រាជធានីភ្នំពេញ ៖ រនាំងដែកពុះចែកទ្រូងផ្លូវចំនួន១០ផ្ទាំងបានបាក់រាបដល់ដី បន្ទាប់ពីស្ត្រីម្នាក់បើករថយន្តបុករះយ៉ាងពេញទំហឹងហើយព្យាយាមបើករថយន្តរត់ចូលផ្ទះ បង្កឱ្យមានការភ្ញាក់ផ្អើល កាលពីវេលាម៉ោង០១ និង៤០នាទីរំលងអធ្រាត្រ ឈានចូលថ្ងៃទី២៦ កក្កដា ស្ថិតនៅតាមបណ្ដោយផ្លូវព្រះមុន្នីវង្ស ក្នុងសង្កាត់បឹងប្រលិត ខណ្ឌ៧មករា ។
បើតាមសាក្សីឃើញហេតុការណ៍ឱ្យដឹងថា រថយន្តបង្កម៉ាកឡិចស៊ីស RX300 ពណ៌.ស មិនចាំស្លាកលេខ បើកបរដោយស្ត្រីម្នាក់ តាមបណ្ដោយផ្លូវព្រះមុនីវង្ស ក្នុងទិសដៅពីជើងទៅត្បូង ក្នុងល្បឿនលឿនគួរសមដែរ ។ ពេលមកដល់ចំណុចកើតហេតុ ក៏រេចង្កូតទៅឆ្វេងដៃបុករះរនាំងដែកពុះចែកទ្រូងផ្លូវ បាក់រៀបដល់ដីចំនួន១០ផ្ទាំង ។
ប្រភពបន្តថា បន្ទាប់ពីបុករនាំងដែកបាក់រាបអស់១០ផ្ទាំងហើយ រថយន្តបង្ករេចង្កូតទៅផ្លូវម្ខាងទៀត តែមិនបានឈប់ទេ គឺបានបន្ថែមល្បឿនបើករត់សំដៅទៅទិសខាងត្បូង រហូតដល់ស្ពានអាកាសក្បាលថ្នល់ ទើបបាត់ដាន ។ ក្រោយមក ទើបនគរបាលខណ្ឌច្បារអំពៅប្រាប់ថា បានឃើញភិនភាគរថយន្តខាងលើ បើកចូលផ្ទះវីឡាមួយកន្លែង ក្នុងសង្កាត់ច្បារអំពៅទី២ និងឱ្យខាងសមត្ថកិច្ចខណ្ឌ៧មករា មកពិនិត្យជាក់ស្តែង ។
តែដោយសារយប់ជ្រៅពេក សមត្ថកិច្ចមិនអាចចូលទៅឆែកឆេរនៅក្នុងផ្ទះរបស់គេទេ ទើបសមត្ថកិច្ចមិនអាចធ្វើអ្វីបាន និងបានត្រឹមតែចាំឃ្លាំមើលពីមុខផ្ទះ គេរហូតចាំដល់ព្រឹក ទើបសុំម្ចាស់ផ្ទះចូលពិនិត្យ ។
ក្រោយពេលកើតហេតុ សមត្ថកិច្ចមូលដ្ឋានបានចុះដល់ន្លែងកើតហេតុ និងបានត្រឹមតែលើករនាំងដែករៀបចំបញ្ឈរឡើងវិញតែប៉ុណ្ណោះ ។
ចែករំលែកព័តមាននេះ