ខេត្តកំពង់ធំ ៖ ស្ត្រីជាជនរងគ្រោះម្នាក់ ត្រូវបានសាច់ញាតិដឹកមកកាន់មន្ទីរពេទ្យខេត្តកំពង់ធំ ដើម្បីជួយសង្គ្រោះជីវិតរបស់នាង ក្រោយរងគ្រោះដោយសារពិសពស់ដ៏កំណាចអស់រយៈពេល១១ថ្ងៃមកហើយ ទើបតែបានអាការៈធូរស្រាលបន្តិច តែខាងគ្រូពេទ្យនៅមិនទាន់អនុញ្ញាតឱ្យវិលត្រឡប់ទៅផ្ទះវិញនោះទេ ដោយតម្រូវឱ្យនៅរង់ចាំធ្វើការតាមដានមួយរយៈទៀតសិន ។…
ខេត្តកំពង់ធំ ៖ ស្ត្រីជាជនរងគ្រោះម្នាក់ ត្រូវបានសាច់ញាតិដឹកមកកាន់មន្ទីរពេទ្យខេត្តកំពង់ធំ ដើម្បីជួយសង្គ្រោះជីវិតរបស់នាង ក្រោយរងគ្រោះដោយសារពិសពស់ដ៏កំណាចអស់រយៈពេល១១ថ្ងៃមកហើយ ទើបតែបានអាការៈធូរស្រាលបន្តិច តែខាងគ្រូពេទ្យនៅមិនទាន់អនុញ្ញាតឱ្យវិលត្រឡប់ទៅផ្ទះវិញនោះទេ ដោយតម្រូវឱ្យនៅរង់ចាំធ្វើការតាមដានមួយរយៈទៀតសិន ។
ប្រភពព័ត៌មានពីស្ត្រីរងគ្រោះបានឱ្យដឹងនៅព្រឹកថ្ងៃទី០១ មេសាថា រូបគាត់ឈ្មោះ អាង សុខអេង អាយុ៣៥ឆ្នាំ មានប្តីឈ្មោះ ស៊ឺ សែន អាយុ៣៧ឆ្នាំ មានកូនប្រុសម្នាក់ឈ្មោះ សែន វាស្នា អាយុជាង២ឆ្នាំ និងកូនស្រីបងឈ្មោះ សែន ចន្ធូ អាយុ៦ រស់នៅភូមិទួលគ្រើល ឃុទួលគ្រើល ស្រុកប្រាសាទបល្ល័ង្គ ខេត្តកំពង់ធំ ។ ក្រៅពីមុខរបធ្វើស្រែចំការ គាត់និងប្តី មានដីទំហំជិតមួយហិកតាបានដាក់ដាំស្វាយចន្ទីរ រហូតមកដល់ពេលនេះ ស្វាយចន្ទីរបស់គាត់បានទទួលផលហើយ ។
គាត់បន្តថា នៅមុនពេលកើតហេតុ កាលពីវេលាម៉ោងប្រហែលជា១១ថ្ងៃត្រង់ថ្ងៃទី២០ មីនា ឆ្នាំ២០២២ ខណៈកំពុងតែដើររើសប្រមូលផ្លែស្វាយចន្ទីរជាមួយនិងប្តីដើម្បីយកមកបេះយកគ្រាប់សម្រាប់លក់នោះ នៅពេលដែលនាងស្រវ៉ារើសស្វាយចន្ទីដោយពុំបានចាប់អារម្មណ៍ ស្រាប់តែមានពស់មួយក្បាលហក់មកខាំចំប្រអប់ដៃឆ្វេងរបស់គាត់ ដែលជាហេតុធ្វើភ្ញាក់ក្រញ៉ាងស្រឡាំកាំង ហើយក៏រលាស់ដៃរបូតសត្វពស់នោះរត់បាត់ទៅ ។
បន្ទាប់មក មុខរបួសដោយសារពស់ខាំនោះ បានធ្វើគាត់កើតមានអាការៈឈឺចុកចាប់យ៉ាងខ្លាំង ដៃរបស់នាងឡើងហើមប៉ោងមួយរំពេច ។ គាត់ប្រាប់ទៀតថា មិនបានស្គាល់សត្វពស់ដែលខាំនោះ ជាប្រភេទពស់អ្វីនោះទេ។ គាត់គ្រាន់តែឃើញពស់នោះ មានពណ៌សរពព្លាក់ៗ ក្បាលវាធំតែប៉ុណ្ណោះ ។
ក្រោយត្រូវពស់ខាំ ដោយឈឺចាប់ខ្លាំងពេក ប្តីគាត់ក៏បាននាំមកកាន់មណ្ឌលសុខភាពស្រុក ហើយត្រូវគ្រូពេទ្យបានព្យួរសេរ៉ូមឲ្យ ។ ខាងមណ្ឌលសុខភាពប្រាប់ថា ខាងមណ្ឌលអត់មានថ្នាំបន្សាបជាតិពិសទេ បន្ទាប់មក គាត់ក៏ត្រូវសាច់ញាតិដឹកយកមកកាន់មន្ទីរពេទ្យខេត្តកំពង់ធំបន្ត នៅរសៀលថ្ងៃដដែលនោះ ។
គាត់បន្ថែមទៀតថា ចាប់តាំងពីពស់ខាំត្រូវដៃមក រយៈពេលបួនប្រាំថ្ងៃដំបូង ដៃរបស់នាងហើមប៉ោងធំ ជាំខ្មៅ និងមានពងស្ទើរពាសពេញដៃ រហូតមកដល់ពេលនេះ អស់រយៈពេលជាង១០ថ្ងៃហើយ នៅតែពុំទាន់ជាសះស្បើយ កុំតែបានសាច់ញាតិដឹកមកមន្ទីរពេទ្យខេត្តកំពង់ធំទាន់ពេល កុំអីរូបនាងមិនដឹងទៅជាយ៉ាងណានោះទេ ។
ពាក់ព័ន្ធនឹងបញ្ហាខាងលើនេះ លោកវេជ្ជបណ្ឌិត សេង ម៉េងហ៊ាង ប្រធានមន្ទីរពេទ្យខេត្តកំពង់ធំ ក៏ប្រាប់ដល់បងប្អូនប្រជាពលរដ្ឋដែរ នៅពេលដែលត្រូវសត្វមានពិសទិច ខាំ ឬចឹកនោះ សូមប្រញាប់មកកាន់មន្ទីរពេទ្យជាបន្ទាន់ ដោយមិនត្រូវបង្អែបង្អង់យូរ ឬក៏ទៅរកគ្រូខ្មែរស្តោះផ្លុំនោះឡើយ ព្រោះវាអាចប៉ះពាល់អាយុជីវិតយើងបាន ។
ចែករំលែកព័តមាននេះ