រថយន្ដប្រមូលសំរាមរបស់ក្រុមហ៊ុនប្រមូលសំរាម 800Super ខណៈពេលកំពុងតែបើករថយន្តប្រមូលសំរាមសុខៗ ក៏បានឆ្លងចរន្តអគ្គិសនីក្បាលអាគុយរថយន្ដ បណ្តាលអោយអណ្តាតភ្លើងឆាបឆេះដល់
រាជធានីភ្នំពេញ ៖ បើតាមសេចក្តីរាយការណ៍បានឱ្យដឹងថា រថយន្ដប្រមូលសំរាមរបស់ក្រុមហ៊ុនប្រមូលសំរាម 800Super ខណៈពេលកំពុងតែបើករថយន្តប្រមូលសំរាមសុខៗ ក៏បានឆ្លងចរន្តអគ្គិសនីក្បាលអាគុយរថយន្ដ បណ្តាលអោយអណ្តាតភ្លើងឆាបឆេះដល់ក្រដាសអេតចាយដែលគរទុកនោះ រហូតឆេះរាលដាលដល់រថយន្តតែម្តង បង្កឱ្យមានការភ្ញាក់ផ្អើលទាំងយប់ ហើយក៏ត្រូវបានរ៉ឺម៉ក់ម៉ូតូទឹករបស់រដ្ឋបាលខណ្ឌដូនពេញ ចេញអន្តរាគមន៍បឋម និងរថយន្តពន្លត់អគ្គិភ័យមួយគ្រឿងទៀតចេញបាញ់ទឹកទប់ស្កាត់ទាន់ពេលវេលា កាលពីវេលាម៉ោង៤និង៥០នាទីទៀបភ្លឺ ថ្ងៃទី២៥ ខែមករា ឆ្នាំ២០២២ នៅចំណុចខាងលិចគល់ស្ពានជ្រោយចង្វា ស្ថិតក្នុងសង្កាត់ស្រះចក ខណ្ឌដូនពេញ ។
បើតាមប្រភពពីអ្នកបើកបររថយន្ត បានប្រាប់អោយដឹងថា មុនពេលកើតហេតុ គាត់បានបើករថយន្តខាងលើប្រមូលសំរាមជាធម្មតានៅតាមបណ្ដោយផ្លូវទន្លេសាប និងបានយកក្រដាសអេតចាយមកគរ និងសៀតលើអាគុយរថយន្ត ។ ហើយខណៈពេលដែលកំពុងបើកឆ្លងស្ពានជ្រោយចង្វា មកខាងរង្វង់មូលគួចកាណុង រហូតដល់គល់ស្ពាននោះ ស្រាប់តែមានអណ្ដាតភ្លើងឆាបឆេះចេញពីម្តុំអាគុយរថយន្ដ បណ្តាលឱ្យឆេះរាលដាលដល់ក្រដាសអេតចាយ រួចក៏ឆ្លងដល់រថយន្តតែម្តង ទើបពួកគាត់ដឹងថា រថយន្តឆេះ ក៏ឈប់រថយន្ដរួចនាំគ្នាទាញក្រដាសអេតចាយចេញ និងបានរាយការណ៍សុំរថយន្ដពន្លត់អគ្គិភ័យចេញអន្តរាគមន៍ជួយ ។
ប្រភពដដែលបន្តថា ភ្លាមៗនោះដែរ ក៏មានរ៉ឺម៉ក់ម៉ូតូទឹករបស់រដ្ឋបាលខណ្ឌដូនពេញ បានចេញចំនួន០១គ្រឿងមកជួយអន្តរាគមន៍ ហើយបានបាញ់ទឹកទប់ស្កាត់ និងមានរថយន្តពន្លត់អគ្គិភ័យរបស់ការិយាល័យបង្កានិងពន្លត់អគ្គីភ័យនៃស្នងការដ្ឋាននគរបាលរាជធានីភ្នំពេញ ក៏បាន ចេញរថយន្តមួយគ្រឿង មកជួយអន្តរាគមន៍បាញ់ទឹកពន្លត់ផងដែរ ដោយមិនបានឆ្លងរាលដាលដល់ក្បាលម៉ាស៊ីនរថយន្តនោះទេ គ្រាន់តែខូចខាតអាគុយរថយន្ដអស់ចំនួន០២អាគុយ តែប៉ុណ្ណោះ ៕
ចែករំលែកព័តមាននេះ