រាជធានីភ្នំពេញ ៖ អ្វីទៅដែលជាការគំរាមកើតមិនគ្រប់ខែ? ឬក៏អាចហៅថា ការសម្រាលកូនមុនកំណត់ (ជាង៣សប្តាហ៍នៃថ្ងៃកំណត់គ្រប់ខែ) មិនមែនជាជំងឺនោះទេ ប៉ុន្តែវាជាបញ្ហាប្រឈមដែលអាចកើតមានលើស្ត្រីដែលកំពុងពពោះ
រាជធានីភ្នំពេញ ៖ អ្វីទៅដែលជាការគំរាមកើតមិនគ្រប់ខែ? ឬក៏អាចហៅថា ការសម្រាលកូនមុនកំណត់ (ជាង៣សប្តាហ៍នៃថ្ងៃកំណត់គ្រប់ខែ) មិនមែនជាជំងឺនោះទេ ប៉ុន្តែវាជាបញ្ហាប្រឈមដែលអាចកើតមានលើស្ត្រីដែលកំពុងពពោះ ហើយវាអាចបង្កគ្រោះថ្នាក់ដល់សុខភាពម្តាយនិងទារក ។ នេះជាប្រសាសន៍លោកស្រីវេជ្ជបណ្ឌិត ឈុន សមសោភា ប្រធានផ្នែកសម្ភពនិងរោគស្ត្រីនៃមន្ទីរពេទ្យកាល់ម៉ែតក្នុងឱកាសផ្តល់បទសម្ភាសន៍ជាមួយអ្នកសារព័ត៌មាន ។
លោកស្រីវេជ្ជបណ្ឌិតឈុន សមសោភា បានថ្លែងឲ្យដឹងទៀតថា មូលហេតុដែលកូនកើតមិនគ្រប់ខែត្រូវបានចែកចេញជាបីដំណាក់កាលធំៗ៖
១-មូលហេតុបណ្តាលឲ្យកូនគំរាមកើតមិនគ្រប់ខែមកពី ការជក់បារី និងពិសាគ្រឿងស្រវឹង ,ការលើសឬស្រក់ទម្ងន់ខ្លាំងក្នុងអំឡុងពេលមានផ្ទៃពោះ, ការពិនិត្យសុខភាពមិនទៀងទាត់, ការប្រើប្រាស់ថ្នាំដោយគ្មានវេជ្ជបញ្ជាត្រឹមត្រូវ, ម្តាយដែលមានបញ្ហាសុខភាពដូចជា សម្ពាធឈាមខ្ពស់, ជំងឺព្រាយក្រឡាភ្លើង, ជំងឺទឹកនោមផ្អែម, ជំងឺឈាមកកឬការឆ្លងរោគ, មានផ្ទៃពោះឆាប់ពេកបន្ទាប់ពីមានកូន, សមាជិកនៃគ្រួសារដែលមានប្រវត្តិកូនគំរាមមិនគ្រប់ខែ ។
២-រោគសញ្ញាដែលអាចស្តែងចេញ ៖ ស្បូនកន្ទ្រាក់ចង្កោងរឹង (មានអារម្មណ៍រឹងនៅក្រោមក្បាលពោះ), រោយចង្កេះនិងណែនធ្ងន់លើថ្ងាស់ក្រោមពោះ, លីងចង្កេះនិងរោយចង្កេះខ្លាំង, អាចបែកទឹកភ្លោះដោយឯកឯងគ្មានការឈឺពោះ, មានទឹករំអិលធ្លាក់មកព្រាលក្រហមខុសពីធម្មតា ។
៣-ផលប៉ះពាល់ ៖ ទារកអាចស្លាប់,សុខភាពកូនមិនល្អ, មានបញ្ហាសម្រាប់ការលូតលាស់របស់ទារក (ប្រព័ន្ធរំលាយអាហារ,ការលូតលាស់ខួរក្បាល, ប្រព័ន្ធដង្ហើម), ម្តាយអាចមានការគំរាមសម្រាលមិនគ្រប់ខែលើកក្រោយទៀត, អាចរលាកតម្រងនោម, រលាកស្បូន ,បញ្ហាផ្លូវចិត្ត (ក្តីបារម្មណ៍ចំពោះទារក) ។ វិធីការពារ: ពិនិត្យនិងតាមដានផ្ទៃពោះឲ្យបានទៀងទាត់ កុំធ្វើការងារធ្ងន់និងហួសកម្លាំង ហាមធ្វើដំណើរផ្លូវឆ្ងាយក្នុងអំឡុងមានផ្ទៃពោះ ពុំគួរមានកូនច្រើន និងញឹកញាប់ ជៀសវាងការរំលូតកូនដោយគ្មានបច្ចេកទេសត្រឹមត្រូវ បើមានអាការមិនប្រក្រតីដូចជា ក្តៅខ្លួន ធ្លាក់ឈាម គួរតែឆាប់រួសរាន់មកមន្ទីរពេទ្យកាល់មែ៉ត ដើម្បីពិនិត្យផ្ទៃពោះជាមួយវេជ្ជបណ្ឌិតជំនាញ ក្នុងការរាវរកសញ្ញាគ្រោះថ្នាក់ ដើម្បីអាចធ្វើការព្យាបាល ឬអន្តរាគមន៍វេជ្ជសាស្ត្រទាន់ពេលវេលា ។
លោកស្រីវេជ្ជបណ្ឌិត ឈុន សមសោភា ប្រធានផ្នែកសម្ភពនិងរោគស្ត្រីនៃមន្ទីរពេទ្យកាល់ម៉ែតបានបញ្ជាក់ថា ក្នុងចំណោមកូនកើត១១៦៨៧នាក់ នៅឆ្នាំ២០១៥ មានកូនកើតមិនគ្រប់ខែចំនួន៤១១នាក់ ក្នុងនោះមានតែ៨នាក់ប៉ុណ្ណោះ ដែលគ្រូពេទ្យមិនបានសង្គ្រោះស្មើ២% ៕
ចែករំលែកព័តមាននេះ