ក្រោយការចុះឆែកឆេរផ្ទះមួយ សមត្ថកិច្ចបានឃាត់ខ្លួនម្ចាស់ផ្ទះដែលជាពាណិជ្ជករសន្និធិកែច្នៃ សំណាកសត្វព្រៃកម្រ និងជិតផុតពូជ កាលពីជាង២០ថ្ងៃមុន
រាជធានីភ្នំពេញ ៖ ក្រោយការចុះឆែកឆេរផ្ទះមួយ សមត្ថកិច្ចបានឃាត់ខ្លួនម្ចាស់ផ្ទះដែលជាពាណិជ្ជករសន្និធិកែច្នៃ សំណាកសត្វព្រៃកម្រ និងជិតផុតពូជ កាលពីជាង២០ថ្ងៃមុន ។ លុះមកដល់វេលាម៉ោង៩ព្រឹកថ្ងៃទី៦ ខែមេសា ឆ្នាំ២០២២ កម្លាំងខណ្ឌរដ្ឋបាលព្រៃឈើរាជធានីភ្នំពេញ រួមជាមួយកម្លាំងចម្រុះពាក់ព័ន្ធផ្សេងទៀតដឹកនាំដោយលោក ហម សារាវុធ អនុប្រធានរដ្ឋបាលព្រៃឈើបានចុះទៅអនុវត្តដីកាបង្កកទ្រព្យសម្បត្តិរបស់ឈ្មួញខាងលើនៅចំណុចផ្ទះលេខ៣៨ ផ្លូវលេខ១១B ភូមិកណ្ដាល សង្កាត់រលួសខណ្ឌដង្កោ រាជធានីភ្នំពេញ ។
នៅក្នុងឱកាសនោះក៏មានការចូលរួមដោយមន្ត្រីរដ្ឋបានព្រៃឈើមូលដ្ឋាន កម្លាំងអន្តរាគមន៍បង្ក្រាបសត្វព្រៃចល័ត អង្គការសម្ព័ន្ធមិត្តសត្វព្រៃ អាជ្ញាធរនិងសមត្ថកិច្ច ខណ្ឌដង្កោផងដែរ ។ យោងតាមដីកាបង្កកទ្រព្យសម្បត្តិលេខ៤០ អ ដ ប ទ ចុះថ្ងៃទី១៩ ខែមីនា ឆ្នាំ២០២២ របស់សាលាដំបូងរាជធានីភ្នំពេញ បានបង្គាប់ឲ្យកម្លាំងសមត្ថកិច្ចបង្កកទ្រព្យសម្បត្តិរបស់ឈ្មួញខាងលើរួមមានផ្ទះនិងគណនីធនាគារផងដែរ បន្ទាប់ពីរកឃើញថា ទ្រព្យសម្បត្តិទាំងនេះទទួលផលបានមកពីការធ្វើពាណិជ្ជកម្មសន្និធិកែច្នៃសំណាកសត្វព្រៃក្រុមកម្រនិងជិតផុតពូជដោយគ្មានការអនុញ្ញាត ចាប់ពីចុងឆ្នាំ២០១៩ ដល់ថ្ងៃទី១៦ ខែមីនា ឆ្នាំ២០២២ ។
ក្រោយពីការស្រាវជ្រាវនិងកំណត់បានច្បាស់លាស់ពីទីតាំងបទល្មើស កម្លាំងចម្រុះដឹកនាំដោយខណ្ឌរដ្ឋបាលព្រៃឈើរាជធានីភ្នំពេញឃាត់ខ្លួនឈ្មួញម្នាក់ កាលពីថ្ងៃទី១៥ ខែមីនា ឆ្នាំ២០២២។ ខណៈដែលកម្លាំងខាងលើចុះធ្វើការឆែកឆេរដល់ផ្ទះលេខ៣៨ ផ្លូវលេខ១១B ភូមិកណ្ដាល សង្កាត់រលួស ។ ក្នុងពេលនោះក៏បានរកឃើញព្រមទាំងរឹបអូសយកវត្ថុតាងមួយចំនួនគឺសំណាកសត្វព្រៃកម្រនិងជិតផុតពូជមានដូចជាភ្លុកដំរី ចែកាច់ ជាដើម ។
ប្រភពដដែលបានប្រាប់បន្តទៀតថា ឈ្មួញធ្វើពាណិជ្ជកម្ម សន្និធិ កែច្នៃសំណាកសត្វព្រៃក្នុងក្រុមកម្រនិងជិតផុតពូជនិងជាម្ចាស់ផ្ទះដែលត្រូវសមត្ថកិច្ចឃាត់ខ្លួននោះឈ្មោះ ឡា សេងងួន ភេទប្រុស អាយុ៤២ឆ្នាំ ។ ក្រៅពីនេះនៅមានជនពាក់ព័ន្ធ៣នាក់ទៀតហើយកំពុងតែគេចខ្លួននៅឡើយរួមមាន ៖
១-ម្ចាស់គណនីធនាគារឈ្មោះSok Theara ស្នាក់នៅផ្ទះសិប្បកម្មឈើម្ដុំហ្គ្រែនភ្នំពេញ ជិះរថយន្តម៉ាកហ្វ័ដ piup ស៊េរីឆ្នាំ២០១២ពណ៌ស ពាក់ផ្លាកលេខ0449 ។
២-ម្ចាស់គណនីធនាគារឈ្មោះ លី ហេងហួរ ស្នាក់នៅម្ដុំក្រោយវត្តនិរោធន៍ សង្កាត់និរោធន៍ ខណ្ឌច្បារអំពៅ រាជធានីភ្នំពេញ ។ ជននេះមានតូបលក់ដូរអីវ៉ាន់យីហោម៉ែអាម៉ី តូបលេខ២ នៅផ្សារទួលទំពូងដែលមានស្តុកភ្លុកដំរីសម្រាប់លក់ឲ្យម៉ូយ ។
៣-ម្ចាស់គណនីធនាគារឈ្មោះ សី ហួរ ។
ប្រភពខាងលើបានបញ្ជាក់ថា ដីកាបង្កកទ្រព្យសម្បត្តិរបស់សាលាដំបូងរាជធានីភ្នំពេញនោះ ហាមមិនឲ្យលក់ដូរ ផ្ទេរកម្មសិទ្ធិ ជួលបញ្ចាំ និងធ្វើអំណោយផ្សេងៗ រហូតមានដីកាសម្រេចថ្មីពីសាលាដំបូងរាជធានីភ្នំពេញ ។ មិនតែប៉ុណ្ណោះនៅពេលចុះអនុវត្តដីកានោះ ពុំមានវត្តមានម្ចាស់ផ្ទះឬតំណាងម្ចាស់ផ្ទះចូលរួមឡើយ ដោយផ្ទះត្រូវបានចាក់សោ ។
ដោយឡែកខាងមន្ទីររៀបចំដែនដី នគរូបនីយកម្ម សំណង់និងសុរិយោដីរាជធានីភ្នំពេញ ក៏ពុំបានចូលរួមដែរ ហើយដីកាត្រូវបានអាននៅចំពោះមុខកម្លាំងចម្រុះ បន្ទាប់មកទើបប្រគល់ជូនអាជ្ញាធរមូលដ្ឋាននិងតំណាងបុរីពិភពថ្មីកួរស្រូវ៣ ដើម្បីបិទភ្ជាប់នៅមុខផ្ទះខាងលើ ៕
ចែករំលែកព័តមាននេះ