ខេត្តប៉ៃលិន ៖ បើគេធ្វើដំណើរចេញពីកណ្តាលក្រុងប៉ៃលិន ក្នុងទិសដៅពីកើតឆ្ពោះទៅខាងលិចឈាងខាងត្បូង ដែលមានចម្ងាយប្រមាណ ២០ គីឡូម៉ែត្រ ដល់កន្លែងមួយជាប់នឹងព្រំដែនកម្ពុជា ថៃ ស្ថិតនៅចំណុចទុរ៉េន…
ខេត្តប៉ៃលិន ៖ បើគេធ្វើដំណើរចេញពីកណ្តាលក្រុងប៉ៃលិន ក្នុងទិសដៅពីកើតឆ្ពោះទៅខាងលិចឈាងខាងត្បូង ដែលមានចម្ងាយប្រមាណ ២០ គីឡូម៉ែត្រ ដល់កន្លែងមួយជាប់នឹងព្រំដែនកម្ពុជា ថៃ ស្ថិតនៅចំណុចទុរ៉េន ២ ដើម ក្នុងភូមិបរហ៊ុយត្បូង សង្កាត់បរយ៉ាខា ក្រុងប៉ៃលិន ខេត្តប៉ៃលិន ។
នៅទីនេះមានទេសភាពធម្មជាតិស្រស់បំព្រង ជាតំបន់ព្រៃភ្នំ ដែលបានបញ្ចេញពណ៌ខៀវស្រងាត់ អមទៅដោយទឹកអូរថ្លាយង់ហូររឹមៗឥតដាច់ ធ្លាក់មកពីប្រទេសថៃមក ។ សូរសំឡេងទឹកធ្លាក់បានលាយលំនឹងសំឡេងសត្វរៃកណ្តឹងយំរំពង ប្រណាំងដោយសំឡេងបក្សាសប្សី មានសត្វតាវ៉ៅជាដើម បានស្រែកយំឆ្លងឆ្លើយគ្នាកងរំពងពេញព្រៃ ។
សម្រស់ទេសភាពដែលឃើញនឹងភ្នែក ឭដោយត្រចៀកនូវសំឡេងទឹកហូរ និងសំឡេងសត្វយំនេះ បានអង្រួនបេះដូងភ្ញៀវទេសចរ អ្នកធ្វើដំណើរដែលបានទៅដល់ទៅនោះហើយ មិនចង់ឈានជើងចាកចេញឡើយ ។ ជាទូទៅមិនថា អ្នកភូមិ និងអ្នកធ្វើដំណើរនោះទេ នៅពេលឆ្លងកាត់ទីនោះ តែងតែទទួលបានអារម្មណ៍ស្រស់ស្រាយបន្ធូរអស់ភាពតានតឹង ។
លោក ហាន ភេទប្រុស អាយុ ៦០ ឆ្នាំ ពលរដ្ឋរស់នៅចំណុចទុរ៉េនពីរដើមនេះ បានឲ្យដឹងថា ជារៀងរាល់ថ្ងៃសៅរ៍ និងថ្ងៃអាទិត្យ ក៍ដូចជាថ្ងៃឈប់សម្រាកបុណ្យទានផ្សេងៗ មានប្រជាពលរដ្ឋ និងភ្ញៀវទេសចរមួយចំនួន ដែលបានធ្វើដំណើរដោយម៉ូតូ និងរថយន្ត ចេញពីភូមិផ្សារព្រំ និងភូមិនានាក្នុងក្រុងប៉ៃលិន មកលេងកម្សាន្តមើលទេសភាពព្រៃភ្នំ នៅទីនោះជាហូរហែ ។
អ្នកភូមិខាងលើបានឲ្យដឹងបន្តទៀតថា ព្រៃឈើទាំងនេះ ពិតជាផ្តល់ប្រយោជន៍ច្រើន សម្រាប់មនុស្ស ជាពិសេសបានបញ្ចេញនូវទេសភាពពណ៌ខៀវខ្ចីទាក់ភ្នែក បង្កើតបានជាទេសភាពស្រស់ស្អាតធ្វើឲ្យមនុស្សជាតិមានអារម្មណ៍ល្អ ជាកន្លែងសម្រាប់ឱ្យសត្វគ្រប់ប្រភេទរស់នៅចិញ្ចឹមជីវិតយ៉ាងសុខសាន្តទៀតផង ។
ក្រឡេកមើលទឹកអូរតាមដងអូរពីព្រំដែនកម្ពុជា ថៃ ដែលហូរមិនដាច់នោះវិញមានថ្លាយង់ ត្រជាក់ស្រេង សម្បូរទៅដោយហ្វូងមច្ឆាតូចធំ ។ ទឹកអូរនេះមិនធ្លាប់រីងស្ងួតនោះឡើយ ពោលគឺហូរចូលស្ទឹងបរយ៉ាខាខួបប្រាំងវស្សា ដែលជាអំណោយផលសម្រាប់កសិករ មានដីចម្ការនៅក្បែរមាត់អូរ អាចនាំគ្នាបូមទឹកស្រោចស្រពដំណាំដាំដុះរបស់ខ្លួនយ៉ាងងាយស្រួល ។ លើសពីនេះ ពេលគេចុះទៅងូតលេងធ្វើឱ្យត្រជាក់កាយសប្បាយចិត្ត បំបាត់នូវភាពហ្មងសៅផ្សេងៗ ថែមទាំងផ្តល់នូវថាមពលក្នុងខ្លួនមួយក្រមិតទៀតផង ។
ការធ្វើដំណើរនៅតាមផ្លូវលំក្បែរដងព្រៃភ្នំនេះ ពិតជាទទួលបានអារម្មណ៍រីករាយ បានគយគន់សម្រស់ធម្មជាតិ បំបាត់នូវក្តីកង្វល់ ផ្តល់នូវថាមពលបន្ថែមទៀត ទោះបីជានៅវេលាថ្ងៃត្រង់ ផ្ទៃមេឃហាក់ដូចជាក្តៅបន្តិចយ៉ាងណាក្តី ៕
ចែករំលែកព័តមាននេះ