កម្មកររោងចក្រដេរកាបូបដួលសន្លប់ជាបន្តបន្ទាប់រហូតដល់ជិត៨០នាក់
- តាកែវ
កម្មកររោងចក្រដេរកាបូបយីហោ «ហាធ័រ» ដែលមានទីតាំងនៅក្នុងភូមិចមពល ឃុំពពេល ស្រុកត្រាំ កក់ ចំនួន៧៩នាក់ បានដួលសន្លប់ជាបន្តបន្ទាប់
កម្មកររោងចក្រដេរកាបូបយីហោ «ហាធ័រ» ដែលមានទីតាំងនៅក្នុងភូមិចមពល ឃុំពពេល ស្រុកត្រាំ កក់ ចំនួន៧៩នាក់ បានដួលសន្លប់ជាបន្តបន្ទាប់
ខេត្តតាកែវ ៖ កម្មកររោងចក្រដេរកាបូបយីហោ «ហាធ័រ» ដែលមានទីតាំងនៅក្នុងភូមិចមពល ឃុំពពេល ស្រុកត្រាំ កក់ ចំនួន៧៩នាក់ បានដួលសន្លប់ជាបន្តបន្ទាប់ កាលពីព្រឹកថ្ងៃទី៨ ខែកុម្ភៈ ឆ្នាំ២០២២ និងបង្កឱ្យមានការចលា ចលនៅក្នុងរោងចក្រ ដែលមានកម្មកររាប់រយនាក់ភ័យស្លន់ស្លោ ។ នេះជាលើដំបូងហើយនៅដើមឆ្នាំ២០២២នេះ ដែលមានកម្មករដួលសន្លប់ ដែលហេតុការណ៍បែបនេះហាក់មានការថយចុះកាលពីចុងឆ្នាំ២០២១ ។
បើតាមលោក ម៉ឹង វីរីយា ប្រធានមន្ទីរការងារ និងបណ្ដុះបណ្ដាលវិជ្ជាជីវៈខេត្ត បានថ្លែងថា ពិតជាមានកម្មករដួលសន្លប់មែននៅរោងចក្រខាងលើ តែមូលហេតុនៃការដួលសន្លប់នេះ លោកមិនទាន់ដឹងពិតប្រាកដនៅឡើយទេ គ្រាន់តែកម្មករខ្លះបានប្រាប់ពីអាការៈថា ពួកគេមានសភាពធេងធោង និងវិលមុខរកកល់ដួលពេលកំពុងតែធ្វើការ ។
លោកប្រធានមន្ទីរបន្តថា កម្មករដែលដួលសន្លប់ទាំងអស់ ត្រូវបានអាជ្ញាធរបញ្ជូនទៅព្យាបាលនៅមន្ទីរពេទ្យបង្អែកអង្គរកា ហើយស្ថានភាពជំងឺរបស់ពួកគេបានវិលត្រឡប់មករកសភាពល្អប្រសើរជាបណ្ដើៗវិញហើយ ហើយអាជ្ញាធរ មន្ត្រីសុខាភិបាល និងមន្ត្រីមន្ទីរការងារកំពុងតែចុះទៅដល់ទីតាំងរោងចក្រ ដើម្បីពិនិត្យរកមើលរកមូលហេតុនៃការដួលសន្លប់នេះ។
លោកវេជ្ជបណ្ឌិត នុត ស៊ីណាត ប្រធានមន្ទីរសុខាភិបាល ក៏បានថ្លែងអោយដឹងថា ការដួលសន្លប់របស់បងប្អូនកម្មករនៅរោងចក្រខាងលើ គឺបណ្ដាលមកពីធំក្លិនជ័រនៅជិតរោងចក្រ ហើយបញ្ហានេះ មន្ត្រីបានណែនាំអោយខាងរោងចក្រយកជ័រដែលធំក្លិនចេញពីជិតទីតាំងរោងចក្រហើយ។
បន្ទាប់ពីកើតហេតុករណីកម្មករដួលសន្លប់ភ្លាមៗ សាខាកាកបាទក្រហមខេត្តតាកែវ មន្ត្រីក៏បានចុះសួរសុខទុក្ខ និងនាំយកអំណោយមួយចំនួនរបស់សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ចែកជូនបងប្អូនកម្មករដែលកំពុងសម្រាកព្យាបាលនៅមន្ទីរពេទ្យបង្អែកអង្គរកា ស្ថិតក្នុងស្រុកត្រាំកក់ផងដែរ។ ហើយមកដល់ពេលនេះ កម្មករ កម្មការីនី បានធូរស្រាលត្រឡប់ទៅផ្ទះវិញអស់ហើយមកដល់ល្ងាចនេះ៕
ចែករំលែកព័តមាននេះ