រាជធានីភ្នំពេញ ៖ ការសុំទិដ្ឋាការសម្រាប់ធ្វើដំណើរទៅបរទេស គឺមិនមានភាពងាយស្រួលប៉ុន្មានទេ ពិសេសសម្រាប់អ្នកដែលគ្មានបទពិសោធន៍ធ្វើការសុំទិដ្ឋាការមុនៗ ។ ដំណើរការសុំទិដ្ឋាការទៅសហរដ្ឋអាមេរិក
រាជធានីភ្នំពេញ ៖ ការសុំទិដ្ឋាការសម្រាប់ធ្វើដំណើរទៅបរទេស គឺមិនមានភាពងាយស្រួលប៉ុន្មានទេ ពិសេសសម្រាប់អ្នកដែលគ្មានបទពិសោធន៍ធ្វើការសុំទិដ្ឋាការមុនៗ ។ ដំណើរការសុំទិដ្ឋាការទៅសហរដ្ឋអាមេរិក ក៏មិនមានភាពខុសប្លែកគ្នាប៉ុន្មានដែរ បើសិនជាយើងមិនបានសិក្សា ឬស្វែងយល់ពីដំណើរការរបស់វាឲ្យបានច្បាស់លាស់នោះទេ។
ទិដ្ឋាការរបស់សហរដ្ឋអាមេរិក ត្រូវបានបែងចែកជាពីរប្រភេទធំៗ គឺទិដ្ឋាការសម្រាប់ជនអន្តោប្រវេសន៍ (Immigrant VISA) និងទិដ្ឋាការទូទៅមិនមែនសម្រាប់ជនអន្តោប្រវេសន៍ (Non-immigrant VISA) ។
ទិដ្ឋាការសម្រាប់ជនអន្តោប្រវេសន៍ គឺសម្រាប់អ្នកដែលមានបំណងចង់ទៅរស់នៅសហរដ្ឋអាមេរិក ដោយមានបងប្អូន ឬសាច់ញាតិនៅទីនោះជាអ្នកធានា ហើយទិដ្ឋាការទូទៅមិនសម្រាប់ជនអន្តោប្រវេសន៍ គឺសំដៅទៅប្រភេទទិដ្ឋាការសម្រាប់ប្រជាជនកម្ពុជា ដែលមានបំណងគ្រាន់តែទៅធ្វើដំណើរកម្សាន្ត រៀនសូត្រ ឬស្នាក់នៅសហរដ្ឋអាេមរិក ក្នុងរយ:ពេលកំណត់មួយ នេះបើយោងតាមលោកស្រី រ៉េឆល ហាញស៍ (Rachel Hines) កុងស៊ុលរងនៃស្ថានទូតសហរដ្ឋអាមេរិកប្រចាំនៅកម្ពុជា ។
ចំពោះដំណើរការនៃការស្នើសុំទិដ្ឋាការនេះវិញ ដំបូងគឺយើងត្រូវចូលទៅកាន់ទំព័រទិដ្ឋាការរបស់គេហទំព័រស្ថានទូតអាមេរិក (https://kh.usembassy.gov) ដើម្បីស្វែងរកប្រភេទទិដ្ឋាការដែលស័ក្តិសមនឹងយើង ។ បន្ទាប់មកបំពេញបែបបទស្នើសុំទិដ្ឋាការនៅលើគេទំព័រដដែលនេះ ហើយយើងនឹងត្រូវបង់ថ្លៃការស្នើសុំទិដ្ឋាការនៅធនាគារអេស៊ីលីដា ។ ក្រោយពីបង់ថ្លៃរួចរាល់ហើយ យើងត្រូវធ្វើការណាត់សម្ភាសន៍ផ្ទាល់មាត់ជាមួយនឹងកុងស៊ុលនៅស្ថានទូតសហរដ្ឋអាមេរិក ។
សម្រាប់ការបំពេញបែបបទស្នើសុំទិដ្ឋាការនេះ គឺតម្រូវឲ្យយើងបង្ហោះរូបថតផងដែរ ។ រូបថតនេះ គឺត្រូវតែថតក្នុងអំឡុងរយៈពេល៦ខែចុងក្រោយ ដោយផ្ទាំងខាងក្រោយ គឺពណ៌ស និងមានទំហំ៥សង់ទីម៉ែត្រ គុណនឹង៥សង់ទីម៉ែត្រ ។ ចំណែកលិខិតឆ្លងដែនរបស់យើងត្រូវមានសុពលភាពយ៉ាងតិច៦ខែ ។ ដំណាក់កាលភាគច្រើននៃការដាក់ស្នើសុំទិដ្ឋាការនេះ គឺត្រូវធ្វើឡើងនៅលើប្រព័ន្ធអុីនធើរណេត ។
ចំពោះដំណើរការស្នើសុំទិដ្ឋាការសម្រាប់ជនអន្តោប្រវេសន៍វិញ លោកស្រី រ៉េឆល បានថ្លែងថា ជាទូទៅ វាមានដំណើរការច្រើនជាងទិដ្ឋាការទូទៅ ពីព្រោះខាងស្ថានកុងស៊ុលទាំងក្នុងប្រទេសកម្ពុជា និងសហរដ្ឋអាមេរិក ត្រូវការស៊ើបអង្កេតឲ្យបានច្បាស់ពីទំនាក់ទំនងរបស់បុគ្គលដែលស្នើសុំ និងសាច់ញាតិរបស់គេនៅសហរដ្ឋអាមេរិក ហើយនិងកត្តាមួយចំនួនផ្សេងទៀត ។
លោកស្រីបានបញ្ជាក់ថា ៖ « សម្រាប់ទិដ្ឋាការសម្រាប់ជនអន្តោប្រវេសន៍ យើងនឹងធ្វើការត្រួតពិនិត្យថា តើអ្នកដែលស្នើសុំនោះ មានគ្រប់លក្ខខណ្ឌដែរឬទេ ហើយតើអ្នកដែលធានានោះ ដូចជាសាច់ញាតិរបស់គេជាដើមហ្នឹង អាចមានលទ្ធភាពផ្គត់ផ្គង់គាំទ្រដល់ពួកគេដែរឬទេ ពេលដែលពួកគេទៅដល់សហរដ្ឋអាមេរិក ហើយមួយទៀត យើងនឹងធ្វើការស៊ើបអង្កេតថា តើពួកគេពិតជាមានទំនាក់ទំនងជាសាច់ញាតិពិតមែនឬក៏អត់ ។ ពេលខ្លះយើងនឹងអាចធ្វើការពិនិត្យ DNA ថែមទៀតផង បើមានការសង្ស័យ » ។
គន្លឹះសំខាន់បំផុតនៅក្នុងដំណើរការស្នើសុំទិដ្ឋាការនោះ គឺភាពស្មោះត្រង់ ប្រមូលព័ត៌មានឲ្យបានច្បាស់លាស់ ជ្រើសរើសប្រភេទទិដ្ឋាការឲ្យបានត្រឹមត្រូវ ធ្វើការស្នើសុំឲ្យបានត្រឹមត្រូវគ្រប់ដំណាក់កាល និងស្វែងយល់ពីលក្ខខណ្ឌរបស់ទិដ្ឋាការដែលយើងចង់ស្នើសុំ ។ លោកស្រីក៏បានបន្ថែមថា បេក្ខជនមិនគួរត្រៀមតែឯកសារនោះទេ គឺគួរតែត្រៀមខ្លួនសម្រាប់ការសម្ភាសន៍ផងដែរ ។
លោកស្រី រ៉េឆល បានបញ្ជាក់ថា ៖ « អ្វីដែលយើងគួរប្រយ័ត្នប្រយែងមែនទែននោះ គឺប្រភេទទិដ្ឋាការដែលយើងស្នើសុំ ។ បើសិនជាយើងស្នើសុំប្រភេទទិដ្ឋាការដែលខុសពីគោលបំណងរបស់យើង នោះយើងនឹងមិនអាចទទួលជោគជ័យក្នុងការទទួលបានទិដ្ឋាការនោះទេ។ ត្រូវស្វែងយល់ពីគោលបំណង និងទិដ្ឋាការដែលត្រូវនឹងយើង ។ ចំណុចសំខាន់បំផុត ឬក៏ពិបាកបំផុតនោះ គឺវគ្គសម្ភាសន៍ ព្រោះនៅពេលនោះបេក្ខជន ឬក៏អ្នកដែលស្នើសុំទិដ្ឋាការនឹងត្រូវបានសម្ភាសន៍ដោយស្ថានកុងស៊ុលនៅស្ថានទូតអាមេរិក ហើយនឹងត្រូវវាយតម្លៃថា ពួកគេគួរទទួលបានទិដ្ឋាការឬក៏អត់ » ។
ចំពោះការប្រើប្រាស់ភាសានៅក្នុងសម្ភាសន៍វិញ បេក្ខជនអាចជ្រើសរើសរវាងភាសាខ្មែរ ឬក៏អង់គ្លេសបាន ដើម្បីរក្សាភាពច្បាស់លាស់ក្នុងការធ្វើទំនាក់ទំនង ។
លោកស្រីបានបញ្ជាក់ដែរថា ចំពោះប្រភេទទិដ្ឋាការទូទៅ មិនមែនសម្រាប់ជនអន្តោប្រវេសន៍ គឺខាងលោកស្រី ក៏តែងតែធ្វើការស៊ើបអង្កេតថា តើបេក្ខជនទាំងនោះមានបំណងរស់នៅសហរដ្ឋអាមេរិកជារៀងរហូតឬក៏អត់ ឬក៏នឹងត្រឡប់មកវិញដែរឬទេ ។ បើសិនជាយើងរកឃើញថា ពួកគេមានបំណងចង់បន្តរស់នៅក្នុងសហរដ្ឋអាមេរិក បើទោះបីជារយៈពេលទិដ្ឋាការទូទៅមិនសម្រាប់ជនអន្តោប្រវេសន៍របស់ខ្លួនអស់ក៏ដោយនោះ ខាងលោកស្រីនឹងមិនផ្តល់ទិដ្ឋាការទូទៅមិនមែនសម្រាប់ជនអន្តោប្រវេសន៍ដល់ពួកគេនោះទេ ដើម្បីចៀសវាងករណីអន្តោប្រវេសន៍ខុសច្បាប់ ។
លោកស្រី រ៉េឆល បានរំលឹកថា ប្រសិនបើទិដ្ឋាការប្រភេទទេសចរណ៍ សិស្ស និស្សិត ឬក៏ផ្លាស់ប្តូរកម្មសិក្សា (Exchange Visa) ដែលហួសកំណត់ក្នុងអំឡុងរយៈពេល១២ខែចុងក្រោយ គឺលោកអ្នកមិនចាំបាច់ឆ្លងកាត់ការសម្ភាសន៍សាកសួរម្តងទៀតនោះទេ បើសិនជាលោកអ្នកមានបំណងស្នើសុំបន្តទិដ្ឋាការប្រភេទទាំងនោះម្តងទៀត ដោយសារស្ថានទូតសហរដ្ឋអាមេរិកបានបង្កើតកម្មវិធីមួយគឺ Interview Waiver Program (IWP ) ។ ចំពោះកម្មវិធីមួយនេះ គឺតម្រូវឲ្យលោកអ្នកប្រគល់បែបបទស្នើសុំទិដ្ឋាការ និងឯកសារពាក់ព័ន្ធទៅកាន់ស្ថានកុងស៊ុលស្ថានទូតសហរដ្ឋអាមេរិកនៅថ្ងៃព្រហស្បតិ៍ ឬថ្ងៃសុក្រ ចាប់ពីម៉ោង១ថ្ងៃ ទៅដល់ម៉ោង៣ថ្ងៃ ។
គួរបញ្ជាក់ដែរថា មានប្រជាជនកម្ពុជាប្រមាណជា៦.០០០នាក់បានដាក់ស្នើសុំទិដ្ឋាការទូទៅមិនសម្រាប់អន្តោប្រវេសន៍ (non-immigrant) ជារៀងរាល់ឆ្នាំ និងប្រមាណជា៤.០០០នាក់ស្នើសុំទិដ្ឋាការសម្រាប់ជនអន្តោប្រវេសន៍ ហើយប្រភេទទិដ្ឋាការអ្នកទេសចរមានចំនួនច្រើនជាងគេ បន្ទាប់មកគឺទិដ្ឋាការសម្រាប់ការសិក្សា ។ លោកអ្នកអាចចូលទៅកាន់គេហទំព័រ http://www.ustraveldocs.com/ បានសម្រាប់ស្វែងរករាល់ព័ត៌មានទាំងឡាយទាក់ទងនឹងទិដ្ឋាការ និងការធ្វើដំណើរទៅកាន់សហរដ្ឋអាមេរិក ៕
ចែករំលែកព័តមាននេះ