បង្គោលថ្មរាប់រយដើមដែលស្ត្រី២នាក់បងប្អូនបោះដាំរំលោ.ភយកដីលិចទឹករបស់រដ្ឋជាង២០ហិចតា នៅភូមិរំចេក ឃុំត្នោត ស្រុកបាទី ខេត្តតាកែវ គិតមកទល់ពេលនេះ មិនទាន់បានដកចេញឲ្យអស់ដូចដែលលោក ភួន ឈីម អភិបាលស្រុកបាទី ធ្លាប់បានសន្យានោះទេ ដែលអ្នកស្រុកនិយាយថា
ខេត្តតាកែវ ៖ បង្គោលថ្មរាប់រយដើមដែលស្ត្រី២នាក់បងប្អូនបោះដាំរំលោ.ភយកដីលិចទឹករបស់រដ្ឋជាង២០ហិចតា នៅភូមិរំចេក ឃុំត្នោត ស្រុកបាទី ខេត្តតាកែវ គិតមកទល់ពេលនេះ មិនទាន់បានដកចេញឲ្យអស់ដូចដែលលោក ភួន ឈីម អភិបាលស្រុកបាទី ធ្លាប់បានសន្យានោះទេ ដែលអ្នកស្រុកនិយាយថា ចៅហ្វាយស្រុកផោមឱ្យក្របីហិតតែប៉ុណ្ណោះ។
វត្តមានបង្គោលថ្មរាប់រយដើម បោះដាំវាតទីយកដីលិចទឹករបស់រដ្ឋ នៅចំណុចទីតាំងខាងលើ លោក អ៊ួច ភា អភិបាលខេត្តតាកែវ និងលោក ប៉ុន ហួ ប្រធានមន្ទីរធនធានទឹកខេត្តតាកែវ ដែលជាសាមីពាក់ព័ន្ធ បែរជាសំងំស្ងៀមឈឹងដោយទុកករណីនេះចោលមិនមានវិធានការណ៍អ្វីឡើយ ជាហេតុធ្វើឲ្យមហាជនមានការសង្ស័យលើអាជ្ញាធរថា អាចមានការពាក់ព័ន្ធឃុបឃិតបូញមាត់បត់ដុំដៃអនុញ្ញាតឱ្យស្ត្រី២នាក់ជាអ្នកមានលុយ នៅរាជធានីភ្នំពេញ បោះបង្គោលថ្មព័ទ្ធយកដីរបស់រដ្ឋ។
សូមបញ្ជាក់ថា អ្នកស្រី ភឿង សុខហួង និងប្អូនស្រីឈ្មោះ ភឿង សុខម៉េង រស់នៅរាជធានីភ្នំពេញ បានដើរបញ្ចុះបញ្ចូលទិញដីលិចទឹករបស់រដ្ឋដែលជាដីអាស្រ័យផលពីប្រជាពលរដ្ឋបានជាង២០ហិចតានៅចំណុចភូមិរំចេក ឃុំត្នោត ស្រុកបាទី។ ដោយសារពលរដ្ឋមានការខ្វះខាតក្នុងគ្រួសារផង ក៏ចាប់ផ្តើមលក់ដីលិចទឹករបស់រដ្ឋជាបន្តបន្ទាប់ រហូតមានការបោះបង្គោលថ្មរាប់រយដើមដូចសព្វថ្ងៃនេះទៅ។
ភ្លាមៗ ក្រោយពីមានប្រតិកម្ម និងមានការផ្សព្វផ្សាយតាមរយៈបណ្តាញសារព័ត៌មាន គេឃើញ លោក ភួន ឈីម អភិបាលស្រុកបាទី បានបញ្ជាទៅលោកមេឃុំត្នោត ឱ្យធ្វើការស្រាវជ្រាវរកអ្នកបោះបង្គោល ព្រមទាំងចាត់វិធានការដកបង្គោលនោះចេញ។
ក្រោយមក គេឃើញអាជ្ញាធរបានចុះទៅដកបង្គោលនោះចេញបានប៉ុន្មានដើម ហើយបានបន្សល់បង្គោលថ្មជាច្រើនទៀតនៅដដែល ដោយសំអាងថា ចាំដល់ខែប្រាំងទើបដកទាំងអស់ ខណៈអ្នកបោះបង្គោលនោះ មិនត្រូវបានចាត់វិធានការអ្វីឡើយ បើទោះជាបានដឹងឈ្មោះក៏ដោយ ដែលគេសង្ស័យផ្អែមមាត់គ្រប់គ្នាទៅហើយ។
ព័ត៌មានពិស្តារនឹងមានផ្សាយជូននៅលើកាសែតកោះសន្តិភាព ។
ចែករំលែកព័តមាននេះ