ប្រទេសចិន ៖ យោងតាមមន្ត្រីក្រសួងដឹកជញ្ជូនមួយរូបបានថ្លែងកាលពីថ្ងៃព្រហស្បតិ៍ថា ចិនគ្រោងសម្រេចឱ្យបាននូវការសាងសង់ផ្លូវរថភ្លើងចម្ងាយ៣ម៉ឺនគីឡូម៉ែត្របន្ថែមទៀតត្រឹមចុងឆ្នាំ២០២០ខាងមុខនេះ
ប្រទេសចិន ៖ យោងតាមមន្ត្រីក្រសួងដឹកជញ្ជូនមួយរូបបានថ្លែងកាលពីថ្ងៃព្រហស្បតិ៍ថា ចិនគ្រោងសម្រេចឱ្យបាននូវការសាងសង់ផ្លូវរថភ្លើងចម្ងាយ៣ម៉ឺនគីឡូម៉ែត្របន្ថែមទៀតត្រឹមចុងឆ្នាំ២០២០ខាងមុខនេះ ដែលនឹងធ្វើឱ្យផ្លូវដែករបស់ខ្លួនសរុបមានប្រវែង១៥ម៉ឺនគីឡូម៉ែត្រ ។
លោក Zhang Dawei អនុប្រធាននាយកដ្ឋានផែនការនៃក្រសួងដឹកជញ្ជូន បានថ្លែងក្នុងសន្និសីទកាសែតមួយនៅទីក្រុងប៉េកាំង កាលពីថ្ងៃព្រហស្បតិ៍កន្លងទៅនេះថា ផ្លូវដែកផ្សេងទៀតប្រវែង១១ពាន់គីឡូម៉ែត្រ នឹងត្រូវសាងសង់បន្ថែមសម្រាប់រថភ្លើងល្បឿនលឿន ដែលចម្ងាយសរុបទាំងអស់មានប្រវែង៣ម៉ឺនគីឡូម៉ែត្រ ។
លោក Zhang Dawei បានលើកឡើងថា ៖ « យើងនឹងបង្កើនល្បឿនសាងសង់ផ្លូវដែកនេះឱ្យបានឆាប់នៅក្នុងតំបន់ភាគកណ្តាល និងភាគខាងលិចប្រទេសចិន ។ យើងក៏នឹងជំរុញការពង្រីកបន្ថែមនូវតំណភ្ជាប់ផ្លូវរថភ្លើងរវាងទីក្រុង និងនៅតាមជាយក្រុងផងដែរ » ។
លោកបន្ថែមថា ៖ « នៅចុងឆ្នាំ២០២០ ច្រើនជាង៨០%នៃទីក្រុងដីគោកទាំងអស់ ដែលមានប្រជាជនរស់នៅយ៉ាងហោចណាស់១លាននាក់ នឹងត្រូវដាក់ឱ្យប្រើប្រាស់ផ្លូវរថភ្លើងល្បឿនលឿន » ។
គួររំលឹកថា កាលពីថ្ងៃពុធកន្លងទៅ គណៈកម្មាធិការអភិវឌ្ឍន៍ និងកែទម្រង់ជាតិ (NDRC) បានចេញផែនការអភិវឌ្ឍផ្លូវដែកថ្នាក់ជាតិមួយ ដោយរំពឹងថា នឹងសម្រេចឱ្យបាននូវបណ្តាញផ្លូវដែកសរុបប្រវែង១៧៥ពាន់គីឡូម៉ែត្រនៅត្រឹមចុងឆ្នាំ២០២៥ ។ ក្រោមគម្រោងនេះ ចិននឹងមានផ្លូវរថភ្លើងល្បឿនលឿនសរុបប្រវែង៣៨ពាន់គីឡូម៉ែត្រ ។
យោងតាមគណៈកម្មាធិការ NDRC បានឱ្យដឹងថា កាលពីឆ្នាំ២០១៥ ចិនសម្រេចបាននូវផ្លូវដែករបស់ខ្លួនសរុបប្រវែង១២១ពាន់គីឡូម៉ែត្រ និងផ្លូវរថភ្លើងល្បឿនលឿនបានប្រវែង១៩ពាន់គីឡូម៉ែត្រ ។ ជាង៦០%នៃផ្លូវរថភ្លើងល្បឿនលឿនរបស់ពិភពលោក គឺមាននៅក្នុងប្រទេសចិន ។
ក្រុមហ៊ុនផ្លូវដែកចិន China Railway Corp បាននិយាយថា ចាប់តាំងពីឆ្នាំ២០០៨មក នៅពេលចិនបានបើកដំណើរការផ្លូវល្បឿនលឿនរបស់ខ្លួនលើកដំបូង តភ្ជាប់ពីទីក្រុងប៉េកាំងទៅធានជីន មានអ្នកដំណើរច្រើនជាង៥ប៊ីលាននាក់បានធ្វើដំណើរទៅមក ដែលអ្នកដំណើរលើផ្លូវល្បឿនលឿននេះកើនឡើង៣០%ជារៀងរាល់ឆ្នាំ ។
ក្រុមហ៊ុនដដែលនេះបន្ថែមថា រថភ្លើងល្បឿនលឿនមានប្រមាណ៤.២០០គ្រឿងកំពុងចរាចរនៅប្រទេសចិន ដែលបានផ្តល់ភាពងាយស្រួលដល់អ្នកដំណើរជាច្រើនលាននាក់ក្នុងការធ្វើដំណើរ ។
លោក Wang Xianqing នាយកវិទ្យាស្ថានសេដ្ឋកិច្ច និងដឹកជញ្ជូននៃសាកលវិទ្យាល័យហិរញ្ញវត្ថុ និងសេដ្ឋកិច្ចក្វាងទុង មានប្រសាសន៍ថា រដ្ឋាភិបាលកណ្តាលបានចាត់ទុកផ្លូវរថភ្លើងល្បឿនលឿនទាំងនេះ គឺជាយុទ្ធសាស្ត្រសំខាន់សម្រាប់ការអភិវឌ្ឍប្រទេស ។
លោកបន្ថែមថា កំណើនយ៉ាងឆាប់រហ័សនៃផ្លូវរថភ្លើងល្បឿនលឿនក្នុងប្រទេសចិន បានចូលរួមចំណែកដ៏ធំនៃភាពរីកលូតលាស់សេដ្ឋកិច្ចចិន និងការអភិវឌ្ឍវិស័យអចលនទ្រព្យ ។
លោកសាស្ត្រចារ្យ Jia Limin មកពីសាកលវិទ្យាល័យ Beijing Jiaotong និងជាប្រធានកម្មវិធីច្នៃប្រឌិតផ្លូវរថភ្លើងល្បឿនលឿនថ្នាក់ជាតិ បាននិយាយថា បន្ថែមលើការពង្រីកបណ្តាញផ្លូវរថភ្លើង ចិនក៏បាននិងកំពុងអភិវឌ្ឍន៍រថភ្លើងល្បឿនលឿនជំនាន់ក្រោយរបស់ខ្លួនផងដែរ ដែលអាចរត់បានយ៉ាងលឿនបំផុត៤០០គីឡូម៉ែត្រក្នុងមួយម៉ោង ។
លោក Jia បន្ថែមថា រថភ្លើងល្បឿនលឿនបំផុតនេះ នឹងអាចសម្របកង់របស់វាឱ្យស្របទៅនឹងរង្វាស់ផ្លូវរថភ្លើងបរទេស ដែលនឹងអាចផ្តល់ភាពងាយស្រួលបន្ថែមទៀតសម្រាប់សេវាឆ្លងកាត់ព្រំដែន មិនដូចរថភ្លើងក្នុងប្រទេសនាពេលបច្ចុប្បន្នឡើយ ៕
ចែករំលែកព័តមាននេះ