ឯកអគ្គរដ្ឋទូតចិនប្រចាំទីក្រុងវ៉ាស៊ីនតោនបានធ្វើការព្រមានថា ចិន និងអាមេរិក អាចនឹងមានជម្លោះយោធានឹងគ្នា ប្រសិនអាមេរិកជំរុញឲ្យមានឯករាជ្យរបស់កោះតៃវ៉ាន់ ។
«ខ្ញុំសូមបញ្ជាក់លើបញ្ហានេះ។ បញ្ហាតៃវ៉ាន់គឺជាប្រអប់រំសេវដ៏ធំបំផុតរវាងចិន និងអាមេរិក» ។ នេះជាការបញ្ជាក់របស់ឯកអគ្គរដ្ឋទូចិន Qin Gang ថ្លែងប្រាប់វិទ្យុអាមេរិក កាលពីថ្ងៃសុក្រម្សិលមិញនេះ។
លោកនិយាយថា«ប្រសិនអាជ្ញាធរតៃវ៉ាន់ដែលគាំទ្រដោយអាមេរិក បន្តដើរលើផ្លូវឆ្ពោះទៅរកឯករាជ្យ វាទំនងជានឹងធ្វើឲ្យចិន និងអាមេរិកមានជម្លោះយោធា»។
ជុំវិញការថ្លែងរបស់អ្នកការទូតនេះ ក្រសួងការបរទេស ក្រុមប្រឹក្សាសន្តិសុខជាតិ និងមន្ទីរបញ្ចាកោណអាមេរិកមិនទាន់មានការឆ្លើយតបឡើយ។
ការថ្លែងរបស់ឯកអគ្គរដ្ឋទូតចិនរូបនេះកើតឡើងតែប៉ុន្មានម៉ោងប៉ុណ្ណោះក្រោយពេលរដ្ឋមន្ត្រីការបរទេសអាមេរិកលោក Antony Blinken និងរដ្ឋមន្ត្រីការបរទេសចិន Wang Yi បានធ្វើការពិភាក្សាគ្នាពីវិបត្តិអ៊ុយក្រែន។
សូមរម្លឹកថា មហាយក្សចិនតែងចាត់ទុកកោះតៃវ៉ាន់គឺជាផ្នែកមួយរបស់ខ្លួន និងបានប្តេជ្ញាចិត្តរួបរួមជាមួយតៃវ៉ាន់វិញនាពេលអនាគត។ ប៉ុន្តែមេដឹកនាំតៃវ៉ាន់ប្រកាសថា តៃវ៉ាន់គឺជារដ្ឋអធិបតេយ្យភាព និងប្តេជ្ញាធ្វើអ្វីៗគ្រប់យ៉ាងដើម្បីការពារទឹកដី និងប្រជាជន។
ភាពតានតឹងរវាងចិន និងតៃវ៉ាន់កំពុងឡើងកម្តៅខ្លាំងក្នុងរយៈពេលប៉ុន្មានខែចុងក្រោយនោះ ដោយចិនបានបញ្ជូនយន្តហោះចូលក្នុងតំបន់ការពារដែនអាកាសតៃវ៉ាន់ស្ទើរតែរាល់ថ្ងៃ។
ទោះបីអាមេរិកមិនមានទំនាក់ទំនងជាផ្លូវការជាមួយកោះតៃវ៉ាន់ក្តី អាមេរិកគឺជាអ្នកគាំទ្រ និងផ្គត់ផ្គងអាវុ.ធដល់កោះតៃវ៉ាន់។
តៃវ៉ាន់បានផ្តាច់ចេញពីចិននៅក្នុងឆ្នាំ១៩៤៩ ក្រោយពេលសង្គ្រាមស៊ីវិល៕ (យោងតាមប្រភព៖ Reuters)
ចែករំលែកព័តមាននេះ