រាជធានីភ្នំពេញ ៖ រថយន្តបែនដឹកដី១គ្រឿងបានបើកយ៉ាងលឿនវ៉ាជែងយានយន្តជាបន្តបន្ទាប់ក៏ជ្រុលទៅបុកម៉ូតូ១គ្រឿងបណ្ដាលឲ្យស្លា.ប់បុរសម្នាក់ និងរបួសធ្ងន់ម្នាក់ …
រាជធានីភ្នំពេញ ៖ រថយន្តបែនដឹកដី១គ្រឿងបានបើកយ៉ាងលឿនវ៉ាជែងយានយន្តជាបន្តបន្ទាប់ក៏ជ្រុលទៅបុកម៉ូតូ១គ្រឿងបណ្ដាលឲ្យស្លាប់បុរសម្នាក់ និងរបួសធ្ងន់ម្នាក់ ដែលហេតុការណ៍នេះបានកើតឡើងកាលពីវេលាម៉ោង៤និង៣៥នាទីល្ងាច ថ្ងៃទី២៤ ខែកញ្ញា ឆ្នាំ២០១៦ នៅលើកំណាត់ផ្លូវជាតិលេខ៣ ស្ថិតក្នុងភូមិទួលកី សង្កាត់ភ្លើងឆេះរទេះ ខណ្ឌពោធិ៍សែនជ័យ រាជធានីភ្នំពេញ ។
យុវជនរងគ្រោះដែលស្លាប់ឈ្មោះ នឹម ប៊ុនលី អាយុ២៥ឆ្នាំ មុខរបរកម្មករសំណង់ ចំណែកនាងក្រមុំម្នាក់ទៀតដែលរងរបួសធ្ងន់ឈ្មោះ ខាត់ ចាន់រី អាយុ១៨ឆ្នាំ មុខរបរកម្មការិនីរោងចក្រ អ្នកទាំងពីរមានទីលំនៅក្នុងភូមិក្រាំងកណ្ដាល ឃុំស្នំក្រពើ ស្រុកគងពិសី ខេត្តកំពង់ស្ពឺ បច្ចុប្បន្នស្នាក់នៅផ្ទះជួលនៅក្នុងភូមិព្រៃទា សង្កាត់ចោមចៅ ខណ្ឌពោធិ៍សែនជ័យ ។ ដោយឡែករថយន្តបង្កជាប្រភេទរថយន្តបែនដឹកដី និងមិនត្រូវបានគេស្គាល់ម៉ាកនោះឡើយ ព្រោះបានបើករត់គេចបាត់ស្រមោល ។
តាមប្រភពព័ត៌មានបានឲ្យដឹងថា មុនពេលកើតហេតុជនរងគ្រោះទាំងពីរនាក់ជិះម៉ូតូ១គ្រឿង ម៉ាកហុងដាឌ្រីម សេ១២៥ ពណ៌ខ្មៅ ពាក់ស្លាកលេខ ភ្នំពេញ 1SC-2130 ឌុបគ្នាពីជើងទៅត្បូង ទំនងទៅលេងផ្ទះនៅខេត្តកំពង់ស្ពឺ ព្រោះជាល្ងាចថ្ងៃសៅរ៍ និងព្រឹកឡើងថ្ងៃអាទិត្យ ត្រូវជាថ្ងៃសម្រាកពីការងារ លុះពេលទៅដល់ចំណុចកើតហេតុខាងលើស្រាប់តែមានរថយន្តបែនដឹកដី១គ្រឿងមិនស្គាល់ម៉ាកបើកបញ្ច្រាសទិសគ្នាពីត្បូងទៅជើងក្នុងល្បឿនលឿនវ៉ាជែងយានយន្តនៅខាងមុខជាបន្តបន្ទាប់បានបុកម៉ូតូជនរងគ្រោះឲ្យដួលច្រង៉ាប់ច្រង៉ិលបណ្ដាលស្លាប់បងប្រុសភ្លាមៗ រីឯប្អូនស្រីបានរងរបួសធ្ងន់ បន្ទាប់មករថយន្តបង្កបានបើករត់គេចបាត់ដោយសុវត្ថិភាពតែម្ដង ។
ក្រោយពេលកើតហេតុ កម្លាំងនគរបាលបានចុះទៅកាន់កន្លែងកើតហេតុហៅរថយន្តពេទ្យដឹកនារីរងគ្រោះទៅកាន់មន្ទីរពេទ្យដើម្បីសង្គ្រោះបន្ទាន់ ចំណែកសាកសពប្រគល់ជូនក្រុមគ្រួសារនាំយកទៅធ្វើបុណ្យតាមប្រពៃណី ហើយនគរបាលកំពុងធ្វើការស្រាវជ្រាវរករថយន្តបង្កនោះហើយ ៕
ចែករំលែកព័តមាននេះ