ករណីឆ្លងកូវីដប្រចាំថ្ងៃនៅក្នុងចក្រភពអង់គ្លេស ជាមធ្យមមានជិត ៥សែនករណី ក្នុងប៉ុន្មានសប្តាហ៍ក្រោយពេលបុណ្យណូអែលរួច។ នេះគឺបានមកពីការវិភាគថ្មីមួយ។ ចំនួននេះ​ គឺ​ជិត​បី​ដង​នៃ​តួលេខ​ផ្លូវការ ​ដែល​បាន​កត់ត្រា​ដោយ​នាយកដ្ឋាន​សុខាភិបាល។

ជាមធ្យមនៃករណីថ្មីចំនួន ១៧៣៤០០ ក្នុងមួយថ្ងៃត្រូវបានកត់ត្រាពីថ្ងៃទី២៦ ខែធ្នូ ដល់ថ្ងៃទី ១ ខែមករា នេះបើយោងតាមការប្រកាសផ្លូវការពីរដ្ឋាភិបាល។ ប៉ុន្តែចំនួនពិតនៃករណីទំនងជាជិតជាង ៤៧៩១០០ករណី ក្នុងមួយថ្ងៃ នេះបើយោងតាមការប៉ាន់ស្មានដោយការិយាល័យស្ថិតិជាតិ (ONS)។

មុនពេលកូវីដអូមីក្រុង បានចាប់ផ្តើមរីករាលដាលនៅក្នុងចក្រភពអង់គ្លេស ONS បានប៉ាន់ប្រមាណថា ជាមធ្យមមានករណីថ្មីចំនួន ៩៩១០០ក្នុងមួយថ្ងៃ ដែលនេះច្រើនជាងពីរដងនៃជាមធ្យម ៤១៩០០ ក្នុងមួយថ្ងៃដែលបានកត់ត្រាផ្លូវការដោយរដ្ឋាភិបាល។

ភាពខុសគ្នាយ៉ាងខ្លាំងនៃចំនួនឆ្លងសរុប ឆ្លុះបញ្ចាំងពីចំនួនករណីដែលត្រូវបានបាត់នៅលើផ្ទាំងបង្ហាញរបស់រដ្ឋាភិបាល ដែលរាប់តែអ្នកដែលបានរាយការណ៍ថាខ្លួនមានតេស្តវិជ្ជមានកូវីដតែប៉ុណ្ណោះ។ សម្រាប់អ្នកមិនរាយការណ៍ ទិន្នន័យផ្លូវការមិនបានបង្ហាញនោះទេ។ នេះមានន័យថា ចំនួនផ្លូវការនេះ គឺអាស្រ័យទៅលើចំនួនមនុស្សដែលមកធ្វើតេស្ត អ្នកដែលសុខចិត្តប្រាប់ថាវិជ្ជមាន និង អ្នកដែលព្យាយាមលាក់។

ផ្ទុយទៅវិញ តួលេខ ONS គឺមានភាពសុក្រិតជាង ដោយសារតែវាផ្អែកទៅលើការវិភាគលើច្រមុះ និងបំពង់ក ដែលយកពីគំរូតំណាងរបស់មនុស្សជាង ១៥ម៉ឺននាក់។ មនុស្សដដែល ត្រូវបានយកសំណាកតាមដានរៀងរាល់សប្តាហ៍ ដោយមិនគិតពីថាតើពួកគេដឹងថាពួកគេមានកូវីដឬអត់ទេ។ តាមការគណនាវិទ្យាសាស្រ្ត ទើបគេបានទិន្នន័យដូចខាងលើ ដែលលើសពីទិន្នន័យផ្លូវការ៕