ភ្លៀងនិងខ្យល់កន្ត្រាក់ បណ្ដាលឱ្យផ្ទះប្រជាពលរដ្ឋចំនួន៧ខ្នងផ្ទះ នៅភូមិដំរឹប ឃុំអភិវឌ្ឍន៍ ស្រុកទឹកផុស ខ្លះបានរលំបាក់រាបដល់ដី ខ្លះទៀតរបើកដំបូល និងប៉ើងជញ្ជាំង
ខេត្តកំពង់ឆ្នាំង ៖ ភ្លៀងនិងខ្យល់កន្ត្រាក់ បណ្ដាលឱ្យផ្ទះប្រជាពលរដ្ឋចំនួន៧ខ្នងផ្ទះ នៅភូមិដំរឹប ឃុំអភិវឌ្ឍន៍ ស្រុកទឹកផុស ខ្លះបានរលំបាក់រាបដល់ដី ខ្លះទៀតរបើកដំបូល និងប៉ើងជញ្ជាំង ហេតុការណ៍នេះបានកើតឡើងនៅវេលាម៉ោង៤និង៣០នាទីល្ងាច ថ្ងៃទី២៧ ខែមីនា ឆ្នាំ ២០២២។
លោក ខែម វិបុល អធិការនគរបាលស្រុកទឹកផុស នៅព្រឹកថ្ងៃទី២៨ ខែមីនា ឆ្នាំ២០២២នេះ បានឲ្យដឹងថា៖ នៅវេលាម៉ោងប្រមាណជាង៤រសៀល ថ្ងៃទី២៧ ខែមីនា ម្សល់ម៉ិញនេះ មានភ្លៀងលាយឡំជាមួយនឹងខ្យល់កន្ត្រាក់យ៉ាងខ្លាំង ប៉ះទៅចំភូមិដំរឹប បណ្ដាលឱ្យផ្ទះប្រជាពលរដ្ឋចំនួន៧ខ្នង បានរងការខូចខាត ដោយខ្លះបាក់រាបដល់ដី ហើយខ្លះទៀតរបើកដំបូល និងជញ្ជាំងផងដែរ។
លោកអធិការនគរបាលស្រុកទឹកផុស បន្តថា ក្នុងនោះមានផ្ទះរបស់ឈ្មោះ ហ៊ុ សារិទ្ធ រងការខូចខាតធ្ងន់ជាងគេ ហើយផ្ទះនោះធ្វើអំពីឈើប្រក់ដំបូលស៊ីប្រូ បានរលំបាក់ទាំងស្រុង និងបាន សង្កត់ទៅលើគោយន្ត១គ្រឿង បណ្ដាលឲ្យរងការខូចខាតទៀត ។ ក្រៅពីនោះ ផ្ទះប្រជាពលរដ្ឋចំនួន៦ខ្នងទៀតបានរងការខូចខាត ដោយរបើកដំបូល ដែលខ្លះប្រក់ក្បឿង ខ្លះប្រក់ស័ង្កសី និងខ្លះទៀតប្រក់ស៊ីប្រូជាដើម ចំណែកផ្ទះខ្លះទៀតបានរងការខូចខាតរបើកជញ្ជាំងផងដែរ ។
លោកបន្តទៀតថា ទោះយ៉ាងណា ក្នុងហេតុការណ៍ខាងលើនោះ មិនបានបណ្ដាលឱ្យមាននរណាម្នាក់រងគ្រោះថ្នាក់នោះឡើយ ។ ហើយចំពោះផ្ទះដែលរងការខូចខាតខាងលើ នៅព្រឹកនេះ កម្លាំងអធិការនគរបាលស្រុកទឹកផុស រួមនឹងនគរបាលប៉ុស្តិ៍ មូលដ្ឋាន បានចុះជួយរុះរើ ជូនពួកគាត់។
ដោយឡែក លោក ប្រាក់ សោភ័ណ្ឌ នាយកប្រតិបត្តិសាខាកាកបាទក្រហមខេត្តកំពង់ឆ្នាំងបានបញ្ជាក់ថា៖ ថ្ងៃស្អែក កាកបាទក្រហមខេត្តកំពង់ឆ្នាំង នឹងចុះសាកសួរសុខទុក្ខ ព្រមទាំងនាំអំណោយមួយចំនួនទៅផ្តល់ជូនគ្រួសាររងគ្រោះខាងលើនោះហើយ៕
ចែករំលែកព័តមាននេះ