ខេត្តប៉ៃលិន ៖ បន្ទាប់ពីអាជ្ញាធរខេត្ត រៀបចំឈូសឆាយធ្វើផ្លូវលំ១ខ្សែ នៅជាប់នឹងក្រវាត់ព្រំដែនខេត្តប៉ៃលិន ឆ្ពោះទៅទិសខាងលិចឆៀងខាងត្បូង ស្ថិតនៅចំណុចអូរទុរេន២ដើម ក្នុងភូមិបហ៊ុយត្បូង សង្កាត់បយ៉ាខា ក្រុងប៉ៃលិន មកបើគេបើកម៉ូតូ ឬរថយន្ត ហើយក្រឡេកមើលជុំវិញដងផ្លូវនោះនឹងឃើញព្រៃភ្នំពណ៌ខៀវស្រងាត់គួរឱ្យចង់គយគន់គាប់ភ្នែក ។
អ្នករស់នៅក្បែរដងផ្លូវនោះកាលពីពេល ថ្មីៗកន្លងមករៀបរាប់ឱ្យដឹងថា ផ្លូវលំ១ខ្សែក្រវាត់ព្រំដែននោះត្រូវអាជ្ញាធរខេត្ត យកគ្រឿងចក្រឈូសឆាយកាលពីឆ្នាំ២០១៥ ហើយរហូតដល់ពេលនេះប្រជាពលរដ្ឋ និងអ្នកទេសចរ អាចបើកបរម៉ូតូ និងរថយន្តទៅលេងកម្សាន្តនៅតាមដងផ្លូវនោះបាន និងមានអ្នកភូមិខ្លះបង្កើតជាខ្យូសក្បែរជើងព្រៃ សម្រាប់ទទួលអ្នកទេសចរចូលទៅសម្រាកកម្សាន្តយ៉ាងសប្បាយរីករាយ ។
ជារៀងរាល់ថ្ងៃឈប់សម្រាក ពិសេសនៅរដូវបុណ្យភ្ជុំបិណ្ឌ និងចូលឆ្នាំថ្មីប្រពៃណីជាតិខ្មែរ មនុស្សម្នា ក្មេងចាស់ ប្រុសស្រីនាំគ្នាទៅលេងកម្សាន្ត គយគន់មើលទេសភាពព្រៃភ្នំ ។ ទោះជាយ៉ាងណាក្តី ដោយសារមានសភាពស្ងប់ស្ងាត់ពេក អ្នកទេសចរមិនសូវស្នាក់នៅរហូតដល់ល្ងាចប៉ុន្មានទេ ភាគច្រើនត្រឹមតែម៉ោង៤ទៅ៥ល្ងាចនាំគ្នាត្រឡប់ទៅផ្ទះ រៀងៗខ្លួនវិញហើយ ។
អ្នកទេសចរមួយចំនួន ដែលធ្លាប់ដើរលេងកម្សាន្តទស្សនាព្រៃឈើតំបន់ភ្នំនោះ បានលើកឡើងថា បន្ទាប់ពីធ្វើការងារនឿយហត់អស់កម្លាំង និងមានអារម្មណ៍តានតឹង ពួកគាត់បានបបួលក្រុមគ្រួសារ មិត្តភក្តិទៅដើរលេងកម្សាន្តនៅតំបន់នោះ ហើយថតផ្តិតយករូបភាពធម្មជាតិដ៏ស្រស់បំព្រង ។ ការដើរលេងនៅក្បែរព្រៃភ្នំពិតជាត្រជាក់ស្រួលខ្លួន និងសប្បាយរីករាយបាត់អស់កង្វល់ និងការនឿយហត់ ។ នៅទីនោះបានឮសូរសំឡេងសត្វរៃកណ្តឹងយំយ៉ាងកងរំពង និងសត្វព្រៃមួយចំនួនស្រែកយំប្រឡែងគ្នានៅក្នុងព្រៃ ។ ដូច្នេះអ្នកធ្វើដំណើរកម្សាន្តនៅតាមផ្លូវក្បែរព្រៃនោះរីករាយប្លែកអាម្មណ៍ ។
អ្នកភូមិវ័យចំណាស់មួយចំនួនបានសម្តែងក្តីរីករាយដែលអាជ្ញាធរស្ថាបនាផ្លូវលំមួយខ្សែនោះសម្រាប់ងាយស្រួលធ្វើដំណើរ និងអ្នកទេសចរអាចទៅលេងកម្សាន្តទស្សនាព្រៃភ្នំ៕
ចែករំលែកព័តមាននេះ