ប្រទេសវៀតណាម ៖ យោងតាមការិយាល័យស្ថិតិទីក្រុងបានឱ្យដឹងថា ការវិនិយោគផ្ទាល់ពីបរទេស (FDI) ដែលបានចុះបញ្ជីវិនិយោគក្នុងទីក្រុងហូជីមិញ បានធ្លាក់ចុះ៦៥% បើធៀបនឹងឆ្នាំមុន ។
កាលពីថ្ងៃទី១៥ កក្កដា កន្លងទៅ ទីក្រុងសេដ្ឋកិច្ចដ៏សំខាន់របស់វៀតណាមមួយនេះ ទទួលបានការវិនិយោគសរុបត្រឹមតែ៨៦៣,៦លានដុល្លារប៉ុណ្ណោះ ដែលបានធ្លាក់ចុះយ៉ាងខ្លាំងបើធៀបនឹងរយៈពេលដូចគ្នាកាលពីឆ្នាំមុន មានចំនួនរហូតដល់២,៥ប៊ីលានដុល្លារ ។
យោងតាមការិយាល័យខាងលើ អចលនទ្រព្យនៅតែជាវិស័យទាក់ទាញបំផុតសម្រាប់វិនិយោគិនបរទេស ក្នុងនោះសរុបជាទឹកប្រាក់មានចំនួន២៨០លានដុល្លារ ឬស្មើនឹង៤៣,៧% នៃការវិនិយោគផ្ទាល់ពីបរទេសក្នុងទីក្រុងហូជីមិញ ។
ក្នុងអំឡុងពេលដដែលនេះ ការវិនិយោគផ្ទាល់ពីបរទេសដែលនាំមុខគេក្នុងទីក្រុងនេះគឺ Cayman Islands (អង់គ្លេស) ជាមួយនឹងទឹកប្រាក់២៣១លានដុល្លារ បន្ទាប់មកជប៉ុន (៩៦,១លានដុល្លារ), សិង្ហបុរី (៨៧,២លានដុល្លារ), កូរ៉េខាងត្បូង (៥១,២លានដុល្លារ), Virgin Islands (អង់គ្លេស) (៤៥លានដុល្លារ) និងតៃវ៉ាន់ (៣០,៣លានដុល្លារ) ។
លោកស្រី Le Thi Huynh Mai នាយិការងនៃនាយកដ្ឋានផែនការ និងការវិនិយោគក្រុង បានប្រាប់សារព័ត៌មានក្នុងស្រុក Sai Gon Giai Phong ថា ៖ « លទ្ធផលនៃការវិនិយោគផ្ទាល់ពីបរទេសក្នុងទីក្រុងហូជីមិញ មិនឆ្លុះបញ្ចាំងពីទិដ្ឋភាពទាំងអស់នៃការទាក់ទាញការវិនិយោគទេ ព្រោះថា គម្រោងខ្នាតធំៗត្រូវបានគេដាក់ស្នើឡើងជាញឹកញាប់ចេញពីវិនិយោគិនបរទេសនៅក្នុងឆមាសទី២ឆ្នាំនេះ » ។
លោកស្រី Mai ឱ្យដឹងទៀតថា ដើម្បីបង្កើតលក្ខខណ្ឌអំណោយផលសម្រាប់វិនិយោគិនទាំងអស់ ទីក្រុងហូជីមិញបានបន្តការបម្រុងទុកដីបន្ថែមទៀតសម្រាប់ការផលិត និងកែសម្រួលវិស័យហេដ្ឋារចនាសម្ព័ន្ធឱ្យកាន់តែប្រសើរឡើងលើផ្នែកសួនឧស្សាហកម្ម និងនៅតាមតំបន់ដំណើរការនាំចេញផ្សេងៗ ។
កាលពីដើមឡើយ លោកស្រី Mai បាននិយាយថា ទីក្រុងហូជីមិញចាត់ទុកការវិនិយោគផ្ទាល់ពីបរទេស គឺជាកត្តាសំខាន់ក្នុងការអភិវឌ្ឍក្នុងទីក្រុង ។ លោកស្រីបន្ថែមថា ទីក្រុងនេះនឹងទាញចំណាប់អារម្មណ៍ខ្លាំងនៃការវិនិយោគផ្ទាល់ពីបរទេសលើវិស័យចំណេះដឹង និងបច្ចេកវិទ្យា៕
ចែករំលែកព័តមាននេះ