អបាយមុខគឺជាប្រធាននៃសេចក្ដីវិនាសដោយហេតុផ្សេងៗមានការចម្លងជំងឺបំប្លែងថ្មីអូមីក្រុងទាន់ហន់ជាដើម ។ អបាយមុខនោះមាន៤ប្រកាគឺ ១-ការលេងស្រី ចូលខេធីវី ២-ការសេពគ្រឿងស្រវឹង ៣-ជុំគ្នាលេងល្បែងភ្នាល់ និង៤-ការសេពគប់បាបមិត្តនាំប្រព្រឹត្តល្បែងពាលាអាវ៉ាសែនានា ។ អបាយមុខបួនប្រការនេះ បុគ្គលណាប្រព្រឹត្តមែនៗ បុគ្គលនោះនឹងដល់នូវសេចក្តីវិនាសទាន់ហន់ចាកអាយុជីវិតមិនខាន ។
១. ដូចយ៉ាងវិនាសទី១គឺការលេងស្រី ចូលខារ៉ាអូខេ បើមិនមានជំងឺធ្ងន់ធ្ងរទេ ក៏ជាហេតុនាំឲ្យញៀនញ៉ាមនូវក្តីត្រេកត្រអាលដោយរាគៈ ត្រូវកាមគុណដឹកមុខ ហ៊ានរហូតចាប់រំលោភកុមារីមិនទាន់គ្រប់អាយុ ឬចាប់រំលោភសេពសន្ថវៈលើប្រពន្ធកូនអ្នកដទៃរហូតដល់ថ្នាក់មានទោសពៃយូរខែ យូរឆ្នាំទៅតាមទង្វើខ្លួនបានធ្វើ ។ ម្យ៉ាងទៀតដោយសារតែការកៀកកើយប្រលោមស្នេហ៍ជាមួយនារីខាងក្រៅនោះក៏ជាប្រភពនាំឱ្យប្រឈមនឹងការចម្លងជំងឺបំប្លែងថ្មីអូមីក្រុងយ៉ាងខ្លាំងបំផុត ហើយនាំមេរោគនោះមកចម្លងដល់អ្នកផ្ទះបន្តទៀតដែលគ្នាមិនបានដឹងអ្វីទាំងអស់ ។ នេះជាទោសនៃការប្រព្រឹត្តមិនល្អគឺការលេងស្រី ចូលខារ៉ាអូខេនោះឯង ។
២. ការសេពស្រាក៏ជាទោសមួយសម្រាប់បុរសស្ត្រីក្នុងលោកយើងនេះ ដោយថាមនុស្សពេញចិត្តស្រា យកស្រាជាទីពឹង ឃើញថា មានតែស្រាទេដែលជាមិត្តភក្តិជានិច្ច មនុស្សនោះកាលបើសេពសុរាយូរៗទៅនឹងនាំឱ្យខ្វះសតិ បាត់បង់ស្មារតី អស់បញ្ញាយកទោសជាគុណ ឬយកគុណជាទោស ហើយកាលណាសុរាជ្រាបចូលដល់ពោះភ្លាមឃើញថា អញអស្ចារ្យជាងគេ ខ្លាំងជាងគេក្លាយទៅជាអ្នកក្លាហានខាងផ្នែកកាប់ចាក់ ទាត់ធាក់ កាចឃោរឃៅយង់ឃ្នង ហ៊ានប្លន់ ហ៊ានលួច ហ៊ានសម្លា.ប់ ហ៊ានចាប់រំលោភ សូម្បីឪពុកម្ដាយរបស់ខ្លួនក៏ហ៊ានគំរាមកំហែង ប្រមាថ រហូតហ៊ានសម្លា.ប់គាត់ទៀតផង ។ មនុស្សដែលពុំមានសតិបញ្ញាស្មារតីគ្រប់គ្រងខ្លួនបែបនេះ ឈ្មោះថាជាមនុស្សវិកលចរិត ឬហៅថាវិបល្លាសខ្វះសតិក្នុងខ្លួន ។
ម្យ៉ាងទៀតការជួបជុំគ្នាជល់កែវសេពសុរាក្នុងស្ថានភាពបែបនេះក៏ជាប្រភពនាំឱ្យងាយនឹងចម្លងជំងឺកូវីដផងដែរ ព្រោះហេតុនោះ មនុស្សយើងត្រូវវៀរចាកការសេពសុរាឱ្យបានជាដាច់ខាត ទើបមានឈ្មោះថាជាមនុស្សមានចរិយាសម្បត្តិល្អ មិនប្រឈមខ្លាំងនឹងការចម្លងជំងឺ ។
៣. ការជុំគ្នាលេងល្បែងភ្នាល់ក៏ជាទោសត្រូវវៀរចាកជាដាច់ខាតផងដែរក្នុងសម័យដ៏គ្រោះថ្នាក់នេះ ព្រោះថា មនុស្សខ្លះដែលងប់វង្វេងក្នុងវង់ល្បែងភ្លេចអស់ពីការការពារខ្លួនពីការឆ្លងជំងឺ ភ្លេចសាងអំពើល្អ ជាពិសេសប្រឈមនឹងការចម្លងជំងឺបំផុត ។ ម្យ៉ាងទៀតអ្នកលេងល្បែងរមែងមិនជាទីសណ្ដាប់ ជឿទុកចិត្តនៃអ្នកដទៃឡើយ ពេលនិយាយសម្ដីសាបដូចទឹក រហូតដល់ចូលទៅកាន់ទីជំនុំចំណោម ខ្លួនត្រូវឱនមុខរហូត ព្រោះហេតុនោះ បុគ្គលគួរវៀរចាកឲ្យបាននូវល្បែងភ្នាល់គ្រប់ប្រការ ។
៤. ការសេពគប់មិត្តក៏មានសារៈសំខាន់ណាស់ដែរ នៅក្នុងជីវិតរស់នៅប្រចាំថ្ងៃ បើមិត្តប្រកបដោយធម៌ ឬមិត្តសុចរិតនោះនឹងនាំយើងទៅកាន់សេចក្ដីសុខ ប៉ុន្តែបើមិត្តនោះមិនប្រកបដោយអធម៌ ឬមិត្តទុច្ចរិតក៏នឹងនាំយើងទៅកាន់សេចក្ដីវិនាសជាមិនខាន ជាពិសេសនឹងនាំយើងទៅប្រព្រឹត្តល្បែងទាំងបីខាងលើ នឹងនាំជីវិតឱ្យអាប់ឱនមិនខាន ៕ សាន សារិន
ចែករំលែកព័តមាននេះ