ឯកឧត្តម ស៊ុន សុវណ្ណារិទ្ធិ អភិបាលខេត្តកំពង់ឆ្នាំង នៅរសៀលថ្ងៃទី១៤ ខែមេសា ឆ្នាំ២០២២ បានដឹកនាំអភិបាលរងខេត្ត មន្ត្រីរាជការ កងកម្លាំងប្រដាប់អាវុធ សិក្សានុសិស្ស និងប្រជាពលរដ្ឋ ប្រារព្ធពិធីបើកសង្ក្រានឆ្នាំថ្មី ក្រោមអធិបតីភាព
ខេត្តកំពង់ឆ្នាំង ៖ ឯកឧត្តម ស៊ុន សុវណ្ណារិទ្ធិ អភិបាលខេត្តកំពង់ឆ្នាំង នៅរសៀលថ្ងៃទី១៤ ខែមេសា ឆ្នាំ២០២២ បានដឹកនាំអភិបាលរងខេត្ត មន្ត្រីរាជការ កងកម្លាំងប្រដាប់អាវុធ សិក្សានុសិស្ស និងប្រជាពលរដ្ឋ ប្រារព្ធពិធីបើកសង្ក្រានឆ្នាំថ្មី ក្រោមអធិបតីភាព ឯកឧត្តម បណ្ឌិតសភាចារ្យ អ៊ុក រ៉ាប៊ុន រដ្ឋមន្ត្រីក្រសួងអភិវឌ្ឍន៍ជនបទ។ ពិធីនេះប្រព្រឹត្តឡើងនៅសួនច្បារសម្ដេចចៅហ្វាវាំង គង់ សំអុល ស្ថិតនៅក្នុងភូមិធម្មយុត្តិ សង្កាត់ប្អេរ ក្រុងកំពង់ឆ្នាំង ដោយមានប្រជាពលរដ្ឋចូលរួមយ៉ាងច្រើនកុះករ ។
មានប្រសាសន៍នៅក្នុងពិធីកិច្ចបើកសង្ក្រានឆ្នាំថ្មី នាពេលនោះ ឯកឧត្តម បណ្ឌិតសភាចារ្យ អ៊ុក រ៉ាប៊ុន បានមានប្រសាសន៍ថា៖ ឆ្នាំនេះ យើងពិតជាមានភ័ព្វសំណាងខ្លាំងណាស់ ដោយមានឱកាសបានចូលរួមប្រារព្ធពិធីបុណ្យចូលឆ្នាំថ្មី បន្ទាប់ពីប្រជាពលរដ្ឋយើងទូទាំងប្រទេស បានអាក់ខានប្រារព្ធពិធីនេះអស់រយៈពេល២ឆ្នាំរួចមកហើយ ដោយសារតែបញ្ហាកូវីដ១៩ ហើយការដែលបានបើកប្រទេសឡើងវិញ ក៏ដោយសារជំងឺកូវីដបានស្ងប់ស្ងាតដែរ ។ ទាំងអស់នេះគឺដោយសារប្រមុខដឹកនាំ ដែលមានសម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ដែលបានខិតខំស្វះស្វែងរកវ៉ាក់សាំងពីបរទេស មកចាក់ជូនប្រជាពលរដ្ឋ ដែលបានដំណើរការចាប់ពីដូសទី១ រហូតដល់ដូសទី៤ នេះបើគ្មានវ៉ាក់សាំងទេ ជំងឺកូវីដ នឹងកើនឡើង ពេលនោះប្រទេសជាតិក៏មិនអាចបើកដំណើរការឡើងវិញបានដែរ ។
ឯកឧត្តម បណ្ឌិតសភាចារ្យ អ៊ុក រ៉ាប៊ុន ក៏បានកោតសរសើរដល់ថ្នាក់ដឹកនាំ ដែលមានឯកឧត្តម ស៊ុន សុវណ្ណារិទ្ឋ ជាអភិបាលខេត្តកំពង់ឆ្នាំង បានរៀបចំឲ្យមានពិធីសង្ក្រាន្តឆ្នាំថ្មី នៅតាមគោលដៅជាច្រើនកន្លែងក្នុងខេត្ត ដើម្បីញ៉ាំងឲ្យប្រជាពលរដ្ឋបានចូលរួមលេងសប្បាយក្នុងឱកាសបុណ្យចូលឆ្នាំថ្មីប្រពៃណីជាតិខ្មែរយើង បន្ទាប់ពីពួកគាត់បានអាក់ខានមួយរយៈដោយសារវិបត្តិកូវីដ១៩ ។
សូមរំឮកថា ៖ ក្នុងឱកាសបុណ្យចូលឆ្នាំថ្មីប្រពៃណីជាតិខ្មែរ ឆ្នាំខាល ចត្វាស័ក ២៥៦៦នេះដែរ ឯកឧត្តម ស៊ុន សុវណ្ណារិទ្ធិ អភិបាលខេត្តកំពង់ឆ្នាំង បានណែនាំដល់អភិបាលរងខេត្ត ដឹកនាំមន្ត្រីរាជការ កងកម្លាំងប្រដាប់អាវុធ រៀបចំទីតាំងសម្រាប់ឱ្យប្រជាពលរដ្ឋចូលរួមលេង កម្សាន្ត មានជាច្រើនកន្លែងដូចជា ៖ នៅសួនច្បារ សម្ដេចហ្វាវាំង គង់ សំអុល , សួនច្បារវិមានឯករាជ្យ, សួនច្បារដើមពោធិ៍ផ្សារក្រោម ក្នុងក្រុងកំពង់ឆ្នាំង និងនៅទំនប់ឈ្វាំង ក្នុងស្រុករលាប្អៀរ។
ក្រៅពីនោះ ឯកឧត្តម អភិបាលខេត្ត ក៏បានចាត់ឲ្យមានការប្រារព្ធពិធីធ្វើសង្ក្រានឆ្នាំថ្មី នៅតាមតំបន់នានានៅតាមមូលដ្ឋានមួយចំនួន ដែលបានប្រព្រឹត្តឡើងជាបន្តបន្ទាប់ ដូចជា នៅវិទ្យាល័យព្រះបាទសុរាម្រឹត នៅសាលាស្រុកបរិបូណ៌ សាលាស្រុកកំពង់លែង ស្រុកជលគីរី និងតាមបណ្ដាមូលដ្ឋានដទៃទៀត ដែលញ៉ាំងឱ្យពិធីបុណ្យឆ្នាំថ្មីឆ្នាំនេះបានអធឹកអធម្មក្រៃលែង ៕
ចែករំលែកព័តមាននេះ