ប្រទេសចិន ៖ ផ្លូវរថភ្លើងល្បឿនលឿនរបស់ប្រទេសចិន ឥឡូវនេះមានប្រវែងជាង២ម៉ឺនគីឡូម៉ែត្រ ជាមួយនឹងការដាក់ឲ្យដំណើរការផ្លូវរថភ្លើងមួយខ្សែកាលពីថ្ងៃសៅរ៍ ដោយតភ្ជាប់តំបន់ Zhengzhou ខេត្ត Henan
ប្រទេសចិន ៖ ផ្លូវរថភ្លើងល្បឿនលឿនរបស់ប្រទេសចិន ឥឡូវនេះមានប្រវែងជាង២ម៉ឺនគីឡូម៉ែត្រ ជាមួយនឹងការដាក់ឲ្យដំណើរការផ្លូវរថភ្លើងមួយខ្សែកាលពីថ្ងៃសៅរ៍ ដោយតភ្ជាប់តំបន់ Zhengzhou ខេត្ត Henan ភាគកណ្តាលប្រទេសចិន ឆ្ពោះទៅតំបន់ Xuzhou ភាគខាងកើតខេត្ត Jiangsu ។
ផ្លូវរថភ្លើងនេះមានស្ថានីយចំនួន៩កន្លែង និងរត់ក្នុងល្បឿន៣០០គីឡូម៉ែត្រក្នុង១ម៉ោង ។ វាតភ្ជាប់ភាគខាងលិច ជាមួយផ្លូវរថភ្លើង២ខ្សែនៃភាគខាងជើង និងខាងត្បូង ដែលអាចជួយកាត់បន្ថយពេលវេលាធ្វើដំណើររវាងភាគខាងលិច និងខាងកើត ។
នៅពេលដែលផ្លូវរថភ្លើងមួយខ្សែទៀតតភ្ជាប់ទីក្រុង Baoji និង Lanzhou ត្រូវបានដាក់ឲ្យដំណើរការនោះ រថភ្លើងល្បឿនលឿននឹងរត់ត្រង់ពី Xuzhou ទៅ Urumqi នៅភាគខាងលិចដ៏ឆ្ងាយរបស់ប្រទេសនេះ ។
លោក Huang Xin មកពីក្រុមហ៊ុនផ្លូវរថភ្លើង បាននិយាយ ផ្លូវរថភ្លើងប្រវែង១ម៉ឺនគីឡូម៉ែត្រដំបូងបានចំណាយពេលសាងសង់អស់រយៈពេល១១ឆ្នាំ ។ វាបានកើនឡើងទ្វេដងនៅក្នុងរយៈពេលត្រឹមតែ៣ឆ្នាំ ហើយត្រូវបានគេរំពឹងថា នឹងកើនទ្វេដងជាថ្មីទៀតក្នុងឆ្នាំ២០២៥ និងកើនដល់៤៥.០០០គីឡូម៉ែត្រក្នុងឆ្នាំ២០៣០ ។
នៅឆ្នាំ២០១៥ រថភ្លើងល្បឿនលឿនរបស់ប្រទេសចិនបានដឹកជញ្ជូនអ្នកដំណើរចំនួន៩៦១លាននាក់ ពោលគឺកើនឡើង២៣៧% បើធៀបនឹងឆ្នាំ២០១១ ។
ដោយសាររថភ្លើងល្បឿនលឿននេះ ប្រជា ជននៅទីក្រុងប៉េកាំង និងសៀងហៃ បានចាប់ផ្តើមទិញផ្ទះនៅក្បែទីក្រុង និងធ្វើដំណើរទៅមក ។ លោក Li Miao រស់នៅក្នុងតំបន់ Langfang ខេត្ត Hebei ដែលមានចម្ងាយ៥៥គីឡូម៉ែត្រពីទីក្រុងប៉េកាំង និងធ្វើការនៅក្នុងទីក្រុង លោកបានចំណាយពេលត្រឹមតែ២១នាទីប៉ុណ្ណោះសម្រាប់ធ្វើដំណើរទៅទីក្រុងប៉េកាំង ។
នៅពាក់កណ្តាលខែកក្កដា រថភ្លើង២ខ្សែបានធ្វើដំណើរនៅក្នុងល្បឿន៤២០គីឡូម៉ែត្រក្នុង១ម៉ោង ក្នុងទិសដៅផ្ទុយគ្នា ។ នៅក្នុងរយៈពេលប៉ុន្មានឆ្នាំខាងមុខទៀត នឹងមានរថភ្លើងរត់ក្នុងល្បឿនជាង៥០០គីឡូម៉ែត្រក្នុង១ម៉ោង ចាប់ពីទីក្រុងប៉េកាំង ទៅទីក្រុង Shenyang ។ រថភ្លើងល្បឿនលឿនរបស់ចិន ក៏មានអតិថិជនអន្ដរជាតិផងដែរដូចជា ឥណ្ឌូណេស៊ី រុស្ស៊ី អីុរ៉ង់ និងឥណ្ឌា ៕
ចែករំលែកព័តមាននេះ