ខេត្តកណ្តាល ៖ បន្ទាប់ពីសម្តេចតេជោ ហ៊ុនសែន នាយករដ្ឋមន្ត្រីកម្ពុជាបានប្រកាសចេញបញ្ជាម៉ឺងម៉ាត់ដល់មន្ត្រីពាក់ព័ន្ធគ្រប់ជាន់ខ្ពស់ឱ្យចុះបង្ក្រាបបទល្មើសនេសាទនៅបឹងទន្លេសាបនោះ ស្រាប់តែនៅព្រឹកថ្ងៃទី២៥ ខែមីនានេះបានចុះបង្ក្រាបបទល្មើសនេសាទ ក្នុងភូមិសាស្ត្រនានា ក្នុងខេត្តកំពង់ឆ្នាំង ។…
ខេត្តកណ្តាល ៖ បន្ទាប់ពីសម្តេចតេជោ ហ៊ុនសែន នាយករដ្ឋមន្ត្រីកម្ពុជាបានប្រកាសចេញបញ្ជាម៉ឺងម៉ាត់ដល់មន្ត្រីពាក់ព័ន្ធគ្រប់ជាន់ខ្ពស់ឱ្យចុះបង្ក្រាបបទល្មើសនេសាទនៅបឹងទន្លេសាបនោះ ស្រាប់តែនៅព្រឹកថ្ងៃទី២៥ ខែមីនានេះបានចុះបង្ក្រាបបទល្មើសនេសាទ ក្នុងភូមិសាស្ត្រនានា ក្នុងខេត្តកំពង់ឆ្នាំង ។
សមត្ថកិច្ចចម្រុះខេត្តកំពង់ឆ្នាំងបន្តចុះបង្ក្រាបបទល្មើសនេសាទ និងនៅបន្តធ្វើដូចភ្លៀងរលឹម ជាក់ស្តែង នៅថ្ងៃទី២៥ ខែមិនានេះ គឺជាថ្ងៃទី២ ហើយដែលកិច្ចប្រតិបត្តិការជាយ៉ាងក្តៅគគុករបស់អាជ្ញាធរខេត្តកំពង់ឆ្នាំងក្នុងការបង្ក្រាបបទល្មើសនេសាទនៅតាមដងទន្លេ ។
នៅថ្ងៃនេះផងដែរ ដោយទទួលបទបញ្ជាពីឯកឧត្តម ស៊ុន សុវណ្ណារិទ្ឋ អភិបាលខេត្តកំពង់ឆ្នាំង សមត្ថកិច្ចចម្រុះប្រមាណជាង៧០នាក់ ដឹកនាំដោយ ឯកឧត្តម សាន់ យូ អភិបាលរងខេត្តកំពង់ឆ្នាំង បានចុះបង្ក្រាបបទល្មើសនេសាទ ក្នុងភូមិសាស្ត្រនានា ក្នុងខេត្តកំពង់ឆ្នាំង ។
តាមការបញ្ជាក់ពី លោក ងិន ហ៊ុន ប្រធានមន្ទីរកសិកម្ម រុក្ខាប្រមាញ់ និងនេសាទ ខេត្តកំពង់ឆ្នាំងបានឲ្យដឹងថា ៖ ថ្ងៃនេះឯកឧត្តម សាន់ យូ អភិបាលរងខេត្តកំពង់ឆ្នាំង បានដឹកនាំសមត្ថកិច្ចចម្រុះ ចំនួន៧៨នាក់ក្នុងនោះមានមន្ត្រីកសិកម្ម និងជលផលចំនួន២៨នាក់ កម្លាំងស្នងការនគរបាលខេត្តចំនួន២៧នាក់ និងកម្លាំងគណៈបញ្ជាការឯកភាពស្រុកទាំង៣ ចំនួន២៣នាក់ ដោយបានប្រើប្រាស់មធ្យោបាយ កាណូតចំនួន១៨គ្រឿង ចែកចេញជា៣គោលដៅ គឺគោលដៅភូមិសាស្ត្រស្រុកជលគិរី ស្រុកកំពង់លែង និងស្រុកបរិបូណ៌ ។
ជាលទ្ធផលនៃការបង្ក្រាបបានមាន ៖ បំផ្លាញចោលនៅនឹងកន្លែង របាំងសាច់អួនចំនួន១២ កន្លែងមានប្រវែង៨០០ម៉ែត្រ, បង្គោល ៤៥០ដើម លបសាច់អួន ១៥លប ។ រុះរើសម្រាស់ចំនួន៣១ កន្លែង ស្មើនឹង ៨៥០ ម៉ែត្រការ៉េ បង្គោលចំនួន៤៣៥ ដើម មែកសម្រាស់ ចំនួន ៧៥០មែក ។ រឹបអូសសាច់អួនចំនួន៣វង់ ក្នុង១វង់ៗមានប្រវែង ៦០ ម៉ែត្រ ដែលមានជម្រៅ៥ម៉ែត្រ និងមានក្រឡាទំហំ ២ហ៊ុនកន្លះ ។
គួររំលឹកដែរថា ៖ ក្រោយពីអនុសាសន៍របស់សម្ដេចអគ្គមហាសេនាបតីតេជោ ហ៊ុនសែន ស្ដីពីបទល្មើសនេសាទ កាលពីពេលថ្មីៗ កម្លាំងសមត្ថកិច្ចចម្រុះបានចុះបង្ក្រាបបទល្មើសនេសាទរយៈពេល ២ ថ្ងៃជាប់គ្នា គឺថ្ងៃទី ២៤ និង ២៥មីនា ។ ហើយបើតាមការបញ្ជាក់ពីឯកឧត្តម ស៊ុន សុវណ្ណារិទ្ធិ អភិបាលខេត្តកំពង់ឆ្នាំងបានឲ្យដឹងកិច្ចប្រតិបត្តិការបង្ក្រាបបទល្មើសនេសាទនេះនឹងបន្តធ្វើដូចភ្លៀងរលឹមលុះត្រាតែបទល្មើសនេសាទអស់ពីក្នុងទន្លេសាប ៕
ចែករំលែកព័តមាននេះ