ខេត្តកណ្តាល ៖ គ្រោះធម្មជាតិបាក់ច្រាំងទន្លេមេគង្គក្រោម ត្រង់ចំណុចភូមិខ្ពបអាទាវបឹងលើ ឃុំខ្ពបអាទាវ ស្រុកលើកដែក ខេត្តកណ្ដាល នៅតែបន្តបាក់ ធ្វើឲ្យប្រជាពលរដ្ឋជាច្រើនគ្រួសារបង្ខំចិត្តរុះរើផ្ទះជាបន្តបន្ទាប់។
បើយោងតាមប្រជាពលរដ្ឋរស់នៅម្ដុំនោះ បានប្រាប់ភ្នាក់ងារយកព័ត៌មានយើងឱ្យដឹងថា គ្រោះធម្មជាតិបាក់ច្រាំងទន្លេនេះ គឺចាប់ផ្ដើមកើតមានឡើងតាំងពីឆ្នាំ២០០០មកម្ល៉េះ ធ្វើឱ្យបាត់បង់ដីស្រែចម្ការ និងដីលំនៅឋានរបស់ពួកគាត់ ក្នុងមួយគ្រួសារៗទំហំប្រហែលបីបួនរយម៉ែត្រ បានបាក់ធ្លាក់ចូលទៅក្នុងទន្លេអស់រលីង រហូតដល់គ្រួសារពួកគាត់ក៏បានបង្ខំចិត្តរុះរើផ្ទះរត់ចេញទៅរកកន្លងទីទួលសុវត្ថិភាពជាបន្តបន្ទាប់ទាំងថ្ងៃទាំងយប់។
ប្រជាពលរដ្ឋបានលើកឡើងទៀតថា កាលពីរសៀលវេលាម៉ោងប្រហែល៣ឬម៉ោង៤ នៅថ្ងៃទី២៧ ខែមីនា ឆ្នាំ២០២២ នេះ គ្រោះបាក់ច្រាំងទន្លេបានបាក់ដីរបស់ពួកគាត់អស់ប្រហែលជា២០ម៉ែត្រទៀតចូលទៅក្នុងទន្លេ ធ្វើឲ្យប្រជាពលរដ្ឋរស់នៅក្បែរនោះចំនួនពីរគ្រួសារ ត្រូវបង្ខំចិត្តរុះរើផ្ទះរត់ចេញតាំងពីវេលាម៉ោង៨យប់មិញ។
ពលរដ្ឋបន្តថា ហើយអ្វីដែលសំខាន់នោះ គឺក្នុងចំណោមផ្ទះប្រជាពលរដ្ឋចំនួន២គ្រួសារដែលរុះរើចេញទាំងយប់ហ្នឹង គឺមានមួយគ្រួសារ ដែលមានសមាជិកកូនតូចជាច្រើននាក់ និងគ្មានដីកន្លែងផ្សេងសម្រាប់ទៅស្នាក់នៅជាបណ្ដោះអាសន្ននោះទេ។ គាត់ក៏បានសម្រេចចិត្តទៅសូមឱ្យអាជ្ញាធរភូមិ-ឃុំ ដើម្បីសុំដីផ្លូវសាធារណៈ ផ្លូវរដ្ឋ ដើម្បីសែងផ្ទះរបស់គាត់ទៅដាក់លើដីផ្លូវសាធារណៈនោះប្រហែលជា៣ទៅ៥ម៉ែត្រសិន តែអាជ្ញាធរភូមិ-ឃុំមិនអនុញ្ញាតឲ្យទេ។
ពលរដ្ឋបន្តទៀតថា ទោះជាយ៉ាងណា ក្នុងហេតុការណ៍គ្រោះធម្មជាតិបាក់ច្រាំងទន្លេនេះ គឺតាំងពីរសៀលថ្ងៃម្សិលមិញ រហូតមកដល់រសៀលថ្ងៃទី១៨ មីនានេះ ។ ហើយគាត់បញ្ជាក់ថា មិនទាន់មានឃើញអាជ្ញាធរភូមិ-ឃុំណាម្នាក់ ចុះមកពិនិត្យមើល ឬណែនាំប្រាប់ប្រជាពលរដ្ឋឲ្យមានការប្រុងប្រយ័ត្នលើបញ្ហាគ្រោះថ្នាក់នោះឡើយ គឺមានតែមកខាងប្រជាពលរដ្ឋមិនឲ្យស្នាក់នៅលើដីរដ្ឋទៅវិញ។
បញ្ហាខាងលើនេះ ប្រជាពលរដ្ឋចោទជាសំណួរថា ចុះបើពួកគាត់គ្មានដីកន្លែងផ្សេងស្នាក់នៅផង ហេតុអីមិនឱ្យគាត់ស្នាក់នៅជាបណ្តោះអាសន្នលើដីរដ្ឋសិនទៅ? ចុះបើសិនជាគ្រោះថ្នាក់ច្រាំងទន្លេ ធ្លាក់ផ្ទះពលរដ្ឋចូលទៅក្នុងទឹក ហើយមានគ្រោះថ្នាក់ដល់អាយុជីវិតមនុស្សនោះ តើអ្នកណាទទួលខុសត្រូវ?។
ដូច្នេះហើយ ប្រជាពលរដ្ឋសូមសំណូមពរ ប្រមុខរាជរដ្ឋាភិបាលសម្ដេចតេជោ ហ៊ុន សែន មេត្តាជួយមានវិធានការទប់ស្កាត់ច្រាំងទន្លេកុំឲ្យបាក់បន្តទៀត និងជួយរកដីកន្លែងផ្សេងឲ្យពលរដ្ឋបានស្នាក់នៅសមរម្យផង។
ទោះយ៉ាងណា ក្នុងករណីគ្រោះធម្មជាតិបាក់ច្រាំងទន្លេជាបន្តបន្ទាប់ខាងលើនេះ ប្រជាពលរដ្ឋបានអះអាងថា មិនមានផ្ទះប្រជាពលរដ្ឋណាមួយធ្លាក់ចូលទៅក្នុងទឹកទន្លេនោះឡើយ ហើយក៏មិនមានមនុស្សណាម្នាក់គ្រោះថ្នាក់អ្វីដែរ។ ពលរដ្ឋបញ្ជាក់បន្ថែមថា ចំណុចបាក់ច្រាំងទន្លេនេះ កាលពីមុន គឺមានសាឡង់បូមខ្សាច់នៅក្បែរកោះពីរដែរ ប៉ុន្តែមួយរយៈពេលចុងក្រោយនេះ មិនមានឃើញនៅក្បែរហ្នឹងទេ ធ្វើម៉េចនេះជាគ្រោះធម្មជាតិ បានបាក់ជាច្រើនឆ្នាំមកហើយ៕
ចែករំលែកព័តមាននេះ