ខេត្តតាកែវ ៖ លោកវរសេនីយ៍ទោ សែម សុជាតិ នាយការិយាល័យព្រហ្មទណ្ឌកម្រិតធ្ងន់ខេត្តតាកែវ បានឲ្យដឹងថា សមត្ថកិច្ចរកឃើញអត្តសញ្ញាណស្ត្រីរងគ្រោះដែលត្រូវជនសង្ស័យ សម្លា.ប់ទម្លាក់ចូលទឹក
ខេត្តតាកែវ ៖ លោកវរសេនីយ៍ទោ សែម សុជាតិ នាយការិយាល័យព្រហ្មទណ្ឌកម្រិតធ្ងន់ខេត្តតាកែវ បានឲ្យដឹងថា សមត្ថកិច្ចរកឃើញអត្តសញ្ញាណស្ត្រីរងគ្រោះដែលត្រូវជនសង្ស័យ សម្លាប់ទម្លាក់ចូលទឹក ក្នុងតំបន់ទេសចរណ៍ទន្លេបាទីហើយ គឺនារីរងគ្រោះមានឈ្មោះ ជា សុជាតិ អាយុ២៣ឆ្នាំ រស់នៅភូមិព្រែកសំរោង ក្រុងតាខ្មៅ ខេត្តកណ្តាល ហើយជាមន្ត្រីជាប់កិច្ចសន្យា នៅមន្ទីរទេសចរណ៍ខេត្តកណ្តាល ។
លោក សែម សុជាតិ បានបញ្ជាក់ថា ខណៈនេះសមត្ថកិច្ចកំពុងសួរនាំ ឪពុកម្តាយរបស់ស្រ្តីជនរងគ្រោះ ដើម្បីស្វែងរកពន្លឺនៃឃាតកម្មមួយនេះ ។
បើតាមសាក្សីនៅកន្លែងកើតហេតុនិយាយថា នៅវេលាម៉ោងប្រមាណជាង៨ព្រឹក គេឃើញនារីរងគ្រោះ និងនារីម្នាក់ទៀត (សង្ស័យឃាតករ) ដូចជាមិត្តភក្តិនិងគ្នា បានឌុបមកអង្គុយលេងមួយសន្ទុះ ។ ស្រាប់តែឃើញនារីដែលឌុបនាងមកនោះ បានជិះម៉ូតូចេញតែម្នាក់ឯង ទើបអ្នកនៅកន្លែងនោះឆ្ងល់ ក៏ឱ្យសន្តិសុខដើរទៅមើលនៅលើផ្ទះទឹកដែលនារីរងគ្រោះទាំង២នាក់ អង្គុយលេងនោះ តែអត់ឃើញមានមនុស្សទេ ។ តែអ្វីដែលធ្វើឱ្យភ្ញាក់ផ្អើលនោះ គឺគេឃើញមានស្នាមឈាមមកលើកន្ទេលសង្ស័យ ក៏នាំគ្នាឆោឡោស្រែករួចរាយការណ៍ដល់ប៉ូលិសរួចហើយនាំគ្នាចុះរក ក្នុងទឹក ទើបប្រទះឃើញសពនារីរងគ្រោះស្រង់មកដាក់លើផ្ទះទឹក ។ សាក្សីបន្តទៀតថា បើតាមភិនភាគសពនារីរងគ្រោះ អាចជាមនុស្សមកពីឆ្ងាយ មិនមែនជាអ្នកស្រុកបាទីនេះទេ ។
សូមរំលឹកឡើងវិញថា នារីម្នាក់ដែលត្រូវឃាតករកាប់សម្លាប់រួចទម្លាក់ចូលទឹក បង្កឱ្យភ្ញាក់ផ្អើលកាលពីវេលាម៉ោង១០ និង៣០នាទីព្រឹកថ្ងៃទី២០ កក្កដា ២០១៦ ស្ថិតនៅមណ្ឌលទេសចរណ៍ទន្លេបាទី ក្នុងភូមិទន្លេបាទី ឃុំក្រាំងធ្នង់ ស្រុកបាទីខេត្តតាកែវ មុនដំបូងនោះ គឺគេបានឃើញនារីរងគ្រោះ និងនារីម្នាក់ទៀត (ជនសង្ស័យ) ជិះម៉ូតូឌុបគ្នាមកអង្គុយលេងលើផ្ទះទឹកតែ២នាក់ទេ (នៅកន្លែងកើតហេតុ) ដែលករណីនេះ ហាក់ដូចជាឃាតករបានរៀបចំគម្រោងទុក រួចជាស្រេចហើយ ៕
ចែករំលែកព័តមាននេះ