រទេះដែលកម្មករនៅក្រុងប៉ោយប៉ែត តែងតែអូសចេញចូលដីថៃ ដើម្បីដឹកទំនិញឆ្លងព្រំដែនឲ្យគេតាមច្រកទ្វារអន្តរជាតិប៉ោយប៉ែត ដោះស្រាយជីវភាពគ្រួសារនោះ ពេលនេះហាក់បាត់បង់ម្តងបន្តិចៗ ដោយសារតែ
ខេត្តបន្ទាយមានជ័យ ៖ រទេះដែលកម្មករនៅក្រុងប៉ោយប៉ែត តែងតែអូសចេញចូលដីថៃ ដើម្បីដឹកទំនិញឆ្លងព្រំដែនឲ្យគេតាមច្រកទ្វារអន្តរជាតិប៉ោយប៉ែត ដោះស្រាយជីវភាពគ្រួសារនោះ ពេលនេះហាក់បាត់បង់ម្តងបន្តិចៗ ដោយសារតែចោរលួចក្នុងសម័យកូវីដ។
ហើយទីតាំងរក្សាទុករទេះជាច្រើនកន្លែងតាមភូមិ ជាពិសេសម្តុំផ្សាររ៉ា ស្ថិតក្នុងភូមិក្បាលកោះ និងភូមិប៉ោយប៉ែត ក៏ដូចជាតាមភូមិមួយចំនួននៃឆ្នាំដំបូងក្នុងសម័យកូវីដ ពោលគឺក្រោយថៃបិទព្រំដែននោះ គេឃើញចតចោលតាមទីតាំងគេរក្សាទុកជាច្រើន ខ្លះចាស់ ខ្លះស្មៅដុះគ្របញ៉ុក ប៉ុន្តែមួយរយៈចុងក្រោយនេះ ទីតាំងទាំងនោះមិនឃើញមានរទេះច្រើនទៀតទេ ដោយកន្លែងខ្លះមានត្រឹមតែ២ទៅ៣ ឬ៤គ្រឿងតែប៉ុណ្ណោះ។
បញ្ហានេះ ត្រូវអ្នកស្រុកលើកឡើងថា ការបាត់បង់រទេះពីទីតាំងរក្សាទុក គឺដោយសារកន្លែងខ្លះត្រូវចោរលួចអស់ និងកន្លែងខ្លះទៀតម្ចាស់អះអាងថា ដឹកយកទៅរក្សាទុក ក្រោយពីចោរលួចរទេះពួកគាត់អស់ជាច្រើនគ្រឿង ហើយនៅសេសសល់តិចតួច។
ទីតាំងរក្សាទុករទេះ៣កន្លែង ក្នុងភូមិសាមគ្គីមានជ័យនោះ ត្រូវបានម្ចាស់ប្រាប់ថា រទេះពួកគាត់ខ្លះត្រូវចោរលួចបាត់ និងភាគច្រើនដែលនៅសល់គឺក្រុមចោរលួចដោះយកកង់រទេះទៅបាត់។ដោយឡែកទីតាំងរក្សាទុករទេះដែកធំៗមួយកន្លែង ក្នុងភូមិមិត្តភាព សង្កាត់ប៉ោយប៉ែត ដែលរទេះទាំងនេះ កន្លងមកអាចផ្ទុកទំនិញចេញចូលដីថៃជាច្រើនតោន ក៏ត្រូវចោរលួចអស់ទាំងតួររទេះ ហើយនៅសល់តែរទេះ២គ្រឿងតែប៉ុណ្ណោះ ដែលត្រូវបានម្ចាស់ដឹកយកទៅរក្សាទុក។
ប្រភពថា រទេះដែកធំៗទាំងនេះ គ្រឿងខាងលើគ្រាន់តែភ្លៅរទេះ១ គឺតម្លៃមិនក្រោមពីជិត១០០០ដុល្លារឡើយ។
គួរបញ្ជាក់ថា អំពើចោរកម្មនៅប៉ោយប៉ែត ហាក់កើតមានខ្លាំងនាសម័យកូវីដ ហើយអ្នកស្រុកលើកឡើងថា ការបាត់បង់មិនត្រឹមតែរទេះនោះទេ សូម្បីផ្ទះសម្បែងពលរដ្ឋខ្លះដែលម្ចាស់ចាក់សោទ្វារចោល ហើយរវល់ទៅស្នាក់នៅឯស្រុកកំណើត ក៏ក្រុមចោរលួចគាស់យកអស់ទ្រព្យសម្បត្តិផងដែរ។ ទោះជាយ៉ាងណា ជនសង្ស័យក្នុងអំពើលួចឆក់ខាងលើនេះ កន្លងមកក៏ត្រូវសមត្ថកិច្ចជំនាញពាក់ព័ន្ធវែកមុខចាប់ខ្លួនជាបន្តបន្ទាប់ រួចបញ្ជូនទៅតុលាការផងដែរ៕
ចែករំលែកព័តមាននេះ