឃាត់ខ្លួនជាបណ្ដោះអាសន្ននៅស្នងការដ្ឋាននគរបាលខេត្តកំពង់ឆ្នាំង ដើម្បីសាកសួរយកចម្លើយដើម្បីកសាងសំណុំរឿងបញ្ជូនទៅសាលាដំបូងតាមនីតិវិធីច្បាប់ ៕
ចែករំលែកព័តមាននេះ