ខេត្តមណ្ឌលគិរី ៖ ខេត្តមណ្ឌលគិរី ជាតំបន់អេកូទេសចរណ៍ដ៏សម្បូរបែប ហើយអ្នកទេសចរភាគច្រើនចាប់អារម្មណ៍រមណីយដ្ឋានធម្មជាតិ សម្រស់ព្រៃព្រឹក្សា និងអាកាសធាតុដ៏ត្រកាលនៃតំបន់ខ្ពង់រាបមួយនេះ ។
អ្វីជាចំណុចពិសេសមួយទៀត ដែលអ្នកទេសចរបរទេសចាប់អារម្មណ៍ខ្លាំងនោះ គឺការដើរលំហែក្នុងព្រៃជាមួយសត្វដំរី ។ មគ្គុទេសទេសចរណ៍ប្រចាំខេត្តមណ្ឌលគិរីម្នាក់ឱ្យដឹងកាលពីពេល ថ្មីៗ កន្លងមកថា អ្នកទេសចរដែលជួលដំរីដើរកម្សាន្តក្នុងព្រៃ ភាគច្រើនគឺមិនលើសពីពីរថ្ងៃឡើយ ។
នៅពេលដើរកម្សាន្តក្នុងព្រៃនោះ អ្នកនាំផ្លូវបានរៀបចំអាហារវេចខ្ចប់ ងាយៗសម្រាប់អ្នកទេសចរបរិភោគ ឬអាចដាក់មងរកត្រីតាមដងអូរក្នុងព្រៃតែម្ដង យកមកអាំងដើម្បីបង្កើនភាពរីករាយដល់ភ្ញៀវមួយកម្រិតថែមទៀត ។ នៅពេលអ្នកទេសចរកំពុងកម្សាន្តលេងជាមួយសត្វដំរី គេមិនភ្លេចណែនាំពីរបៀបរបបនៃការរស់នៅរបស់ជនជាតិភាគតិចឡើយ ដោយគេធ្វើម្ហូបអាហារដូចជា សម្លបុក (គេប្រើបំពង់ឫស្សីសម្រាប់ចម្អិនសម្ល) ការថែទាំសត្វដំរី ការស្នាក់នៅក្នុងព្រៃ និងវប្បធម៌មួយចំនួនទៀត ដល់អ្នកទេសចរមិនឱ្យនឿយណាយក្នុងដំណើរកម្សាន្តរបស់ពួកគេទេ ។
សម្រាប់តែសហគមន៍ពូតាំងក្នុង១ថ្ងៃ យ៉ាងហោចណាស់មានជនបរទេស៤ទៅ៥នាក់ដែរ ចូលទៅក្នុងសហគមន៍មានបំណងកម្សាន្តជាមួយសត្វដំរី ។ ចំពោះតម្លៃនៃការកម្សាន្តជាមួយសត្វដំរីក្នុងព្រៃ គឺក្នុងម្នាក់ត្រូវចំណាយ៤៥ដុល្លារ សម្រាប់ការបម្រើ១ថ្ងៃ ១យប់ និង៥៥ដុល្លារ សម្រាប់ការកម្សាន្ត១យប់២ថ្ងៃ ។
លោកងិន សុវិមាន ប្រធានមន្ទីរទេសចរណ៍ខេត្តថ្លែងថា ជារៀងរាល់ថ្ងៃមានអ្នកទេសចរអន្តរជាតិជាច្រើនក្រុមធ្វើដំណើរទៅខេត្តមណ្ឌលគិរី ក្នុងគោលបំណងចម្បងដើម្បីទស្សនាសត្វដំរី និងជីវភាពរស់នៅរបស់ជនជាតិភាគតិចព្នង ។ ពួកគេចូលចិត្តផ្តល់ចំណី និងមុជទឹកជាមួយដំរី ឯអ្នកខ្លះចូលចិត្តធ្វើដំណើរចូលក្នុងព្រៃជ្រៅ និងស្នាក់នៅជាមួយជនជាតិដើមភាគតិច ។ «ស្ទើរ៩០% ទៅ៩៥% គឺសុទ្ធតែជាជនបរទេសដែលជួលដំរីដើរកម្សាន្ត មិនសូវមានជនជាតិខ្មែរទេ» ។
លោកប្រធានមន្ទីរទេសចរណ៍ឱ្យដឹងទៀតថា ក្នុងខេត្តមណ្ឌលគិរី តំបន់ទេសចរណ៍ជាមួយសត្វដំរីគឺមាន២កន្លែង ក្នុងនោះមានភូមិពូតាំង និងភូមិពូលូង ដែលស្ថិតក្នុងសង្កាត់រមនា ក្រុងសែនមនោរម្យដូចគ្នា ។ សម្រាប់នៅភូមិពូតាំងគឺមានសត្វដំរីបម្រើផ្នែកទេស ចរណ៍ប្រមាណ១០ក្បាល ចំណែកនៅភូមិពូលូង គឺមានប្រមាណ៤ក្បាល ៕
ចែករំលែកព័តមាននេះ