ភ្នំពេញ៖ នៅយប់ថ្ងៃទី២១ ខែមករា ឆ្នាំ២០២២ នេះ ក្រសួងការងារ និងបណ្តុះបណ្តាលវិជ្ជាជីវៈ បានប្រកាសជូនដំណឹងពីការបើកផ្តល់ប្រាក់ឧបត្ថម្ភជូនបងប្អូនកម្មករនិយោជិត ក្នុងវិស័យកាត់ដេរ និងទេសចរណ៍ ដែលត្រូវបានព្យួរកិច្ចសន្យាការងារ ស្របតាមស្មារតីនៃកញ្ចប់វិធានការរបស់រាជរដ្ឋាភិបាល។ នេះជាលើកទី៧៧ ហើយ ដែលរាជរដ្ឋាភិបាល តាមរយៈក្រសួងការងារ បើកផ្តល់ប្រាក់ឧបត្ថម្ភជូនកម្មករនិយោជិត ដែលបាត់បង់ការងារ ក្នុងអំឡុងពេលកូវីដ។
តាមសេចក្តីជូនដំណឹង ការបើកផ្តល់ប្រាក់ឧបត្ថម្ភនេះ សម្រាប់កម្មករនិយោជិត ចំនួន ១៤១៤២នាក់ នៅរោងចក្រសហគ្រាស ចំនួន ៨៤ ក្នុងវិស័យកាត់ដេរ និងវិស័យទេសចរណ៍។ ក្នុងនោះ មានរោងចក្រកាត់ដេរ ចំនួន ១៨ នៅភ្នំពេញ ខេត្តកណ្តាល តាកែវ ត្បូងឃ្មុំ ព្រៃវែង កំពង់ឆ្នាំង កំពង់ស្ពឺ និងនៅខេត្តស្វាយរៀង។ រីឯក្រុមហ៊ុន និងសណ្ឋាគារក្នុងវិស័យទេសចរណ៍ មានចំនួន ៦៦ មាននៅភ្នំពេញ ខេត្តសៀមរាប និងនៅខេត្តព្រះសីហនុ។
តាមសេចក្តីជូនដំណឹង ប្រាក់ឧបត្ថម្ភនេះ នឹងត្រូវបើកផ្តល់ជាប្រាក់រៀល តាមធនាគារវីង និងអាស្រ័យលើចំនួនថ្ងៃនសការព្យួរកិច្ចសន្យាការងារ ក្នុងនោះ បែងចែកជា ៣ រួមមាន៖ ១-៦០៧៥០រៀល ( ១៥ដុល្លារ) សម្រាប់ការព្យួរកិច្ចសន្យាការងាររយៈពេល ៧ថ្ងៃ ដល់ ១០ថ្ងៃ ២-១២១ ៥០០រៀល (៣០ដុល្លារ) សម្រាប់ការព្យួរកិច្ចសន្យាការងាររយៈពេល ១១ថ្ងៃ ដល់ ២០ថ្ងៃ និង៣-១៦២ ០០០រៀល ( ៤០ដុល្លារ) សម្រាប់ការព្យួរកិច្ចសន្យាការងាររយៈពេលចាប់ពី ២១ថ្ងៃ ដល់ ១ខែ៕
ចែករំលែកព័តមាននេះ