ខេត្តកំពង់ឆ្នាំង ៖ កសិករដាំដំណាំចំការនៅឃុំឆ្នុកទ្រូ ស្រុកបរិបូណ៌ បានបញ្ជាក់ថា៖ ផ្លែល្ពៅឆ្នាំនេះបានតម្លៃថ្លៃ ជាងឆ្នាំទៅ ដែលធ្វើឲ្យពួកគាត់ ជាអ្នកចំការមានក្តីសប្បាយចិត្តរីករាយគ្រប់គ្នា និងកំពុងតែប្រមូលផលផ្លែល្ពៅយកមកលក់នៅមាត់កំពង់ទឹកឆ្នុកទ្រូយ៉ាងញាប់ដៃផងដែរ…
ខេត្តកំពង់ឆ្នាំង ៖ កសិករដាំដំណាំចំការនៅឃុំឆ្នុកទ្រូ ស្រុកបរិបូណ៌ បានបញ្ជាក់ថា៖ ផ្លែល្ពៅឆ្នាំនេះបានតម្លៃថ្លៃ ជាងឆ្នាំទៅ ដែលធ្វើឲ្យពួកគាត់ ជាអ្នកចំការមានក្តីសប្បាយចិត្តរីករាយគ្រប់គ្នា និងកំពុងតែប្រមូលផលផ្លែល្ពៅយកមកលក់នៅមាត់កំពង់ទឹកឆ្នុកទ្រូយ៉ាងញាប់ដៃផងដែរ ។
លោក ណម ប៊ុននេត្រ អាយុ៣៧ឆ្នាំ មានទីលំនៅភូមិសាឡង់ ឃុំត្រពាំងចាន់ ស្រុកបរិបូណ៌ និងមានដីចម្ការនៅចំណុចព្រែកទាល់ ដែលបានយកផ្លែល្ពៅមកលក់នៅមាត់កំពង់ទឹក ភូមិឆ្នុកទ្រូ ឃុំឆ្នុកទ្រូ ស្រុកបរិបូណ៌ នៅព្រឹកថ្ងៃទី២៥ ខែមីនា ឆ្នាំ២០២២ បានឲ្យដឹងថា ផ្លែល្ពៅឆ្នាំនេះបានតម្លៃថ្លៃគួរសម ថ្លៃជាងឆ្នាំទៅមិញ ។ ផ្លែល្ពៅលេខ១ លក់បាន១.១០០រៀលក្នុង១គីឡូក្រាម លេខ២ថ្លៃ៦០០រៀល និងលេខ៣ ថ្លៃ៣០០ក្នុង១គីឡូក្រាម គឺមានតម្លៃថ្លៃជាងឆ្នាំទៅមុន ដែលលេខ១លក់បានត្រឹមតែ៣០០រៀលប៉ុណ្ណោះ ក្នុង១គីឡូក្រាម ។
ឆ្នាំនេះ អ្នកចម្ការដាំល្ពៅគឺពិតជាសប្បាយចិត្តគ្រប់គ្នា ។យ៉ាងនេះក្តី លោកក៏បានបញ្ជាក់ថា កាលពី៣-៤ថ្ងៃមុន ផ្លែល្ពៅលេខ១ លក់បាន១.៣០០រៀល ហើយទើបតែថ្ងៃនេះផ្លែល្ពៅធ្លាក់ចុះបន្តិច ។ ចំពោះមូលហេតុផ្លែល្ពៅបានថ្លៃ ទី១គឺ ដោយសារផ្លែល្ពៅបេះពីដើមដៃ ,ទី២ អ្នកធ្វើចម្ការដាំល្ពៅ ឆ្នាំនេះមានចំនួនតិច ។ កសិកររូបនោះបានបញ្ជាក់ថា ប្រមាណជា៤ទៅ៥ថ្ងៃទៀត ផ្លែល្ពៅគាត់ប្រមូលអស់ពីចម្ការហើយ បើទោះបី ដល់ពេលនោះ ធ្លាក់ថ្លៃទៀត ក៍អាចត្រឹម ពី៨០០ ទៅ១០០០រៀល ក្នុង១គីឡូក្រាមដែរ។
ចំណែកស្ត្រីឈ្មោះប៊ុនថា ក៏បាននិយាយដែរថា គាត់មានផ្ទៃដីប្រមាណកន្លះហិចតា ពេលនេះគាត់កំពុងតែមមារញឹកប្រមូលផលផ្លែល្ពៅ យកមកលក់ដែរ ព្រោះកំពុងតែមានតម្លៃថ្លៃ ។ យ៉ាងនេះក្តី ស្ត្រីរូបនោះបានបញ្ជាក់ថា ផ្លែល្ពៅពិតជាបានថ្លៃមែន ប៉ុន្តែឆ្នាំនេះទាំងជីនិងប្រេងចាក់ម៉ាស៊ីនបូមទឹក សុទ្ធតែបានឡើងថ្លៃទាំងអស់ ។ កាលពីឆ្នាំទៅជី១ការុង ថ្លៃតែ១០ម៉ឺនរៀលទេ ឆ្នាំនេះជីមួយ១ការ៉ុង ថ្លៃដល់ ២០ម៉ឺនរៀល ។ ចំណែកប្រេងចាក់ម៉ាស៊ីនបូមទឹកកាលពីឆ្នាំ១ពីដុង ត្រឹមតែ៩ម៉ឺនរៀលទេ ឆ្នាំប្រេងបានឡើងដល់១៦ ម៉ឺនរៀល ក្នុង១ពីដុង ។
ដោយឡែក ប្រធានមន្ទីរកសិកម្មរុក្ខាប្រមាញ់ និងនេសាទខេត្តកំពង់ឆ្នាំង លោក ងិន ហ៊ុន ក៏បានបញ្ជាក់ដែរថា ផ្លែល្ពៅពិតជាឡើងថ្លៃដើមពីដើមដៃបែបនេះមែន ព្រោះការប្រមូលផលពីដើមដៃ ផ្លែល្ពៅធំៗល្អ មិនដូចចុងដៃផ្លែល្ពៅតូចៗឡើយ ហើយក៏មិនធានាថា បានថ្លៃរហូតនោះទេ បន្តិចទៀត នៅពេលប្រហែលជាងកន្លះខែទៀត ពេលដែលកសិករកាន់តែប្រមូលផលមកច្រើនផ្លែល្ពៅគឺពិតជានឹងចុះថ្លៃជាងនេះជាពុំខាន ៕
ចែករំលែកព័តមាននេះ