ខេត្តកំពង់ចាម ៖ ក្រុមអ្នកញៀនល្បែងបញ្ជល់មាន់ និងអាប៉ោងកំពុងតែលេងហ៊ោកញ្ច្រៀវសប្បាយ នៅកន្លែងស្ងាត់មួយឆ្ងាយពីលំនៅដ្ឋានរបស់ប្រជាពលរដ្ឋក្នុងឃុំមហាលាភ ស្រុកកោះសូទិន កម្លាំងសមត្ថកិច្ចចុះបង្ក្រាប និងឃាត់អ្នកញៀនល្បែងបានជាច្រើននាក់ផងដែរ ។ ចំពោះចំណាត់ការនេះធ្វើឡើង…
ខេត្តកំពង់ចាម ៖ ក្រុមអ្នកញៀនល្បែងបញ្ជល់មាន់ និងអាប៉ោងកំពុងតែលេងហ៊ោកញ្ច្រៀវសប្បាយ នៅកន្លែងស្ងាត់មួយឆ្ងាយពីលំនៅដ្ឋានរបស់ប្រជាពលរដ្ឋក្នុងឃុំមហាលាភ ស្រុកកោះសូទិន កម្លាំងសមត្ថកិច្ចចុះបង្ក្រាប និងឃាត់អ្នកញៀនល្បែងបានជាច្រើននាក់ផងដែរ ។
ចំពោះចំណាត់ការនេះធ្វើឡើង ក្រោមការចង្អុលបង្ហាញពីសំណាក់ឯកឧត្តម អ៊ុន ចាន់ដាអភិបាល និងជាគណៈបញ្ជាការឯកភាពខេត្ត ។ លោកឧត្តមសេនីយ៍ទោ ឯម កុសល ស្នងការនគរបាលខេត្តបានឲ្យដឹងថា មុននឹងឈានចុះបង្ក្រាបល្បែងស៊ីសងនេះ ដំបូងត្រូវបានប្រជាពលរដ្ឋរាយការណ៍មកសមត្ថកិច្ច ហើយភ្លាមៗនោះបានចាត់ កម្លាំងចុះទៅកាន់កន្លែងគោលដៅដែលជាកន្លែងសង្វៀនបញ្ជល់មាន់ខាងលើនោះ ព្រោះថា គោលនយោបាយភូមិឃុំសុវត្ថិភាពរបស់ក្រសួងមហាផ្ទៃមិនអនុញ្ញាតឲ្យលេងល្បែងស៊ីសង ដែលជាទង្វើខុសច្បាប់ ។
លោកស្នងការនគរបាលខេត្តបានបន្តឲ្យដឹងទៀតថា ប្រតិបត្តិការនេះបានធ្វើឡើង នៅថ្ងៃទី០៤ ខែមីនា ឆ្នាំ២០២២ វេលាម៉ោង១៤ និង០០នាទី បន្ទាប់ពីទទួលបានព័ត៌មានពីប្រជាពលរដ្ឋ និងបទបញ្ជាពី ឯកឧត្តម អ៊ុន ចាន់ដា អភិបាលនៃគណៈអភិបាលខេត្តកំពង់ចាម ឲ្យរូបលោកបានចាត់បញ្ជាឲ្យកម្លាំងជំនាញរបស់ផែនការងារនគរបាលព្រហ្មទណ្ឌ កម្លាំងជំនាញអធិការដ្ឋាននគរបាលស្រុកកោះសូទិន សហការជាមួយអាជ្ញាធរមូលដ្ឋាន ចុះបង្ក្រាបករណីបើក និងលេងល្បែងស៊ីសងខុសច្បាប់ (ជល់មាន់ និងអាប៉ោង) នៅចំណុចមាត់ព្រែកសណ្ដាយ ស្ថិតនៅភូមិរកាកោងត្បូង ឃុំមហាលាភ ស្រុកកោះសូទិន ខេត្តកំពង់ចាម បង្ក្រាបនឹងចាប់ឃាត់ខ្លួនបានមុខសញ្ញាចំនួន២៤នាក់ និងដកហូតវត្ថុតាងមួយចំនួន ។
ប្រជាពលរដ្ឋនៅស្រុកកោះសូទិនបានឲ្យហើយដឹងដែរថា ទីតាំងកន្លែងលួចបើកលេងបញ្ជល់មាន់ និងអាប៉ោងដោយខុសច្បាប់នេះគេតែងតែឃើញក្រុមអ្នកញៀនល្បែងដឹកមាន់តាមម៉ូតូយកទៅលេងភ្នាល់ដាក់លុយជាហូរហែ ។
លោកឧត្តមសេនីយ៍ស្នងការបញ្ជាក់ថា បច្ចុប្បន្នជនសង្ស័យ រួមនឹងវត្ថុតាងខាងលើត្រូវបានបញ្ជូនមកកាន់ស្នងការដ្ឋាននគរបាលខេត្តកំពង់ចាម ដើម្បីកសាងសំណុំរឿងតាមនីតិវិធីតាមបញ្ជារបស់លោក សុធា ពិសិដ្ឋ ព្រះរាជអាជ្ញារង នៃអយ្យការអមសាលាដំបូងខេត្តកំពង់ចាម ៕
ចែករំលែកព័តមាននេះ