ប្រទេសមីយ៉ាន់ម៉ា ៖ ក្រុមមន្ត្រីឧស្សាហកម្មសំណង់ និងអចលនទ្រព្យ បានរំពឹងថា តម្រូវការលំនៅឋាន, ការិយាល័យសម្រាប់ជនបរទេស និងឱកាសវិនិយោគនៅមីយ៉ាន់ម៉ាកំពុងកើនឡើង បន្ទាប់ពីការដាក់ទណ្ឌកម្មរបស់
ប្រទេសមីយ៉ាន់ម៉ា ៖ ក្រុមមន្ត្រីឧស្សាហកម្មសំណង់ និងអចលនទ្រព្យ បានរំពឹងថា តម្រូវការលំនៅឋាន, ការិយាល័យសម្រាប់ជនបរទេស និងឱកាសវិនិយោគនៅមីយ៉ាន់ម៉ាកំពុងកើនឡើង បន្ទាប់ពីការដាក់ទណ្ឌកម្មរបស់អាមេរិកត្រូវបានលើកលែង ប៉ុន្ដែបរិយាកាសនៃគោលនយោបាយមិនមានស្ថិរភាព ដែលអាចជាឧបសគ្គរារាំងដល់ការទាញយកប្រយោជន៍នៃវិស័យទាំងនេះ ។
ចំនួនវិនិយោគិនបរទេស និងពលករនៅទីក្រុងយ៉ាំងហ្គោន បានកើនឡើងគួរឲ្យកត់សម្គាល់ក្នុងរយៈពេលប៉ុន្មានឆ្នាំចុងក្រោយនេះ ដែលបានជំរុញឲ្យមានតម្រូវការការិយាល័យ និងលំនៅឋានកើនឡើង ។
យោងតាមមន្ត្រីជាន់ខ្ពស់ក្នុងវិស័យសំណង់យល់ថា និន្នាការកំពុងបន្ដទៅរកក្ដីសង្ឃឹមពីការបញ្ចប់នៃការដាក់ទណ្ឌកម្មរបស់អាមេរិកដែលនៅសេសសល់មួយចំនួន ដែលរដ្ឋបាលអាមេរិកបានប្រកាសកាលពីសប្ដាហ៍មុន ។
អនុប្រធានសមាគមផ្ដល់សេវាអចលនទ្រព្យមីយ៉ាន់ម៉ា លោក Than Oo បាននិយាយថា ៖ « នៅថ្ងៃអនាគត នឹងមានវិនិយោគិន ពលករបរទេសជាច្រើនចូលមករកស៊ី និងធ្វើការនៅទីនេះ បន្ទាប់ពីបញ្ចប់ការដាក់ទណ្ឌកម្ម ហើយពួកគេពិតជាត្រូវការការិយាល័យ និងលំនៅឋានសម្រាប់ធ្វើការ និងស្នាក់នៅ » ។
មន្ត្រីក្នុងវិស័យនេះរំពឹងថា តម្រូវការអចលនទ្រព្យនឹងកើនឡើង ដែលអាចជួយឲ្យទីផ្សារលំនៅឋានក្នុងប្រទេសមីយ៉ាន់ម៉ាមានសន្ទុះខ្លាំង បន្ទាប់ពីជាប់គាំងអស់រយៈពេល២ឆ្នាំកន្លងមក ។
លោក Khin Shwe អ្នកគាំទ្រសមាគមសហគ្រិនសំណង់មីយ៉ាន់ម៉ា មានក្ដីរំពឹងថា លំហូរនៃជនបរទេស និងអ្នកដំណើរនឹងមានកំណើនខ្ពស់ បន្ទាប់ពីទណ្ឌកម្មនេះត្រូវបានផុតរលត់ ។ លោកថា ៖ « យើងត្រូវការសាងសង់ការិយាល័យ និងលំនៅឋានសម្រាប់វិនិយោគិនបរទេសឲ្យបានច្រើន » ។
ទោះបីយ៉ាងណា បើតាមលោក Than Oo បាននិយាយថា ថ្វីបើតម្រូវការនៃអាផាតមិន និងលំនៅឋានត្រូវបានគេរំពឹងថា នឹងមានកំណើន ប៉ុន្តែកង្វះនៃគោលនយោបាយ និងបទប្បញ្ញត្តិប្រកបដោយស្ថិរភាពនៅក្នុងវិស័យសំណង់ គឺធ្វើឱ្យវិនិយោគិនមានការភ័យខ្លាចមកបណ្ដាក់ទុន។ លោកបន្ថែមថា ៖ « សេដ្ឋកិច្ចក៏មិនទាន់មានស្ថិរភាពផងដែរ ប៉ុន្ដែខ្ញុំគាំទ្រថា វានឹងប្រសើរឡើងបន្ដិចម្ដងៗ » ។
ដោយឡែក អ្នកនាំពាក្យរដ្ឋាភិបាលទីក្រុងយ៉ាំងហ្គោន លោក Ye Min បាននិយាយថា សេចក្ដីព្រាងច្បាប់ស្ដីពីការសាងសង់ នឹងផ្សព្វផ្សាយក្នុងពេលឆាប់ៗនេះ ខណៈដែលរដ្ឋាភិបាលកំពុងដំណើរការដើម្បីបញ្ចប់ច្បាប់ និងបទប្បញ្ញាត្តិថ្មីមួយ ។
កាលពីពេលថ្មីៗនេះ រដ្ឋាភិបាលទីក្រុងយ៉ាំងហ្គោន បានចេញច្បាប់សាងសង់ថ្មីមួយទៅកាន់ក្រុមប្រឹក្សាអភិវឌ្ឍន៍ទីក្រុងយ៉ាំងហ្គោន ដើម្បីធ្វើការពិនិត្យឡើងវិញទៅលើក្ដីបារម្ភមួយចំនួនដូចជា តម្រូវការចំណត ស្ដង់ដាពន្លត់អគ្គិភ័យ និងទំហំចន្លោះពីអគារមកផ្លូវត្រូវដាក់ប្រវែងប៉ុន្មានជាដើម ដើម្បីងាយស្រួលដល់អ្នកអភិវឌ្ឍន៍ចាត់ចែង ៕
ចែករំលែកព័តមាននេះ