ទីក្រុងម៉ូស្គូ ៖ ចំណាត់ការនេះកើតឡើងនៅពេលដែលក្រុងម៉ូស្គូ កំពុងរង់ចាំការឆ្លើយតបចំពោះកិច្ចពិភាក្សា ដែលបានធ្វើឡើងជាមួយសហរដ្ឋអាមេរិក ក្នុងកិច្ចខិតខំប្រឹងប្រែង ដើម្បីកាត់បន្ថយហានិភ័យ នៃជម្លោះយោធា នេះបើយោងតាម សារព័ត៌មាន RT របស់រុស្ស៊ី ចុះផ្សាយនៅថ្ងៃទី២៦ មករា ២០២២នេះ ។
កងនាវាចម្បាំង និងនាវាគាំទ្រ របស់រុស្ស៊ីជាង ២០គ្រឿង បានចេញដំណើរសម្រាប់សមយុទ្ធ នៅសមុទ្រខ្មៅ ចំពេលមានភាពតានតឹងកើនឡើង ជាមួយអង្គការណាតូ នៅអឺរ៉ុបខាងកើត ។
ក្រសួងការពារជាតិ នៅទីក្រុងមូស្គូ បានបញ្ជាក់កាលពីថ្ងៃពុធនេះថា ក្រុមកងនាវា ដែលរួមមាន ៖ នាវាចម្បាំង កងនាវាកាំជ្រួច នាវាបោសសម្អាតមីន និងនាវាវាយប្រហារតាមអាកាស បានចាកចេញពីកំពង់ផែ Sevastopol និងកំពង់ផែ Novorossiysk នៅឆ្នេរសមុទ្រភាគខាងត្បូងរបស់ប្រទេស រួចហើយ ។
មន្ត្រីក្រសួងការពារជាតិ បានបញ្ជាក់ថា កងនាវាទាំងនោះ នឹងធ្វើសមយុទ្ធ និងទប់ទល់ការវាយប្រហារតាមអាកាស ក្នុងចំណោមជំនាញប្រយុទ្ធដទៃទៀត ។
វីដេអូ ដែលបានចុះផ្សាយ ដោយមេទ័ពយោធាមួយរូប បង្ហាញពីនាវាថ្មីបំផុត របស់កងទ័ពជើងទឹក ចំនួន២គ្រឿង ដែលចូលរួមសមយុទ្ធ រួមមាន ៖ នាវាចម្បាំង Admiral Essen ដែលបានចូលរួមជាមួយកងនាវា ក្នុងឆ្នាំ២០១៦ និងនាវា Corvette Ingushetia ដែលបានចាប់ផ្តើមដំណើរដំបូងរបស់ខ្លួនក្នុងឆ្នាំ ២០១៩ ។
សមយុទ្ធមួយនេះ ធ្វើឡើងក្នុងពេលដំណាលគ្នា នឹងការធ្វើសមយុទ្ធមួយទៀត ដោយកងនាវាភាគខាងជើងរបស់រុស្ស៊ី នៅសមុទ្រ Barents ប្រឆាំងនឹងផ្ទៃខាងក្រោយ ស្របពេលមានតានតឹងកាន់តែខ្លាំងឡើងរវាងរុស្ស៊ី និងអង្គការណាតូ នៅលើព្រំដែនជាមួយអ៊ុយក្រែន ។ ទីក្រុងមូស្គូ បាននឹងកំពុងស្វែងរកការធានា ជាលាយលក្ខណ៍អក្សរថា ក្រុងគៀវ នឹងត្រូវបានរារាំងពីការចូលរួមក្នុងប្លុក NATO ដែលដឹកនាំដោយសហរដ្ឋអាមេរិក ។ អគ្គលេខាធិការអង្គការណាតូ លោក Jens Stoltenberg បាននិយាយថា ការទាមទារនេះ មិនអាចទទួលយកបាន ប៉ុន្តែបានសម្តែងក្តីសង្ឃឹមថា ភាគីទាំងពីរ អាចស្វែងរកមធ្យោបាយ ដើម្បីកាត់បន្ថយស្ថានភាព ក្នុងពេលបច្ចុប្បន្ននេះ ។
មុននេះ NATO បានប្រកាសថា ខ្លួននឹងដាក់ពង្រាយកម្លាំងបន្ថែម ទៅកាន់តំបន់សមុទ្របាល់ទិក ដែលខិតទៅជិតព្រំដែនរបស់រុស្ស៊ី ជាការឆ្លើយតប និងអះអាងថា ទីក្រុងមូស្គូ អាចនឹងរៀបចំបើកការវាយលុកដោយយោធា ប្រឆាំងនឹងទីក្រុងគៀវ ។ មន្ត្រីរុស្ស៊ីបានបដិសេធជានិច្ច នូវការចោទប្រកាន់ទាំងនេះ ហើយរុស្ស៊ីបានចោទប្រកាន់ក្រុមលោកខាងលិចវិញថា បានធ្វើឲ្យវិបត្តិកាន់តែក្តៅគគុក ៕
ចែករំលែកព័តមាននេះ