ជំងឺរបេងឆ្លងពីមនុស្សម្នាក់ទៅម្នាក់តាមផ្លូវដង្ហើម
រាជធានីភ្នំពេញ ៖ របេងគឺជាជំងឺកាចសាហា.វមួយដែលអាចឆក់យកជីវិតមនុស្សបាន ប្រសិនបើយើងធ្វេសប្រហែសមិនបានធ្វើរោគវិនិច្ឆ័យច្បាស់លាស់ និងប្រញាប់ប្រញាល់ព្យាបាលឱ្យទាន់ពេលវេលា
រាជធានីភ្នំពេញ ៖ របេងគឺជាជំងឺកាចសាហាវមួយដែលអាចឆក់យកជីវិតមនុស្សបាន ប្រសិនបើយើងធ្វេសប្រហែសមិនបានធ្វើរោគវិនិច្ឆ័យច្បាស់លាស់ និងប្រញាប់ប្រញាល់ព្យាបាលឱ្យទាន់ពេលវេលា ទៅតាមកាលកំណត់ជាក់ច្បាស់ណាមួយ ។ ជំងឺនេះអាចឆ្លងពីមនុស្សម្នាក់ទៅមនុស្សម្នាក់ទៀតតាមរយៈផ្លូវដង្ហើម ។ វានឹងទៅបំផ្លាញប្រព័ន្ធដង្ហើម(សួត) ខួរក្បាល ឬសរីរាង្គផ្សេងៗក្នុងខ្លួនយើង ដែលធើ្វឲ្យស្ថានភាពសុខភាពចុះថមថយជាលំដាប់ ស្គមរីងរៃរហូតដល់ប្រឈមការបាត់បង់ជីវិត ។
ដកស្រង់ប្រសាសន៍លោកសាស្ត្រាចារ្យជំនួយ ចាន់ សារិន គ្រូពេទ្យព្យាបាលឯកទេសជំងឺរបេងនៅមន្ទីរពេទ្យកាល់មែ៉តបានធ្វើការកត់សម្គាល់ថា ប្រសិនបើអ្នកជំងឺមកពិនិត្យសុខភាពទាន់ពេលវេលា ដែលនឹងផ្តល់រោគវិនិច្ឆ័យប្រាកដប្រជាដោយគ្រូពេទ្យជំនាញ និងទទួលយកការព្យាបាលដោយលេបថ្នាំតាមវេជ្ជបញ្ជា តាមដានក្នុងរយៈកាលកំណត់មួយនោះ ជំងឺរបេងនេះនឹងអាចព្យាបាលឲ្យជាសះស្បើយបាន ។
១-រោគសញ្ញា ៖ អ្នកដែលកើតជំងឺរបេងមានអាការៈ
-គ្រុនក្តៅ ពេលរសៀល
-អស់កម្លាំង ហេវហត់
-បែកញើសយប់
-ក្អករ៉ាំរ៉ៃពី២ទៅ៣សបា្តហ៍
-ឈឺក្បាល ឡើងកូនកណ្តុរត្រង់ក ក្នុងពោះ និងអាចមានរោគសញ្ញាតិចតួចដូចជា អស់កម្លាំង ថយអាហារ ស្រកទម្ងន់(ស្គម) ។
២-មូលហេតុ ៖ មេរេាគបង្កជំងឺរបេង គឺឈ្មោះបេកា ឬមីកូបាក់តេរីយូម តូយប៊ែគុយឡូសីស ។
៣-ការព្យាបាល ៖ ជំងឺនេះព្យាបាលដោយការលេបថ្នាំរបេងដែលមានប្រសិទ្ធភាពខ្ពស់ និងមាននៅទូទាំងប្រទេសកម្ពុជា(ជាទូទៅករណីជំងឺមិនធ្ងន់ធ្ងរ ការព្យាបាលធ្វើឡើងនៅតាមមណ្ឌលសុខភាព) ។
បញ្ជាក់៖ ករណីជំងឺមានសភាពធ្ងន់ធ្ងរ ដោយសារការវិវត្តនៃជំងឺផ្ទាល់ ឬមកពីផលវិបាកនៃជំងឺ ឬស្ថានភាពស្មុគស្មាញនៃអ្នកជំងឺ ការព្យាបាលតម្រូវឲ្យសម្រាកនិងសង្គ្រោះក្នុងមន្ទីរពេទ្យជាមួយក្រុមវេជ្ជបណ្ឌិតជំនាញ ។
៤-ការការពារ ៖ ចាក់វ៉ាក់សាំងបេសេហ្សេ ចំពោះទារកទើបកើត ។
-ត្រូវព្យាបាលបង្ការ ករណីកុមារអាយុចាប់ពី៥ឆ្នាំចុះក្រោម ដែលនៅប្រាស្រ័យជាមួយអ្នកមានការឆ្លងរបេងបេកាវិជ្ជមាននៅផ្ទះជាមួយ ។
-ថែរក្សារអនាម័យទូទៅ ដោយពាក់ម៉ាសបិទមាត់ និងច្រមុះ ក្នុងករណីសង្ស័យមានជំងឺរបេង ។ «សូមចូលរួមទាំងអស់គ្នាដើម្បីគ្រួសារមួយសុខសាន្ត និងគ្មានជំងឺរបេង!» ៕
ចែករំលែកព័តមាននេះ