ខេត្តកំពត ៖ មានករណីចោរលួចរថយន្តម៉ាកស្តារុិចមួយគ្រឿង ពណ៌ស ពាក់ផ្លាកលេខភ្នំពេញ ២R-៤៩០៣ នៅមុខផ្ទះសំអាងការមួយកន្លែង យីហោ «សំអាងការជ័យជំនះ» ស្ថិតក្នុងភូមិ១ឧសភា សង្កាត់កំពង់កណ្តាល ក្រុងកំពត ។
បើតាមអ្នកស្រី ហ៊ឹម សុខុម អាយុ៦២ឆ្នាំ ដែលជាម្ចាស់រថយន្ត បាននិយាយឱ្យដឹងថា កាលពីយប់ ប្តីរបស់គាត់បានយករថយន្តទៅដឹកក្រុមអ្នកបម្រើភ្ញៀវរហូតដល់ម៉ោង១១ ទើបយកមកចតទុកដូចសព្វមួយដងនៅមុខផ្ទះ ដោយសំអាងថា រថយន្តរបស់គាត់ក៏ចាស់ដែរ មិនបារម្ភពីរឿងចោរលួចនោះទេ ។
ស្ត្រីម្ចាស់រថយន្ត បាននិយាយទៀតថា ហើយនៅមុនកើតហេតុនោះ គឺមានអ្នកនៅខាងជើងផ្ទះរបស់គាត់ បានឃើញរថយន្តគាត់ត្រូវគេបើកចេញពីផ្ទះប្រហែលជាម៉ោង៥និង៣០នាទីព្រឹក ថ្ងៃទី១៤ ខែមីនា ឆ្នាំ២០២២ ប៉ុន្តែពុំមានអ្នកណាចាប់អារម្មណ៍អ្វីឡើយ ព្រោះនឹកស្មានថា ម្ចាស់រថយន្តបើកដឹកសម្ភារៈសំអាងការគេដូចសព្វដង ឬជិះទៅហាត់ប្រាណ ។
ប្រភពដដែលបន្តថា លុះនៅម៉ោង៦ព្រឹក នៅពេលគាត់ភ្ញាក់ពីដំណេកបើកទ្វារផ្ទះចេញមកក្រៅទើបដឹងថា ទ្វារត្រូវជនល្មើសយកសោចាក់ពីខាងក្រៅជាប់ ។ ពេលនោះ គាត់បានទូរស័ព្ទប្រាប់មិត្តភក្តិនៅក្លិបហាត់ប្រាណឲ្យមកជួយទូរស័ព្ទហៅជាងមកធ្វើសោចាក់ចេញវិញ ទើបដឹងថា បាត់រថយន្ត និងបង្កឱ្យមានការភ្ញាក់ផ្អើលកើតឡើងតែម្តង ។ បន្ទាប់មក គាត់ក៏បានទៅដាក់ពាក្យបណ្តឹងនៅប៉ុស្តិ៍នគរបាលរដ្ឋបាលសង្កាត់ ដើម្បីឲ្យសមត្ថកិច្ចជួយអន្តរាគមន៍ក្នុងករណីខាងលើនេះដែរ។
ពាក់ព័ន្ធនឹងករណីខាងលើនេះ ក៏មានមតិខ្លះបាននិយាយដែរថា បើរថយន្តនេះ មានបង្កប់ប្រព័ន្ធ GPS នោះ ប្រហែលចោរលួចនោះ រត់មិនរួចឡើយ ដែលយ៉ាងហោចណាស់ក៏បានរថយន្តមកវិញដែរ ៕
ចែករំលែកព័តមាននេះ