ពលរដ្ឋក្រុងដូនកែវ បាននិយាយថា ការគ្រប់គ្រងសំរាមរបស់ក្រុមហ៊ុនប្រមូលសំរាមក្នុងក្រុង ខ្វះលទ្ធភាពគ្រប់គ្រាន់ ក្រោយកត្តាមនុស្សមានការកើនឡើងទុកឲ្យសំរាមហូរហៀរពេញផ្ទះ
ខេត្តតាកែវ ៖ ពលរដ្ឋក្រុងដូនកែវ បាននិយាយថា ការគ្រប់គ្រងសំរាមរបស់ក្រុមហ៊ុនប្រមូលសំរាមក្នុងក្រុង ខ្វះលទ្ធភាពគ្រប់គ្រាន់ ក្រោយកត្តាមនុស្សមានការកើនឡើងទុកឲ្យសំរាមហូរហៀរពេញផ្ទះតែម្តង។
ហើយប្រជាពលរដ្ឋរស់នៅក្នុងក្រុងដូនកែវ ក៏បាននាំគ្នានិយាយបន្តថា ការប្រមូលសំរាមតាមផ្ទះរបស់ក្រុមហ៊ុនប្រមូលសំរាមលោកស្រី លឹម សុខា ហាក់បីដូចមានភាពយឺតយ៉ាវ ដោយនៅតាមផ្ទះនីមួយៗក្នុងក្រុងដូនកែវ មានរយៈពេលចាប់ពី៥ថ្ងៃទៅមួយសប្តាហ៍ ទើបមកប្រមូលម្តង ដែលធ្វើឲ្យសំរាមមួយចំនួន ខ្លះមានសភាពស្អុយរលួយរហូតដង្កូចវារចេញ បង្កផលប៉ះពាល់ដល់សុខភាព និងសណ្ដាប់ធ្នាប់សាធារណៈផងដែរ ។
ពួកគាត់ក៏បាននាំគ្នានិយាយបន្តទៀតថា មួយរយៈដើមឆ្នាំ២០២២ កន្លងមកនេះ សំរាមតាមផ្ទះក៏មានការកើនឡើង និងសំរាមនៅក្នុងផ្សារធំតាកែវ ក៏កាន់តែមានការកើនឡើងជាបន្តបន្ទាប់ ដោយសារតែការប្រមូលសំរាមរបស់ក្រុមហ៊ុន លោកស្រី លឹម សុខា ហាក់បីដូចជាមានសភាពយឺតយ៉ាវ ឬអាចនិយាយបានថា ការប្រមូលសំរាមរបស់ក្រុមហ៊ុនខាងលើ មិនមានលទ្ធភាពគ្រប់គ្រាន់ក្នុងការគ្រប់គ្រងសំរាមនេះឲ្យបានល្អស្អាត ដែលជាហេតុបង្កឲ្យមានការជះក្លិនមិនល្អ និងប៉ះពាល់ដល់សុខភាពជាយថាហេតុ ដោយសារតែក្នុងក្រុងដូនកែវ មានក្រុមហ៊ុនប្រមូលសំរាមតែមួយ ។
បញ្ហាខាងលើនេះដែរ បងប្អូនប្រជាពលរដ្ឋរស់នៅក្នុងក្រុងដូនកែវ បានសូមអំពាវនាវដល់អាជ្ញាធរក្រុងដូនកែវ មេត្តាពិនិត្យ និងជួយជំរុញដល់ក្រុមហ៊ុនប្រមូលសំរាមនៅក្នុងក្រុងដូនកែវ ពន្លឿនការប្រមូលសំរាមនេះឲ្យបានឆាប់ជាងមុន ដោយមិនទុកសំរាមចូលមានរយៈពេលយូរ ធ្វើឲ្យសំរាមមានសភាពស្អុយរលួយ និងជះក្លិនមិនល្អ បង្កឱ្យមានផលប៉ះពាល់ផ្សេងៗ ដើម្បីរក្សានូវសោភ័ណ្ឌភាពទីក្រុងស្អាត និងសុខុមាលភាពរបស់បងប្អូនប្រជាពលរដ្ឋរបស់យើងផងដែរ ។
ព័ត៌មានពិស្តារនឹងមានផ្សាយជូននៅលើកាសែតកោះសន្តិភាព ។
ចែករំលែកព័តមាននេះ