ខេត្តសៀមរាប ៖ បើតាមសេចក្តីរាយការណ៍ពីសមត្ថកិច្ចជំនាញខេត្ត បានប្រាប់ឱ្យដឹងនៅរសៀលថ្ងៃទី៣០ ខែមីនា ឆ្នាំ២០២២នេះថា អ្នកបើកដឹកដីម្នាក់បានចូលទៅម៉ាស្សា ហើយបង្កហិ.ង្សាដោយវា.យនារីម៉ាស្សា បន្ទាប់មកបើករថយន្តរត់គេច តែក៏ត្រូវកម្លាំងនគរបាលអន្តរាគមន៍ដេញតាម ស្រាប់តែត្រូវអ្នកបើករថយន្តបង្ករូបនោះ បានបើករថយន្តបុកសមត្ថកិច្ចទៀត បណ្ដាលឱ្យបាក់ជើង ទើបសមត្ថកិច្ចសម្រេចបា.ញ់បំបែកកង់ ហើយក៏ចាប់ជនបង្កនោះបាន ភា្លមៗ។ ហេតុការណ៍នោះកើតឡើងនៅវេលាម៉ោង១និង២៣នាទីឈានចូល ថ្ងៃទី៣០ ខែមីនាឆ្នាំ២០២២ នៅចំណុចហាងម៉ាស្សាយីហោ «ណាវីន» ស្ថិតក្នុងភូមិខ្នារ សង្កាត់ជ្រាវ ក្រុងសៀមរាប។
បើតាមលោកវរសេនីយ៍ឯក នួន សារុន នាយ ការិយាល័យអន្តរាគមន៍នៃស្នងការដ្ឋាននគរបាលខេត្តសៀមរាប បានឱ្យដឹងនៅរសៀលថ្ងៃទី៣០ ខែមីនា ឆ្នាំ២០២២នេះថា ដោយម្ចាស់ហាងខាងលើ បានខលរាយការណ៍មកកម្លាំងនគរបាលអន្តរាគមន៍ដែលប្រចាំការនៅជិតបេនឡានចុងកៅស៊ូ ។ ខណៈពេលនោះកម្លាំងសមត្ថកិច្ចបានទៅដល់ ក៏បានសួររកដើមហេតុ ស្រាប់តែ អ្នកបើករថយន្តដឹកដីបានបើករត់គេចចេញពីកន្លែងកើតហេតុ ដោយទុកគ្នាគាត់នៅកន្លែងម៉ាស្សាចំនួន០៣នាក់ (ប្រុសទាំង០៣) ក៏ត្រូវបានកម្លាំងយើងឃាត់ទុកនៅកន្លែងកើតហេតុតែម្តង។
លោកបន្តថា បន្ទាប់មកកម្លាំងយើងក៏បានដេញតាមចាប់អ្នកបើករថយន្តដឹកដីនោះ ដែលមានកម្លាំងនគរបាលអន្តរាគមន៍ចំនួន៥ម៉ូតូ មានគ្នាចំនួន៧នាក់ តាមរហូតមកដលផ្លូវកែងបត់ចូលវត្តព្រិន្ទ ស្រាប់តែអ្នកបើករថយន្តបង្កនោះបានបុកម៉ូតូកម្លាំងនគរបាលម្នាក់ បណ្តាលឱ្យរងរបួសជើងខាងស្តាំធ្ងន់ធ្ងរ និងខូចខាតម៉ូតូមួយគ្រឿងទៀត។
លោកបន្តថា ដោយឃើញហេតុការណ៍បែបនេះ កម្លាំងនគរបាលក៏បានបន្តដេញតាមរថយន្តបង្ក រហូតបានបាញ់បំបែកកង់រថយន្ត តែរថយន្តមិនព្រមឈប់នោះទេ ហើយក៏បើកបន្តរហូតមកដល់ខាងត្បូងស្ពានក្រវ៉ាត់ក្រុងស្ពានប៊ីឡាញ ក៏មកបុកជាមួយនឹងរោងការទៀត ទើបរថយន្តបង្កទៅមុខលែងរួច ហើយត្រូវបានកម្លាំងនគរបាលឃាត់ខ្លួនបានរថយន្ត និងអ្នកបើកភ្លាមៗ បន្ទាប់មកក៏ប្រគល់ជូនខាងជំនាញការិយាល័យនគរបាលចរាចរណ៍ផ្លូវគោក ដើម្បីអនុវត្តនីតិវិធីបន្តទៅតាមផ្លូវច្បាប់។
ជុំវិញករណីខាងលើនេះដែរ លោកវរសេនីយ៍ឯក ជឹម សុវណ្ណ ស្នងការរងទទួលការិយាល័យនគរបាលចរាចរណ៍ផ្លូវគោកនៃស្នងការដ្ឋាននគរបាលខេត្តសៀមរាប បានឱ្យដឹងនៅរសៀល ថ្ងៃទី៣០ ខែមីនាថា ករណីអ្នករថយន្តដឹកដីបង្កហិ.ង្សា និងបុកនគរបាលអន្តរាគមន៍នោះ ត្រូវបានកម្លាំងនគរបាលចរាចរណ៍ផ្លូវគោក នៃស្នងការដ្ឋាននគរបាលខេត្តសៀមរាប ឃាត់ខ្លួនជនបង្កបាន ។ ហើយក្រោយពីសួរនាំរួច កម្លាំងនគរបាលការិយាល័យជំនាញ បានរៀបចំកសាងសំណុំរឿងបញ្ជូនទៅតុលាការហើយ។
បើតាមប្រភពនៅកន្លែងកើតហេតុវិញបានឱ្យដឹងថា ម្ចាស់រថយន្តដឹកដីខាងលើនេះ ទំនងជាស្រវឹងស្រា ហើយបានស្រែកឡូឡា និងអួតក្អេងក្អាងថា ជាខ្សែរបស់ថ្នាក់ដឹកនាំនៃខេត្តសៀមរាប ហើយចង់សមត្ថកិច្ចខាងណាមក ក៏គាត់មិនខ្លាចដែរ។ ប៉ុន្តែបច្ចុប្បន្ន ជនបង្កត្រូវបានកម្លាំងនគរបាលការិយាល័យជំនាញ កំពុងរៀបចំកសាងសំណុំរឿងបញ្ជូនខ្លួនទៅកាន់តុលាការខេត្ត ដើម្បីចាត់ការបន្តតាមនីតិវិធីច្បាប់៕
ចែករំលែកព័តមាននេះ