មិនមែនជាលើកដំបូងនោះទេ ដែលអ្នកច្នៃកាំភ្លើងយកទៅបា.ញ់សត្វ បែរជាភ្លាត់ស្នៀតស្លា.ប់ខ្លួនឯងវិញ ។ ប៉ុន្តែទោះជាកើតមានគ្រោះអកុសលបែបនេះក្តី ក៏មានអ្នកមិនស្គាល់រសជាតិក៏នៅតែបន្ត
ខេត្តសៀមរាប ៖ មិនមែនជាលើកដំបូងនោះទេ ដែលអ្នកច្នៃកាំភ្លើងយកទៅបាញ់សត្វ បែរជាភ្លាត់ស្នៀតស្លា.ប់ខ្លួនឯងវិញ ។ ប៉ុន្តែទោះជាកើតមានគ្រោះអកុសលបែបនេះក្តី ក៏មានអ្នកមិនស្គាល់រសជាតិក៏នៅតែបន្ត ។
ជាក់ស្តែង តាមពីប្រភពពីមន្ត្រីមូលដ្ឋានស្រុកវ៉ារិន បានឲ្យដឹងថា កាលពីវេលាម៉ោងប្រមាណ៨និង៣០នាទីព្រឹកថ្ងៃទី១៣ ខែមីនា ឆ្នាំ២០២២ កន្លងទៅ មានករណីរៀលកៃកាំភ្លើងកែច្នៃត្រូវចំទ្រូងបុរសម្នាក់ បណ្តាលឱ្យស្លា.ប់ភ្លាមនៅចំណុចអាង១០០ភ្នំចង្ក្រានរយ ក្នុងស្រុកវ៉ារិន ។ ជនរងគ្រោះឈ្មោះ វឿន វ៉ុន ភេទប្រុស អាយុ៣៧ឆ្នាំ មានទីលំនៅក្នុងភូមិលៀបចាស់ ឃុំពាក់ស្នែង ស្រុកអង្គរធំ ។
ប្រភពព័ត៌មានបានឲ្យដឹងទៀតថា តាមការបំភ្លឺរបស់បុរសឈ្មោះ ណែម ស៊ី អាយុ៣២ឆ្នាំ រស់នៅក្នុងភូមិ ឃុំ ខាងលើ ដែលជិះម៉ូតូទៅបាញ់សត្វជាមួយគ្នានិយាយថា នៅវេលាម៉ោងប្រមាណ៨និង៣០នាទីព្រឹកថ្ងៃនោះ ខ្លួនបានទៅអង្គុយលេងនៅផ្ទះឈ្មោះ វឿន វ៉ុន ហើយជនរងគ្រោះបានបបួលខ្លួន និងឈ្មោះ អឿម អិត ភេទប្រុស រស់នៅភូមិឃុំជាមួយគ្នាដែរ ទៅយកឃ្មុំនៅចំណុចអាង១០០ភ្នំចង្ក្រានរយ ដោយជិះម៉ូតូចំនួន២គ្រឿងចេញទៅ ។
បុរសនេះរៀបរាប់ទៀតថា ពួកគេបានយកម៉ូតូទៅផ្ញើទុកនៅផ្ទះរបស់ឈ្មោះ ញ៉ ភេទប្រុស នៅជើងភ្នំអំពិល ហើយបានផឹកស៊ីនៅទីនោះ រហូតដល់ម៉ោងប្រមាណ៤រសៀល ទើបទៅឡើងភ្នំបន្ត ។ នៅពេលដើរបានប្រហែល៥០០ម៉ែត្រ ឈ្មោះ វឿន វ៉ុន បានចូលយកកាំភ្លើងច្នៃ ដែលលាក់ទុកនៅទីនោះ រួចបន្តដំណើរបានមួយសន្ទុះទៀតក៏បាញ់បានមាន់ព្រៃ១ក្បាល ។
លុះបន្តដំណើរទៅមុខទៀត ឃើញម្ជូរទ្រមូង ក៏បានប្រាប់ឈ្មោះ វឿន វ៉ុន ឲ្យបេះ ចំណែកខ្លួនធ្វើដំណើរបន្តទៅមុខ បានប្រហែល៣០ម៉ែត្រ ស្រាប់តែឮសំឡេងផ្ទុះហើយឮឈ្មោះ វឿន វ៉ុន ស្រែកឱ្យជួយ និងប្រាប់ឱ្យជួយដកឆ្នុកចេញពីទ្រូងផង ។ ប៉ុន្តែឮសូរនិយាយបានតែប៉ុណ្ណេះ ក៏បាត់សំឡេងឈឹងនិងលែងកម្រើក ទើបខ្លួនសន្និដ្ឋានថា ជនរងគ្រោះស្លា.ប់បាត់ទៅហើយ និងបានត្រឡប់មកភូមិវិញ ដើម្បីប្រាប់បងប្អូនជនរងគ្រោះឱ្យទៅយកស.ពនៅទីនោះផង ។
ស.ពជនរងគ្រោះ ក្រោយពេលពិនិត្យរួច ត្រូវបាននគរបាលស្រុកវ៉ារិន ប្រគល់ឱ្យក្រុមគ្រួសារយកទៅធ្វើបុណ្យតាមប្រពៃណី ៕
ចែករំលែកព័តមាននេះ