រថយន្តស៊េរីទំនើបម៉ាក ALPHARD មួយគ្រឿង បានរងការខូចខាតយ៉ាងធ្ងន់ធ្ងរ ខណៈពេលដែលជាងបើកសាកដើម្បីរកមូលហេតុដែលខូច ដោយរថយន្តនេះត្រូវបានម្ចាស់យកមកទុកអោយធ្វើការជួសជុលនៅក្នុងតំបន់បឹងកក់ សុខៗក៏ស្រាប់តែ
រាជធានីភ្នំពេញ ៖ រថយន្តស៊េរីទំនើបម៉ាក ALPHARD មួយគ្រឿង បានរងការខូចខាតយ៉ាងធ្ងន់ធ្ងរ ខណៈពេលដែលជាងបើកសាកដើម្បីរកមូលហេតុដែលខូច ដោយរថយន្តនេះត្រូវបានម្ចាស់យកមកទុកអោយធ្វើការជួសជុលនៅក្នុងតំបន់បឹងកក់ សុខៗក៏ស្រាប់តែមានអណ្តាតភ្លើងឆាបឆេះ និងផ្សែងហុយទ្រលោមចេញពីម៉ាស៊ីនផ្នែកខាមុខតែម្តង បង្កឱ្យមានការភ្ញាក់ផ្អើលទៅដល់អ្នកនៅក្បែរខាងនាំគ្នាយកបំពង់ពន្លត់អគ្គិភ័យ និងរថយន្តពន្លត់អគ្គិភ័យរបស់ក្រុមហ៊ុនឯកជនមកជួយអន្តរាគមន៍បាញ់ទឹកពន្លត់ទាន់ពេលវេលានោះ។
ករណីខាងលើនេះដែរ បានកើតឡើងកាលពីវេលាម៉ោង៤ល្ងាច ថ្ងៃទី២៤ ខែមករា ឆ្នាំ២០២២ នៅចំណុចផ្លូវ R6 លើតំបន់បឹងកក់ ស្ថិតក្នុងសង្កាត់ស្រះចក ខណ្ឌដូនពេញ។
តាមប្រភពព័ត៌មានបានប្រាប់ឱ្យដឹងថា មុនពេលកើតហេតុ គេបានឃើញរថយន្តស៊េរីទំនើបម៉ាក TOYOTA ALPHARD ពណ៌ស ពាក់ស្លាកលេខភ្នំពេញ ២BD-៧៧៣០ មួយគ្រឿងខាងលើ ដែលបើកបរដោយបុរសជាជាងជួសជុលរថយន្តម្នាក់ បានបើកសាក នៅលើផ្លូវ R6 ក្នុងតំបន់បឹងកក់។
ប្រភពដដែលបន្តថា លុះបើកមកដល់ចំណុចខាងលើ ខណៈពេលដែលជាងជួសជុលរថយន្តកំពុងតែបើកសាកដើម្បីរកកន្លែងដែលខូចនោះសុខៗ ក៏ស្រាប់តែមានអណ្តាតភ្លើងឆាបឆេះ និងផ្សែងខ្មៅហុយទ្រលោមចេញពីម៉ាស៊ីនផ្នែងខាងមុខតែម្តង។
តាមប្រភពដដែលបានប្រាប់បន្តទៀតថា ពេលដែលមានអណ្តាតភ្លើងឆាបឆេះរថយន្តភ្លាមៗ បុរសជាជាងជួសជុលរថយន្តម្នាក់នោះ ក៏បានឈប់រថយន្ត និងស្រវ៉ារត់ចុះពីលើរថយន្តម៉ាក ALPHAD ដែលកំពុងតែឆេះ ទើបបង្កអោយមានការភ្ញាក់ផ្អើលកើតឡើងតែម្តង។
ប្រភពដដែលបន្តថា ភ្លាមៗនោះក៏បង្កអោយមានការភ្ញាក់ផ្អើលយ៉ាងខ្លាំងទៅដល់អ្នកមានទីលំនៅក្បែរខាង បាននាំគ្នាយកបំពង់ពន្លត់អគ្គិភ័យជាច្រើនបំពង់មកជួយបាញ់ និងមានរថយន្តពន្លត់អគ្គិភ័យចំនួន១គ្រឿងរបស់ក្រុមហ៊ុនឯកជនមួយ មកធ្វើអន្តរាគមន៍ជួយបាញ់ទឹកពន្លត់បានទាន់ពេលវេលា ដោយគ្រាន់តែឆេះខ្លោចផ្នែកម៉ាស៊ីនរងការខូចខាតផ្នែកខាងមុខតែប៉ុណ្ណោះ មិនដូច្នេះទេម្ល៉េះរថយន្តនេះនឹងត្រូវបានភ្លើងឆាបឆេះអស់ធ្ងន់ធ្ងរជាងនេះជាក់ជាមិនខានឡើយ។
ក្រោយពេលកើតហេតុ កម្លាំងសមត្ថកិច្ចមូលដ្ឋានក៏បានចុះទៅដល់កន្លែងកើតហេតុ ហើយឃើញថា វាកើតឡើងដោយសារខ្លួនឯង មិនបង្កអោយមានមនុស្សណាម្នាក់រងរបួស និងមិនប៉ះពាល់ដល់ទ្រព្យសម្បត្តិសារធារណៈនោះ ទើបអោយយករថយន្តមួយគ្រឿងទៀតមកសណ្តោងរថយន្តរងគ្រោះយកទៅធ្វើការជួសជុលវិញ។
ចែករំលែកព័តមាននេះ