ព្រះចៅអធិរាជប៉ុនផ្តល់គ្រឿងឥស្សរិយយសជូនថ្នាក់ដឹកនាំខាងទឹកស្អាតកម្ពុជាមួយរូប
- ភ្នំពេញ
រាជធានីភ្នំពេញ៖ ព្រះចៅអធិរាជជប៉ុន បានប្រគល់ឥស្សរិយយសជនជាតិបរទេស សម្រាប់និទាឃរដូវឆ្នាំ២០២២ «The Order of the Rising Sun,…
រាជធានីភ្នំពេញ៖ ព្រះចៅអធិរាជជប៉ុន បានប្រគល់ឥស្សរិយយសជនជាតិបរទេស សម្រាប់និទាឃរដូវឆ្នាំ២០២២ «The Order of the Rising Sun, Gold Rays with Neck Ribbon» ជូនដល់ឯកឧត្តម ឯក សុនចាន់ រដ្ឋមន្ត្រីប្រតិភូអមនាយករដ្ឋមន្ត្រី នាថ្ងៃទី២៤ ខែមករា ឆ្នាំ២០២២ ។
បច្ចុប្បន្ន ឯកឧត្តម ឯក សុនចាន់ បានចូលនិវត្តន៍ពីជួរមុខនៃរដ្ឋបាលទឹកស្អាត បន្ទាប់ពីបម្រើការជាអគ្គនាយករដ្ឋាករទឹកស្វយ័តក្រុងភ្នំពេញ និងបន្ទាប់មកជារដ្ឋលេខាធិការក្រសួងឧស្សាហកម្ម និងសិប្បកម្ម ក៏ពិតមែន ប៉ុន្តែឯកឧត្តមបាននិងកំពុងបន្តខិតខំយ៉ាងសកម្មដើម្បីជួយដល់តំបន់ជនបទនៅកម្ពុជា ។
នៅក្នុងពិធីបំពាក់ឥស្សរិយយសជូន ដល់ឯកឧត្តម ឯក សុនចាន់ នៅនិវាសនដ្ឋានរបស់ឯកឧត្តមឯកអគ្គរាជទូតជប៉ុន ឯកឧត្តមឯកអគ្គរាជទូតជប៉ុន មិកាមិ ម៉ាសាហ៊ីរ៉ូ បានថ្លែងថា៖ «ឯកឧត្តម ឯក សុនចាន់ មានសា្នដៃក្នុងការអភិវឌ្ឍវិស័យទឹកស្អាតក្នុងប្រទេសកម្ពុជា និងការជម្រុញទំនាក់ទំនងមិត្តភាពរវាងជប៉ុន និងកម្ពុជា» ។
ឯកអគ្គរាជទូតជប៉ុន មិកាមិ ម៉ាសាហ៊ីរ៉ូ បានបន្តថា ឯកឧត្តម ឯក សុនចាន់ បានប្រឡូកក្នុងវិស័យទឹកស្អាតនៅឆ្នាំ១៩៩៣ ដែលនៅពេលនោះ ឯកឧត្តមត្រូវបានតែងតាំងជាអគ្គនាយករដ្ឋាករទឹកក្រុងភ្នំពេញ។ ពេលនោះឯកឧត្តមិនមានចំណេះដឹងឬបទពិសោធន៍ក្នុងវិស័យទឹកស្អាតនោះទេ ចំណែកឯនៅរដ្ឋាករទឹកក៏មានបញ្ហាច្រើន ហើយបុគ្គលិកក៏បាក់ទឹកចិត្តក្នុងការបំពេញការងារ ដែលជាបរិយាកាសដ៏លំបាកមួយសម្រាប់លោក ។ ប៉ុន្តែលោកមិនបានចុះចាញ់រាថយអ្វីដែរ ឯកឧត្តមបានកែលម្អអង្គភាពរបស់រដ្ឋាករទឹកឱ្យមានភាពល្អប្រសើរជាមួយនឹងភាពដឹកនាំដ៏ពូកែរបស់លោក និងបានប្រែទីនោះទៅជាកន្លែងដែលបុគ្គលិកអាចបំពេញតួនាទីយ៉ាងសកម្ម ។
ក្នុងស្ថានភាពដ៏លំបាកនេះផងដែរ រដ្ឋាភិបាលជប៉ុនបានមកជួយក្នុងវិស័យទឹកស្អាតនៅភ្នំពេញ និងចាប់ផ្តើមកសាងគម្រោងសំណង់រូបវន្តប្រកបដោយគុណភាព និងកម្មវិធីកសាងសមត្ថភាពស្ថាប័ន្ធរបស់ JICA ដែលបានអនុវត្តដំបូងបង្អស់នៅភ្នំពេញ ក្នុងឆ្នាំ២០០៣ ដល់ឆ្នាំ២០០៦ ។
ឆ្លៀតក្នុងឱកាសនោះផងដែរ ឯកឧត្តម ឯក សុនចាន់ បានថ្លែងថា៖ «ខ្ញុំត្រូវបានអោយដឹងថា មូលហេតុនៃការផ្តល់គ្រឿងឥស្សរិយយសនេះផងដែរ គឺដោយសារខ្ញុំបានរួមចំណែកយ៉ាងធំក្នុងការលើកកំពស់ទំនាក់ទំនងរវាងជប៉ុន និងកម្ពុជាក្នុងវិស័យទឹកស្អាត ព្រមទាំងភាពជាអ្នកដឹកនាំរបស់យើងខ្ញុំដែលបានរួមចំណែកដ៏ធំធេងក្នុងការនាំយកទឹកស្អាតជូនដល់ប្រជាជនកម្ពុជារាប់លាននាក់» ។
គួរបញ្ជាក់ផងដែរថា ប្រជាជននៅភ្នំពេញប្រមាណជា ៩០ ភាគរយ បានទទួលទឹកស្អាត ដែលមានគុណភាព សុវត្ថភាព និងតម្លៃថោកសមរម្យ អាចប្រើប្រាស់ ២៤ម៉ោងលើ២៤ម៉ោង/៧ថ្ងៃ ហើយគុណភាពទឹកនៅភ្នំពេញអាចហូបបានតាំងតែពីឆ្នាំ២០០២មកម្ល៉េះ ។
ចែករំលែកព័តមាននេះ