រថយន្តដឹកកម្មករមួយគ្រឿងបានក្រឡាប់ផ្ងារជើង បណ្ដាលឲ្យកម្មករជាង៥០នាក់បានរងរបួសធ្ងន់និងស្រាល ក្នុងករណីគ្រោះថ្នាក់ចរាចរណ៍មួយបានកើតឡើងកាលពីវេលាម៉ោង៧និង២០នាទីយប់ ថ្ងៃទី២៤ ខែមីនា ឆ្នាំ២០២២ នៅតាមបណ្ដោយផ្លូវកៅស៊ូ ចំណុចព្រៃឆ្មា
ខេត្តកំពង់ឆ្នាំង ៖ រថយន្តដឹកកម្មករមួយគ្រឿងបានក្រឡាប់ផ្ងារជើង បណ្ដាលឲ្យកម្មករជាង៥០នាក់បានរងរបួសធ្ងន់និងស្រាល ក្នុងករណីគ្រោះថ្នាក់ចរាចរណ៍មួយបានកើតឡើងកាលពីវេលាម៉ោង៧និង២០នាទីយប់ ថ្ងៃទី២៤ ខែមីនា ឆ្នាំ២០២២ នៅតាមបណ្ដោយផ្លូវកៅស៊ូ ចំណុចព្រៃឆ្មា ស្ថិតក្នុងភូមិរលាំង ឃុំត្បែងខ្ពស់ ស្រុកសាមគ្គីមានជ័យ ខណៈពេលដែលរថយន្តដឹកកម្មករបានបុកជាមួយនឹងរថយន្តធុនតូច ដោយអ្នកបើកបរក្នុងស្ថានភាពស្រវឹង ។
លោក សេង ចិន្តា នគរបាលស្រុកសាមគ្គីមានជ័យ បានឲ្យដឹងថា ករណីគ្រោះថ្នាក់ចរាចរណ៍ខាងលើនេះ បណ្ដាលមកពីរថយន្តធន់ធំដឹកកម្មករបុកជាមួយនឹងរថយន្តធុនតូច អ្នកបើកបរក្នុងស្ថានភាពស្រវឹង។
លោកអធិការនគរបាលស្រុកសាមគ្គីមានជ័យ បានបញ្ជាក់ថា មុនពេលកើតហេតុ មានរថយន្តដឹកកម្មករមួយគ្រឿងម៉ាកហ៊ីយ៉ាន់ដាយ ពណ៌ស ពាក់ស្លាកលេខភ្នំពេញ 3a1422 បើកបរដោយបុរសម្នាក់ឈ្មោះ យន ភៀវ អាយុ២៧ឆ្នាំ រស់នៅភូមិក្រាំងបេង ឃុំពាម ស្រុកសាមគ្គីមានជ័យ ក្នុងទិសដៅពីកើតទៅលិច លុះមកដល់ចំណុចកើតហេតុ ក៏បានបុកជាមួយនឹងរថយន្តមួយគ្រឿងម៉ាកហុងដាស៊ីវិច ពណ៌ស គ្មានស្លាកលេខ បើកបរដោយឈ្មោះ ហ៊ន រិន អាយុ៥០ឆ្នាំ រស់នៅភូមិត្រពាំងថ្ម ឃុំស្វាយ ស្រុកសាមគ្គីមានជ័យ ដោយអ្នកបើកបរក្នុងស្ថានភាពស្រវឹង បណ្ដាលឲ្យរថយន្តដឹកកម្មករក្រឡាប់ផ្ងារជើងឡើងលើ និងបានបណ្ដាលឲ្យកម្មករចំនួន៥៧នាក់ (ប្រុស១៤នាក់) បានរងរបួស ហើយក្នុងនោះក៏មានអ្នករងរបួសធ្ងន់ចំនួន៨នាក់ផងដែរ។
ប្រភពដដែលបន្តថា បន្ទាប់ពីកើតហេតុ អ្នករងរបួសបានដឹកទៅសង្គ្រោះនៅមន្ទីរពេទ្យបង្អែកស្រុកកំពង់ត្រឡាច ចំណែកឯអ្នករងរបួសធ្ងន់ ខ្លះបានដឹកទៅសង្គ្រោះនៅមន្ទីរពេទ្យក្រុងភ្នំពេញ និងខ្លះទៀតក៏បានដឹកទៅសង្គ្រោះនៅមន្ទីរពេទ្យបង្អែក ខេត្តកំពង់ឆ្នាំង។
លោកអធិការបានបញ្ជាក់ថា ក្រោយពេលកើតហេតុ អ្នកបើកបររថយន្តដឹកកម្មករក៏បានរត់គេចខ្លួនបាត់ស្រមោល ចំណែកអ្នកបើកបររថយន្តហុងដាស៊ីវិច ត្រូវបានសមត្ថកិច្ចឃាត់ខ្លួន និងកសាងសំណុំរឿងបញ្ជូនទៅកាន់តុលាការតាមនីតិវិធី ព្រោះតែបើកបរក្នុងស្ថានភាពស្រវឹងបង្កឲ្យមានគ្រោះថ្នាក់ចរាចរណ៍ ។ ដោយឡែករថយន្ត ត្រូវបានយកទៅរក្សាទុកនៅអធិការនគរបាលស្រុកសាមគ្គីមានជ័យ ដើម្បីរង់ចាំការដោះស្រាយតាមនីតិវិធី៕
ចែករំលែកព័តមាននេះ