ខេត្តកំពង់ចាម ៖ ស្របពេលដែលអាកាសធាតុក្តៅ ក្នុងរដូវប្រាំង ស្រាប់តែមានអគ្គិភ័យបានកើតឡើងដោយលំនៅឋានរបស់ប្រជាពលរដ្ឋមួយខ្នង ដែលបានសាងសង់អំពីឈើប្រក់ក្បឿងត្រូវបានឆាបឆេះយ៉ាងសន្ធោសន្ធៅដែលហេតុការណ៍នេះបានកើតឡើងនៅវេលាម៉ោង២និង៣០នាទីរសៀល ថ្ងៃទី១១ មីនា ២០២២ នៅក្នុងសង្កាត់សំបួរមាស ក្រុងកំពង់ចាម ជាមួយនោះគេបានឃើញរថយន្តពន្លត់អគ្គីភ័យចេញទៅអន្តរាគមន៍បាញ់ទឹកជាបន្ទាន់ផងដែរ ។
សមត្ថកិច្ចមូលដ្ឋានបានឲ្យដឹងថា ក្នុងពេលដែលមានអគ្គីភ័យនេះកើតឡើងប៉ុស្តិ៍រដ្ឋបាលមូលដ្ឋានបានរាយការណ៍អគ្គីភ័យឆេះផ្ទះ ប្រជាពលរដ្ឋ នៅចំណុចផ្ទះឈ្មោះ អែម យ៉េកណា ភេទស្រី អាយុ៥០ឆ្នាំ ស្ថិតក្នុងភូមិសំបួរមាស សង្កាត់សំបួរមាស ក្រុងកំពង់ចាម ។
ក្រោយពីទទួលព័ត៌មានភ្លាម លោកឧត្តមសេនីយ៍ទោ ឯម កុសល ស្នងការនគរបាលខេត្តបានបញ្ជាអោយកម្លាំងការិយាល័យបង្ការពន្លត់ អគ្គិភ័យនៃស្នងការដ្ឋាននគរបាលខេត្តកំពង់ចាមដឹកនាំដោយលោកឧត្ដមសេនីយ៍ត្រី មិន សុគន្ធវិបុល ស្នងការរងទទួលផែនគ្រប់គ្រងអាវុធគ្រឿងផ្ទុះ និងអគ្គិភ័យ និងកម្លាំងអធិការនគរបាលក្រុងកំពង់ចាមដឹកនាំដោយលោកវរៈសេនីយ៍ឯក អ៊ីង ប៊ុន អធិការនគរបាលក្រុងកំពង់ចាម និងកម្លាំងប៉ុស្តិ៍រដ្ឋបាលសំបួរមាស រួមជាមួយអាជ្ញាធរភូមិ សង្កាត់ និងប្រជាការពារចុះទៅអន្ដរាគមន៍ជាបន្ទាន់ ។
សមត្ថកិច្ចមូលដ្ឋានបានបន្តឲ្យដឹងទៀតថា ក្នុងរដូវប្រាំងងាយនឹងកើតគ្រោះអគ្គីភ័យដូចជា ករណីនេះផ្ទះឈើបានឆាបឆេះលឿន ពេលដែលរថយន្តពន្លត់អគ្គីភ័យរបស់ស្នងការដ្ឋាននគរបាលខេត្តបានទៅដល់ គឺភ្លើងបានឆេះយ៉ាងពេញបន្ទុកទៅហើយ ។ ទោះជាយ៉ាងនេះ កម្លាំងសមត្ថកិច្ចបានប្រឹងប្រែងជួយអន្តរាគមន៍ខំបាញ់ពន្លត់ធ្វើយ៉ាងណាកុំឲ្យភ្លើងឆាបឆេះរាលដាលទៅដល់ផ្ទះអ្នកក្បែរនោះដែលបង្កឲ្យមានមហន្តរាយធំជាងនេះ ។
ក្នុងករណីនេះ ធ្វើអោយមានការខូចខាតផ្ទះ ០១មាន (៣ខ្នង) ទំហំ ៧ម៉ែត្រ × ១២ម៉ែត្រ សង់អំពីឈើ ប្រក់ក្បឿង ជញ្ជាំក្ដា ឆេះអស់ទាំងស្រុង ។ ក៏មានរថយន្ត០១គ្រឿង ត្រូវបានឆេះទាំងស្រុង ម៉ាកប្រូស -តុឈើចំនួន ០២ -កៅអីឈើចំនួន០២ -គ្រែឈើ ចំនួន ០២ និងសម្ភារ:ប្រើប្រាស់ទាំងអស់នៅក្នុងផ្ទះ ម្ចាស់ផ្ទះឈ្មោះ អែម យ៉េកណា ភេទស្រី អាយុ៥០ឆ្នាំ មុខរបរលក់ដូរ នៅភូមិ-សង្កាត់ខាងលើ និងមិនមានប៉ះពាល់ រឺរបួសមនុស្សណាម្នាក់ឡើយ ។
មូលហេតុ បណ្ដាលមកពីទុស្សេខ្សែភ្លើង ។ អគ្គីភ័យរលត់អស់១០០% នៅវេលាម៉ោង៣និង៣០នាទីរសៀលថ្ងៃដដែល ។ ក្នុងកិច្ចប្រតិបត្តិការណ៍នេះ ប្រើប្រាស់រថយន្តពន្លត់អគ្គីភ័យ ០៤គ្រឿងរថយន្តស្នងការដ្ឋានខេត្ត៣គ្រឿង និងរថយន្តអគ្គីភ័យស្រុកកំពង់សៀម០១គ្រឿង ប្រើប្រាស់អស់ទឹក ០៧ឡាន ។
អ្នកស្រីឃាង ស៊ីផាន ចៅសង្កាត់សំបួរមាស បានឲ្យដឹងដែរថា ក្រោយពីអគ្គីភ័យឆាបឆេះរួចរាល់លោកជំទាវប៉ាង ដានី អភិបាលរងខេត្តបានចុះសួរសុខទុក្ខម្ចាស់ផ្ទះ ហើយនឹងត្រៀមយកអំណោយជូននៅព្រឹកថ្ងៃទី១២ មិនា ។ ដោយឡែកព្រះចៅអធិការវត្តចំនួន៤ ក្នុងក្រុងកំពង់ចាមក៏បាននាំយកអំណោយជូនដល់ម្ចាស់ផ្ទះរងគ្រោះនាល្ងាចថ្ងៃទី១១ មីនា ដើម្បីជួយរំលែកនូវការលំបាក ៕
ចែករំលែកព័តមាននេះ