ខេត្តសៀមរាប ៖ មនុស្សរាប់ពាន់នាក់ នាំគ្នាទៅលេងបុណ្យនៅអាស្រមមនោរម្យពើងតានាន់ជាតំបន់ទេសចរណ៍ថ្មីមួយ ទើបតែរកឃើញដោយសមាគមកូនខ្មែរវប្បធម៌ខ្មែរ ។ សមាគមនេះធ្វើសកម្មភាពមនុស្សធម៌ និងជួយដល់កុមារក្រីក្រដាច់ស្រយាលឱ្យបានរៀនសូត្រ ។
តំបន់ពើងតានាន់សមស្របនឹងកែច្នៃឱ្យក្លាយទៅជាតំបន់ទេសចរណ៍ធម្មជាតិ ដោយមានពើងថ្មជាច្រើនដុះបន្តុបលើគ្នាទាក់ទាញអ្នកទេសចរ ។
លោកហេង វាសនា ប្រធានក្រុមកូនខ្មែរវប្បធម៌ខ្មែរ ជាអ្នកដឹកនាំបង្កើតអាស្រមមនោរម្យពើងតានាន់ កាលពីពេល ថ្មីៗកន្លងមកឱ្យដឹងថាតំបន់រមណីយដ្ឋានភ្នំពើងតានាន់ស្ថិតនៅភូមិគោកភ្នៅ ឃុំគោកដូង ស្រុកអង្គរជុំ ខេត្តសៀមរាប និងដំណើរការទទួលអ្នកទេសចរជាតិ និងអន្តរជាតិទៅកម្សាន្តចាប់តាំងពីថ្ងៃទី១ ខែមិថុនា ឆ្នាំ២០១៦ មក ។
គិតដល់ថ្ងៃទី២៤ ខែកក្កដា ឆ្នាំ២០១៦ មានអ្នកទេសចរទៅកម្សាន្តចំនួន៧ពាន់នាក់ហើយ ។ ចំណុចពិសេសរបស់ភ្នំពើងតានាន់ គឺមានពើងថ្ម ធំៗបន្តុបលើគ្នាខ្ពស់ជាច្រើនគួរឱ្យស្ងើចសរសើរដែលមនុស្សពុំអាចធ្វើបាន ជាពិសេសនោះគឺមានខ្យល់អាកាសបរិសុទ្ធ ។ អ្នកទេសចរពីទីជិតឆ្ងាយបានទៅធ្វើបុណ្យនៅអាស្រមពើងតានាន់ផង និងទស្សនាកម្សាន្តផង ។ ជារៀងរាល់ថ្ងៃមានអ្នកទេសចរទៅកម្សាន្តពី៦រយនាក់ទៅ៧រយនាក់ ។ ចំណែកថ្ងៃសៅរ៍ និងអាទិត្យ មានអ្នកទៅទស្សនាជាង១ពាន់នាក់ ។ អ្នកទស្សនាភាគច្រើនពីខេត្តសៀមរាប ភ្នំពេញ បាត់ដំបង កំពង់ធំ បន្ទាយមានជ័យ និងខេត្តដទៃទៀត ។
លោកហេង វាសនា សំណូមពរអាជ្ញាធរដែនដី រួមទាំងលោកអភិបាលខេត្តសៀមរាប និងលោកអភិបាលស្រុកអង្គរជុំឱ្យជួយសាងសង់ផ្លូវលំសម្រាប់អ្នកទេសចរទៅកម្សាន្តនៅរមណីយដ្ឋានភ្នំពើងតានាន់ ។ លើសពីនេះដោយជាតំបន់ដាច់ស្រយាល ខ្វះខាតសាលារៀន ដូច្នេះស្នើសុំអគារសិក្សាមួយខ្នង ។
យុវនិស្សិតមនោរម្យរស់នៅខេត្តសៀមរាប ដែលទៅកម្សាន្តនៅរមណីយដ្ឋានពើងតានាន់និយាយថា កម្សាន្តនៅទីនោះមានអារម្មណ៍ស្រស់ស្រាយ និងគយគន់សម្រស់ធម្មជាតិយ៉ាងគាប់ភ្នែក ។
និស្សិតមនោរម្យសំណូមពរអ្នកទេសចរជួយថែរក្សាបរិស្ថានដោយវេចខ្ចប់កាកសំណល់យកទៅចោលឱ្យមានរបៀប ។
ព្រះចៅអធិការព្រះនាមតោ ញ៉ិល គង់នៅអាស្រមមនោរម្យពើងតានាន់មានសង្ឃដីកាថា បច្ចុប្បន្នមានព្រះសង្ឃចំនួន៦អង្គ និងតាជីយាយជី១០នាក់ និងមានក្មេងរៀនសូត្រ៤៥នាក់ជារៀងរាល់ថ្ងៃ ។ កន្លងមកមានអង្គការបំរើវិស័យមនុស្សធម៌នាំយកសៀវភៅ ប៊ិក ខោអាវ ផ្តល់ជូន ក្មេងៗ ស្ទើរតែជារៀងរាល់ថ្ងៃ ។
ព្រះចៅអធិការតោ ញ៉ិល បានអំពាវនាវអ្នកទេសចរជាតិ និងអន្តរជាតិទៅកម្សាន្ត និងធ្វើបុណ្យជួយសាងសង់សមិទ្ធផល ផ្សេងៗក្នុងវត្ត ៕
ចែករំលែកព័តមាននេះ