ខេត្តតាកែវ ៖ ប្រជាពលរដ្ឋរស់នៅជុំវិញបឹងតុំក្រុងដូនកែវថា មកដល់សម័យនេះហើយ នៅតែមានអ្នកចាក់ដីរំលោភយកដីបឹងធម្មជាតិទៀត ខណៈដែលប្រមុខរាជរដ្ឋាភិបាលលោកបានធ្វើការព្រមានខ្លាំងៗ និងចាប់ខ្លួនអ្នកពាក់ព័ន្ធដែលរំលោភយកដីព្រៃលិចទឹក និងរំលោភយកដីបឹងធម្មជាតិជាបន្តបន្ទាប់ហើយ នៅចុងឆ្នាំ២០២១កន្លងទៅនេះ តែមកដល់ពេលនេះទីតាំងដីបឹងតុំ…
ខេត្តតាកែវ ៖ ប្រជាពលរដ្ឋរស់នៅជុំវិញបឹងតុំក្រុងដូនកែវថា មកដល់សម័យនេះហើយ នៅតែមានអ្នកចាក់ដីរំលោភយកដីបឹងធម្មជាតិទៀត ខណៈដែលប្រមុខរាជរដ្ឋាភិបាលលោកបានធ្វើការព្រមានខ្លាំងៗ និងចាប់ខ្លួនអ្នកពាក់ព័ន្ធដែលរំលោភយកដីព្រៃលិចទឹក និងរំលោភយកដីបឹងធម្មជាតិជាបន្តបន្ទាប់ហើយ នៅចុងឆ្នាំ២០២១កន្លងទៅនេះ តែមកដល់ពេលនេះទីតាំងដីបឹងតុំ ស្ថិតនៅសង្កាត់រកាក្រៅ ក្រុងដូនកែវ ខេត្តតាកែវ ដែលជាបឹងធម្មជាតិតាំងពីយូរ បានចាប់ផ្តើមរួមតូចជាបន្តបន្ទាប់ ស្របពេលដែលអ្នកមានលុយ មានអំណាចមួយចំនួន បានសម្លឹងឃើញផលចំណេញពីអចលនទ្រព្យកំពុងមានសន្ទុះរីកចម្រើនខ្លាំង ដែលអាចនិយាយបានថា (លុយលើគោក) បាននាំគ្នាធ្វើសកម្មភាពចាក់ដីលុបយកដីបឹងរបស់រដ្ឋនៅពេលយប់ និងបន្តដាំដើមឈើធំៗ និងដើមចេក បន្លំភ្នែកពីដីថ្មីឱ្យប្រែក្លាយជាដីចាស់មានចំការដើមចេកធំៗរួចជាស្រេច ។
ប្រជាពលរដ្ឋរស់នៅតំបន់បឹងតុំ ដែលសូមមិនបង្ហាញឈ្មោះបាននាំគ្នានិយាយថា ដីបឹងតុំដែលអ្នកមានអំណាចមានលុយកំពុងលួចចាក់ដីលុប និងដាំដើមឈើបន្លំភ្នែកនោះ គឺនៅតែធ្វើជាបន្តបន្ទាប់ដោយពួកគាត់ប្រើរូបភាពចាក់ដី នៅពេលយប់ ។ ពួកគាត់បន្តថា សម័យនេះអ្នកដែលចាក់ដីលុបយកបឹងធម្មជាតិបាន មិនមែនប្រជាពលរដ្ឋធម្មតាធ្វើទៅបាននោះទេ គឺសុទ្ធសឹងតែអ្នកមានអំណាច អ្នកមានលុយ ទើបអាចចាក់លុបយកដីបឹងធម្មជាតិនេះបានដោយសុវត្តិភាព ។
ជុំវិញបញ្ហានេះ លោក កង អាណាន់ អភិបាលក្រុងដូនកែវបានបញ្ជាក់ឲដឹងថា រូបលោកនៅមិនទាន់ទទួលបាន
ព័ត៌មាននេះទេ ចំពោះការចាក់ដីលុបបឹងតុំខាងលើ ហើយលោកនិងចុះពិនិត្យលើការលើកឡើងខាងលើនេះពីប្រជាពលរដ្ឋ ដែលពាក់ព័ន្ធជាមួយនិងអ្នកដែលចាក់ដីលុបបឹងតុំ ដែលជាបឹងធម្មជាតិរបស់រដ្ឋ ។ ដោយឡែក លោក ប៊ុន ហ៊ួរ ប្រធានមន្ទីរធនធានទឹក និងឧតុនិយមខេត្តតាកែវ លោកក៏បានឲដឹងដែរថា ករណីលួចចាក់ដីរំលោភយកដីបឹងនេះ លោកនិងចុះពិនិត្យ រួចនិងផ្តល់ព័ត៌មានមកឱ្យភ្នាក់ងារសារព័ត៌មានបានដឹងច្បាស់វិញពីបញ្ហានេះ តែលោកក៏បានបញ្ជាក់ផងដែរថា ចំពោះការចាក់ដីលុបបឹងតុំនេះ ឮថាអ្នកចាក់ដីលុបប្រើរូបភាពលួចចាក់ដីលុបបឹងនៅពេលយប់ ។
ព័ត៌មានបន្ថែមកោះសន្តិភាពនឹងមានផ្សាយជូនបន្ត ។
ចែករំលែកព័តមាននេះ