នៅសុខៗកើតដង្កូវចម្លែក ពាសពេញវិទ្យាល័យ
ខេត្តឧត្តរមានជ័យ ៖ រឿងហេតុគួរឱ្យចម្លែក ហ្វូងដង្កូវកើតពាសពេញដី និងដើមឈើក្នុងវិទ្យាល័យអន្លង់វែងធ្វើឱ្យមានការភ្ញាក់ផ្អើលដល់សិស្ស និងប្រជាពលរដ្ឋ។
ខេត្តឧត្តរមានជ័យ ៖ រឿងហេតុគួរឱ្យចម្លែក ហ្វូងដង្កូវកើតពាសពេញដី និងដើមឈើក្នុងវិទ្យាល័យអន្លង់វែងធ្វើឱ្យមានការភ្ញាក់ផ្អើលដល់សិស្ស និងប្រជាពលរដ្ឋ។ ហ្វូងសត្វដង្កូវធំៗជាច្រើនប្រភេទ នៅក្នុងវិទ្យាល័យ អន្លង់វែង ស្ថិតនៅក្នុងទីរួមស្រុកអន្លង់វែង ខេត្តឧត្តរមានជ័យ ហ្វូងសត្វដង្កូវដែលនៅពាលពេញទីធ្លា និងបានស៊ីបំផ្លាញស្លឹកឈើក្នុងសាលារៀន បានបង្កការភ្ញាក់ផ្អើល និងមានការរំខានដល់សិស្សមានការភ័យខ្លាច មិនហ៊ានចេញអង្គុយលេង នៅក្នុងទីធ្លាសាលារៀន។
លោក ស្រេង កុមារ ជានាយកវិទ្យាល័យ អន្លង់វែង បានរៀបរាប់ឱ្យដឹងនៅថ្ងៃទី១៤ ខែកក្កដា ឆ្នាំ២០១៦នេះថា មិនដឹងជាហ្វូងដង្កូវនេះ កើតមកពីណានោះទេ ហើយនៅពេលឃើញកូនសិស្សចាប់ដង្កូវបន្លាចគ្នានៅក្នុងទីធ្លាសាលា លោកក៏បានទៅមើលឃើញមានសត្វដង្កូវ តែក៏មិនច្រើនណាស់ណាដែរ ដោយលោកក៏មិនបានចាប់អារម្មណ៍ ហើយក៏មិនហ៊ានបាញ់ថ្នាំសម្លាប់ដែរ ព្រោះខ្លាចប៉ះពាល់កូនសិស្សកំពុងតែរៀន។
ហើយរយៈពេលតែ ៥ថ្ងៃ រហូតដល់ថ្ងៃទី១៤ ខែកក្កដានេះ សត្វដង្កូវក៏កើតឡើងជាច្រើន មាននៅគ្រប់ទីកន្លែង នៅតាមវាលស្មៅ និងនៅតាមដើមឈើ រហូតនៅតាមបង់អង្គុយ ក្នុងទីធ្លាសាលារៀន ក៏មានសត្វដង្កូវ នៅវាពាលពេញ ធ្វើឱ្យកូនសិស្ស និងលោកគ្រូអ្នកគ្រូ ក៏មិនហ៊ានទៅអង្គុយលេង។ លោកនាយកបន្តថា ដោយសារតែមានហ្វូងដង្កូវច្រើនពេក លោកបានប្រាប់កូនសិស្ស ហាមមិនឱ្យទៅចាប់លេង ឬប៉ះពាល់វា ហើយសូម្បីតែលោកផ្ទាល់ក៏មានការញញើត មិនហ៊ានទៅមើលដែរ ព្រោះសត្វសដង្កូវច្រើនពេក។ ចំណែកដើមឈើ និងដើមផ្កា នៅក្នុងសាលា ក៏ត្រូវសត្វដង្កូវ បានស៊ីបំផ្លាញស្លឹកគ្មានសេសសល់ដែរ។
នៅពេលព្រឹក និងនៅពេលល្ងាច សត្វដង្កូវ វាចុះពីលើដើមឈើ នៅពាសពេញទីធ្លាសាលា ទាំងហ្វូងៗ ដែលធ្វើឱ្យលោកគ្រូអ្នកគ្រូ និងសិស្ស ស្ទើរតែមិនហ៊ានដើរកាត់ ហើយមានសិស្សស្រីខ្លះ មានការភ័យខ្លាចចំពោះសត្វដង្កូវ ក៏មិនហ៊ានមករៀន។លោកនាយកសាលាបានបញ្ជាក់ថា កាលដំបូង នៅ៥ថ្ងៃមុន សត្វដង្កូវមានតែតិចតួចប៉ុណ្ណោះ លោកក៏មិនបានរាយការណ៍ទៅស្ថាប័នជំនាញទេ តែមិននឹកស្មានថា សត្វដង្កូវកើតច្រើនយ៉ាងនេះសោះ ហើយក្នុងសាលារៀនក៏មិនធ្លាប់មានសត្វដង្កូវច្រើននោះដែរ ទើបតែក្នុងឆ្នាំនេះ ដែលមានដង្កូវច្រើន មិនដឹងកើតមកអ្វីនោះទេ។
ចែករំលែកព័តមាននេះ