ប្រទេសកូរ៉េខាងត្បូង និងសហរដ្ឋអាមេរិក មិនគ្រោងដាក់ពង្រាយប្រព័ន្ធការពារប្រឆាំងមីស៊ីល ដែលអាចបា.ញ់បានខ្ពស់ THAAD មួយទៀតនៅលើទឹកដីកូរ៉េខាងត្បូងឡើយ
ប្រទេសកូរ៉េខាងត្បូង ៖ ប្រទេសកូរ៉េខាងត្បូង និងសហរដ្ឋអាមេរិក មិនគ្រោងដាក់ពង្រាយប្រព័ន្ធការពារប្រឆាំងមីស៊ីល ដែលអាចបាញ់បានខ្ពស់ THAAD មួយទៀតនៅលើទឹកដីកូរ៉េខាងត្បូងឡើយ។ នេះជាការអះអាងកាលពីថ្ងៃទី៧ ខែកុម្ភៈ របស់ក្រសួងការពារប្រទេសកូរ៉េខាងត្បូង ក្នុងពេលមានការដេញដោលគ្នា លើបញ្ហានេះ ខណៈជិតដល់ការបោះឆ្នោតប្រធានាធិបតីកូរ៉េខាងត្បូងនាថ្ងៃទី៩មីនាខាងមុខនេះ។
អ្នកនាំពាក្យក្រសួងការពារប្រទេសកូរ៉េខាត្បូង លោក BOO SEUG CHAN បានគូសបញ្ជាក់ពីរឿងនោះ បន្ទាប់ពីសេចក្ដីរាយការណ៍មួយរបស់សារព័ត៌មានដែលថា មានការស្រាវជ្រាវមួយចូលរួមដោយរដ្ឋាភិបាលកាលពីឆ្នាំ២០១៥ ដែលលើកពីភាពចាំបាច់សម្រាប់កងទ័ពកូរ៉េខាងត្បូង ធានាផលិតប្រព័ន្ធប្រឆាំងមីស៊ីលបែបធុន THAAD ដោយខ្លួនឯងផ្ទាល់ បន្ថែមលើប្រព័ន្ធបច្ចុប្បន្នដែលប្រើដោយកងទ័ពអាមេរិកនៅកូរ៉េខាងត្បូង។
អ្នកនាំពាក្យរូបនោះបន្តទៀតថា ទាក់ទិននឹងការដាក់ពង្រាយប្រព័ន្ធ THAAD មួយទៀត កូរ៉េខាងត្បូង និងសហរដ្ឋអាមេរិក មិនគ្រោងឲ្យមានការដាក់ពង្រាយថ្មីឡើយ។ លោកគូសបញ្ជាក់ថា កងទ័ពកូរ៉េខាងត្បូង កំពុងតែផលិតប្រព័ន្ធមីស៊ីលស្ទាក់កម្ទេចរបស់ខ្លួនផ្ទាល់ដែលមានឈ្មោះថា L-SAM សម្រាប់ជាខែលការពារប្រឆាំងមីស៊ីលពហុស្រទាប់។
ប្រព័ន្ធ THAAD បានក្លាយជាបញ្ហាដ៏ក្ដៅគគុកមួយ ក្នុងដំណាក់កាលនៃការបោះឆ្នោតប្រធានាធិបតី ខណៈលោក YOON SUK YEOL បេក្ខជនប្រធានាធិបតីនៃគណបក្សអំណាចប្រជាជន ជាគណបក្សប្រឆាំងធំជាងគេ បានសន្យា កាលពីខែមុនថា នឹងធ្វើការសម្រាប់ការដាក់ពង្រាយប្រព័ន្ធ THAAD មួយបន្ថែមទៀត បន្ទាប់ពីការសាកល្បងមីស៊ីលមួយចំនួនរបស់កូរ៉េខាងជើង។ ចំណែកលោក LEE JAE MYUNG បេក្ខជនគណបក្សប្រជាធិបតេយ្យកំពុងកាន់អំណាច បានព្រមានប្រឆាំងការដាក់ពង្រាយប្រព័ន្ធនោះថ្មីមួយទៀត ដោយលើកឡើងថា ការធ្វើបែបនោះនឹងអាចបណ្ដាល ឲ្យមានភាពតានតឹងជាមួយចិន ដែលជាដៃគូពាណិជ្ចកម្មធំបំផុតរបស់កូរ៉េខាងត្បូង៕ ដកស្រង់ចេញពីវេបសាយ ៖ yna
ចែករំលែកព័តមាននេះ