ADផ្ទាំងផ្សព្វផ្សាយពាណិជ្ជកម្ម

Picture

កម្ពុជា​អាច​នឹង​​លុប​ចោល​វិញ្ញាសា​E-Sports ពេល​ធ្វើ​ម្ចាស់ផ្ទះ បើ​កីឡា​នេះ​គ្មាន​ផ្លែ្ល​ផ្កា​នៅ​ស៊ី​ហ្គេ​ម​វៀតណាម

4 ខែ មុន
  • ភ្នំពេញ

រាជធានី​ភ្នំពេញ ៖ យោង​តាម​ការ​បញ្ជាក់​ពីឯកឧត្តម​​ ជា ច័ន្ទ​បរិបូរណ៍ ប្រធាន​សហព័ន្ធ​កីឡា​អេ​ឡិច​ត្រូ​និក​កម្ពុជា (E-Sports) បាន​

រាជធានី​ភ្នំពេញ ៖ យោង​តាម​ការ​បញ្ជាក់​ពីឯកឧត្តម​​ ជា ច័ន្ទ​បរិបូរណ៍ ប្រធាន​សហព័ន្ធ​កីឡា​អេ​ឡិច​ត្រូ​និក​កម្ពុជា (E-Sports) បាន​ធ្វើ​ឱ្យ​មានការ​ចាប់អារម្មណ៍​យ៉ាង​ខ្លាំង បន្ទាប់​ពី​បាន​ប្រកាស​ថា «​ប្រសិនបើ​ប្រភេទ​កីឡា​អេ​ឡិច​ត្រូនិក​មិន​រីក​ចម្រើន​ទាល់តែ​សោះ ក្នុង​ស៊ី​ហ្គេ​ម នៅ​វៀតណាម នា​ខែឧសភា ឆ្នាំ​២០២២​នេះ នោះ​យើង​នឹង​ប្រជុំ​ពិចារណា​ជាមួយ​គ្នា​ថា​តើ​គួរ​រៀបចំ​ធ្វើ​កីឡា​អេ​ឡិច​ត្រូ​និក​នេះ ក្នុង​ស៊ី​ហ្គេ​ម លើក​ទី​៣២ ឆ្នាំ​២០២៣​នៅ​កម្ពុជា ឬ​អត់? នេះ​ជា​ការ​បង្ហាញ​នូវ​ការ​ទទួលខុសត្រូវ​ខ្ពស់​របស់​ឯកឧត្តម នៅ​ក្នុង​ឱកាស​សន្និសីទ​សារព័ត៌មាន នៅ​រសៀល​ថ្ងៃ​ទី​២០ ខែមករា ឆ្នាំ​២០២២ នៅ​សណ្ឋាគារ Raffles Hotel Le Royal រាជធានី​ភ្នំពេញ ដើម្បី​កុំឱ្យ​មានការ​ខកចិត្ត នៅ​ពេល​កំណត់​យក​វិញ្ញាសា​នេះ​ហើយ​មិន​ទទួល​បាន​ផ្លែផ្កា​។

ប្រធាន​សហព័ន្ធ​កីឡា​អេ​ឡិច​ត្រូ​និក​កម្ពុជា​បញ្ជាក់​ទៀត​ថា «​សម្រាប់​ការ​ត្រៀម​ស៊ី​ហ្គេ​ម ឆ្នាំ​២០២២​នេះ ខ្ញុំ​មិន​ចង់​និយាយ​អំពី​ថា​តើ​ប្រភេទ​កីឡា​អេ​ឡិច​ត្រូ​និក​កម្ពុជា​មាន​ក្តី​សង្ឃឹម​ខ្ពស់​ក្នុង​ការ​ប្រជែង​មេដាយ​កម្រិត​ណា​នោះ​ទេ ប៉ុន្តែ​ខ្ញុំ​ចង់​ឃើញ​ពី​ក្រា​ហ្វិ​ច​កើនឡើង​ពី​ចន្លោះ​ស៊ី​ហ្គេ​មលើក​ទី​៣០ នៅ​ប្រទេស​ហ្វី​លី​ពី​ន ឆ្នាំ​២០១៩ និង​ការ​ចូលរួម​ប្រកួត​ស៊ី​ហ្គេ​ម លើក​ទី​៣១ នៅ​ប្រទេស​វៀតណាម នា​ខែឧសភា ឆ្នាំ​២០២២​ថា​តើ​កម្រិត​ប្រកួតប្រជែង​អាច​ឈាន​ឡើង​បន្ថែម ឬ​ធ្លាក់​ចុះ ឬ​អាច​រក្សា​នៅ​កម្រិត​ដដែល​។

ប្រសិនបើ​មិន​រីក​ចម្រើន​ទាល់តែ​សោះ ឬ​រក្សា​កម្រិត​ដដែល ខ្ញុំ​នឹង​ពិចារណា​ជាមួយ​គ្នា​ថា​តើ​គួរ​រៀបចំ E-Sports នៅ​ក្នុង​ស៊ី​ហ្គេ​ម លើក​ទី​៣២ ឆ្នាំ​២០២៣ ដែល​កម្ពុជា​យើង​ទទួល​រៀបចំ​ធ្វើ​ជា​ម្ចាស់ផ្ទះ ឬ​អត់​។ ទោះបី​យើង​រៀបចំ​ក៏​អត់​មាន​ន័យ​អ្វី​ដែរ​»​។

ឯកឧត្តម ជា ច័ន្ទ​បរិបូរណ៍ បន្ថែម​ថា អ្វី​ដែល​សំខាន់​នៃ​គោលដៅ​ចំពោះ​មុខ​នេះ គឺ​យើង​ត្រូវ​មាន​មហិច្ឆតា​រួម​គ្នា ដោយ​សហព័ន្ធ​មាន​គោលការណ៍​ច្បាស់លាស់ ការ​លើកទឹកចិត្ត ជា​ពិសេស​គឺ​កីឡាករ​ត្រូវ​តែ​មាន​មហិច្ឆតា​ដូច​គ្នា ក្នុង​ការ​សម្រួច​ឆន្ទៈ​ប្រកួត​ដណ្តើម​មេដាយ​យក​មក​ជូន​ជាតិ​ដូច​គ្នា​។ ដូច្នេះ​សហព័ន្ធ និង​កីឡាករ​ត្រូវ​ខិតខំ​រួម​គ្នា ដើម្បី​ឈាន​ដល់​លទ្ធផល​ដ៏​គាប់ប្រសើរ​ណាមួយ​សម្រាប់​ជាតិ​។

«​វា​ដូច​ជា​គោមួយ​នឹម ឬ​ទូក​មួយ​អាច​ទៅ​មុខ​បាន អាស្រ័យ​ដោយ​មានការ​ប្រឹងប្រែង ឬ​អ្នក​អុំទូក​ត្រូវ​រួម​កម្លាំង​សាមគ្គី​គ្នា​»​។
ជាមួយ​គ្នា​នោះ ឯកឧត្តម​ប្រធាន​សហព័ន្ធ​ក៏​បាន​លើកទឹកចិត្ត​ដល់​កីឡាករ​ទាំងអស់​ថា គប្បី​ត្រូវ​ប្រឹងប្រែង​ឲ្យ​ខ្លាំងក្លា ពីព្រោះ​ម្ចាស់​មេដាយ​ដែល​ដណ្តើម​ពី​ការ​ប្រកួត​ពិភពលោក ឬ​ស៊ី​ហ្គេ​ម នឹង​ទទួល​បានការ​លើកទឹកចិត្ត​ពិសេស​ពី​ក្រសួង​អប់រំ យុវជន និង​កីឡា ក៏​ដូច​ជា​រាជរដ្ឋាភិបាល​កម្ពុជា ។ ការ​ខិតខំ​អស់ពី​សមត្ថភាព គឺជា​មោទនភាព​របស់​យើង​ទាំងអស់​គ្នា​។

គួរ​បញ្ជាក់​ថា គោលបំណង​នៃ​ការ​រៀបចំ​សន្និសីទ​សារព័ត៌មាន​នេះ គឺ​សហព័ន្ធ​កីឡា​អេ​ឡិច​ត្រូ​និក​កម្ពុជា​នឹង​រៀបចំ​ការ​ប្រកួត​ជ្រើសរើស​ក្រុម​ជម្រើសជាតិ​ជាតិ​កម្ពុជា សម្រាប់​វិញ្ញាសា Mobile Legends និង PUBG Mobile ចាប់ពី​ថ្ងៃ​ទី​២៧ ខែមករា ដល់​ថ្ងៃ​ទី​២០ ខែកុម្ភៈ ឆ្នាំ​២០២២​។ ការ​ចុះ​ឈ្មោះ​ចាប់ពី​ថ្ងៃ​ទី​២០ ដល់​ថ្ងៃ​ទី​២៥ ខែមករា ឆ្នាំ​២០២២​។ ចំពោះ​ក្រុម​ជ័យ​លា​ភី​ចំណាត់ថ្នាក់​លេខ​១ ដល់​លេខ​៤​ទទួល​បានការ​ជ្រើសរើស​ចូល​ក្នុង​ក្រុម​ជម្រើសជាតិ​កម្ពុជា ព្រមទាំង​មាន​គណៈប្រតិភូ គ្រូបង្វឹក និង​ពិធីករ (Caster) ត្រឹមត្រូវ​មួយ​ចំនួន ។

ជា​ពិសេស​ទៀត​នោះ ជា​ការ​អភិវឌ្ឍ​បង្កើន​សមត្ថភាព បំផុសបំផុល និង​ជំរុញ​កីឡា​អេ​ឡិច​ត្រូ​និក​កម្ពុជា​ដើម្បី​ឲ្យ​រីក​ចម្រើន​ឈាន​ឡើង​លំដាប់​អន្តរជាតិ សម្រាប់​ត្រៀមខ្លួន​ប្រកួត​កីឡា​ស៊ី​ហ្គេ​ម លើក​ទី​៣២ ឆ្នាំ​២០២៣​ដែល​កម្ពុជា​ធ្វើ​ជា​ម្ចាស់ផ្ទះ​។ ជាមួយ​គ្នា​នេះ កីឡា​អេ​ឡិច​ត្រូ​និក​កម្ពុជា​២​ក្រុម​ជាប់​ឈ្មោះ​ទៅ​ស៊ី​ហ្គេ​ម​រួច​ហើយ បន្ទាប់​ពី​ជាប់​វគ្គ​ជម្រុះ​ក្នុង​ចំណោម​កំពូល​ទាំង​៨ ។ សម្រាប់ PUBGM គឺ​ក្រុម APG Esports និង Orange Esports ដែល​ជា​ក្រុម​២​ដំបូង​គេ​ជាប់​ទៅ​ដំណើរ​ឆ្ពោះទៅ​កីឡា​ស៊ី​ហ្គេ​ម ក្រោយ​ឆ្លងកាត់​ការ​ប្រកួត​ព្រឹត្តិការណ៍​មុន​ស៊ី​ហ្គេ​ម (Pre-SEAGAMES) នៅ​ដើមឆ្នាំ​នេះ ៕

Picture
Picture
Picture
Picture
Picture
Picture
Picture
Picture
Picture
Picture
Picture
Picture
Picture
Picture
Picture
Picture
Picture