ឆេះឃ្លាំងអេតចាយ នៅព្រៃនប់ ខូចខាតសម្ភារៈអស់ជាច្រើន
- ព្រះសីហនុ
ខេត្តព្រះសីហនុ៖ គ្រោះអគ្គិភ័យ បានឆេះឃ្លាំងអេតចាយ សង់អំពីដែក ប្រក់ស័ង្កសី នៅស្រុកព្រៃនប់ បណ្តាលឲ្យខូចខាតសម្ភារៈអស់ជាច្រើន។ ហេតុការណ៍នោះ កើតឡើង កាលពីម៉ោង…
ខេត្តព្រះសីហនុ៖ គ្រោះអគ្គិភ័យ បានឆេះឃ្លាំងអេតចាយ សង់អំពីដែក ប្រក់ស័ង្កសី នៅស្រុកព្រៃនប់ បណ្តាលឲ្យខូចខាតសម្ភារៈអស់ជាច្រើន។ ហេតុការណ៍នោះ កើតឡើង កាលពីម៉ោង ១រសៀល ថ្ងៃទី២៧ ខែមករា ឆ្នាំ២០២២ នៅភូមិចំណោតរាម ឃុំបិតត្រាំង ស្រុកព្រៃនប់ ខេត្តព្រះសីហនុ។
លោកវរសេនីយ៍ទោ អ៊ួង វុទ្ធី អធិការនគរបាលស្រុកព្រៃនប់ អោយដឹងថា ឃ្លាំងអេតចាយ ១ខ្នង ដែលឆេះនោះ សង់អំពីដែក ប្រក់ស័ង្កសី មានទទឹង ៩ម៉ែត្រ បណ្តោយ ៣៦ម៉ែត្រ ជាកម្មសិទ្ធិរបស់ឈ្មោះ នួន សារឹម ភេទប្រុស អាយុ ៣៥ឆ្នាំ មានទីលំនៅ ក្នុងភូមិ/ឃុំកើតហេតុខាងលើ។ ករណីនេះ គេមិនទាន់ដឹងមូលហេតុច្បាស់លាស់នៅឡើយទេ។
លោកអធិការ បានបន្តថា តាមការបំភ្លឺរបស់ឈ្មោះ ហឹង សោភី ត្រូវជាកូនម្ចាស់ឃ្លាំង បានបញ្ជាក់ថា មុនពេលកើតហេតុ គាត់កំពុងតែហូបបាយនៅផ្ទះរបស់នាង នៅកន្លែងផ្សេងទៀត នៅជិតផ្ទះកើតហេតុ។ ពេលនោះ រូបគាត់ក៏បានដើរចេញពីក្រៅផ្ទះ ហើយឃើញមានផ្សែង កំពុងហ៊ុយចេញពីឃ្លាំងអេតចាយរបស់គាត់ ភ្លាមនោះ គាត់បានជិះម៉ូតូទៅមើល ពេលមកដល់ ក៏បានឃើញមានអគ្គិភ័យឆាបឆេះរួចហើយ បន្ទាប់មក ក៏បានស្រែកហៅអ្នកនៅជិតខាង មកជួយពន្លត់។ រួចគាត់ ក៏បានរាយការណ៍ប្រាប់សមត្ថកិច្ច ដើម្បីជួយពន្លត់តែម្ដង។
លោកអធិការបានបន្តថា តាមការបំភ្លឺរបស់ឈ្មោះ លី ប៊ុនឡាយ ភេទប្រុស អាយុ ៥១ឆ្នាំ មុខរបរជនពិការ ជាប្រជាពលរដ្ឋ បានបញ្ជាក់ថា នៅមុនពេលកើត គាត់កំពុងដេកនៅក្នុងផ្ទះ ប៉ុន្ដែដេកមិនទាន់លក់ទេ រួចក៏បានលឺសូរសំឡេងខ្យល់វ៉ូៗ ហើយឃើញមានផ្សែងចូលមកក្នុងផ្ទះរបស់គាត់ជាច្រើន បន្ទាប់មក គាត់ក៏ស្រែកហៅអោយគេជួយ ប៉ុន្ដែគ្មានអ្នកលឺទេ លុះមួយសន្ទុះក្រោយមក ស្រាប់តែក្មួយរបស់ខ្ញុំឈ្មោះ ភាស់ បានចូលទៅបីគាត់ ចេញពីក្នុងផ្ទះតែម្ដង។
ឈ្មោះ នន ឌុល ភេទប្រុស អាយុ៣៨ឆ្នាំ មុខរបរកម្មករសំណង់ បានបញ្ជាក់ថា នៅមុនពេលកើត គាត់កំពុងអង្គុយហូបបាយនៅផ្ទះ ក៏បានឃើញផ្សែងហ៊ុយចេញពីផ្ទះកើតហេតុ រួចគាត់ទាញទុយោបាញ់ទឹក ដើម្បីជួយពន្លត់។
ករណីអគ្គិភ័យខាងលើ មិនបណ្តាលអោយមានគ្រោះថ្នាក់ដល់មនុស្សទេ។ តែខូចខាតសម្ភារៈ រួមមាន ១.ម៉ាស៊ីនគ្រីបអេតចាយចំនួន ០១គ្រឿង ២.ក្រដាស់ កាតុង នឹង ក្រដាស់បំពង់ ប្រហែល១៥តោន ៣.ប៊ីដុង ជ័រចំនួន ១០០០កាដុង ៤.ថង់ផ្លាស្ទីក ៣តោន ៥.សំឡីឡែន ចំនួន ៣តោន ៦.ក្រណាត់ប្រហែល ២តោន។
ភ្លាមៗ កម្លាំងរបស់អធិការដ្ឋាននគរបាលស្រុកព្រៃនប់ ដឹកនាំដោយលោកអធិការផ្ទាល់ បានយករថយន្តពន្លត់អគ្គិភ័យរបស់អធិការដ្ឋាន ចំនួន ០១គ្រឿង រថយន្ដពន្លត់អគ្គិភ័យស្នងការដ្ឋាន ចំនួន ០៤គ្រឿង និង រថយន្ដពន្លត់អគ្គិភ័យ ង៧០ ចំនួន ០២គ្រឿង បាញ់ទឹកអស់ចំនួន ១២ រថយន្ត រលត់ទាំងស្រុង៕ ហ៊ុយ ចាន់ធួន
ចែករំលែកព័តមាននេះ