ខេត្តកំពង់ស្ពឺ ៖ សេចក្តីរាយការណ៍បានឲ្យដឹងថា រថយន្តតួរីសដឹកកម្មករមួយគ្រឿងបានផ្ទុះកង់បណ្ដាលឲ្យក្រឡាប់នៅលើផ្លូវលេខ៤៤ ចន្លោះគីឡូម៉ែត្រលេខ២០-២១ ចំណុចភូមិអូរនាងហ៊ីង ឃុំទំព័រមាស
ខេត្តកំពង់ស្ពឺ ៖ សេចក្តីរាយការណ៍បានឲ្យដឹងថា រថយន្តតួរីសដឹកកម្មករមួយគ្រឿងបានផ្ទុះកង់បណ្ដាលឲ្យក្រឡាប់នៅលើផ្លូវលេខ៤៤ ចន្លោះគីឡូម៉ែត្រលេខ២០-២១ ចំណុចភូមិអូរនាងហ៊ីង ឃុំទំព័រមាស ស្រុកសំរោងទង កាលពីវេលាម៉ោង៦ និង២០នាទីព្រឹក ថ្ងៃទី៣០ ខែមិថុនា ឆ្នាំ២០១៦ បណ្ដាលឲ្យកម្មករ-កម្មការិនីរងរបួសជាច្រើននាក់ ។
សេចក្តីរាយការណ៍បានឲ្យដឹងទៀតថា មុនពេលកើតហេតុរថយន្តប្រភេទតួរីស ម៉ាកហ៊ីយ៉ាន់ដាយ ពណ៌ទឹកប្រាក់ ពាក់ផ្លាកលេខ ភ្នំពេញ 2F-7474 អ្នកបើកបរឈ្មោះ ជួន ហឿន ភេទប្រុស អាយុ៥៣ឆ្នាំ រស់នៅភូមិតាំងរបង ឃុំហោសំណម ស្រុកឱរ៉ាល់ ខេត្តកំពង់ស្ពឺ ដឹកកម្មកររោងចក្រចំនួន២៨នាក់ ធ្វើដំណើរមកពីទិសខាងលិចទៅទិសខាងកើត លុះមកដល់ចំណុចកើតហេតុបានបែកកង់រថយន្តខាងក្រោយផ្នែកខាងស្តាំ ធ្វើឲ្យរថយន្តក្រឡាប់ បណ្ដាលឲ្យកម្មករ-កម្មការិនីជាច្រើននាក់រងរបួសធ្ងន់-ស្រាល ។
ក្រោយពេលកើតហេតុ អ្នករងរបួស៩នាក់(ស្រី៨នាក់ ប្រុសម្នាក់) ត្រូវបានបញ្ជូនទៅមន្ទីរពេទ្យបង្អែកខេត្តកំពង់ស្ពឺ ចំណែករថយន្តត្រូវបានសមត្ថកិច្ចយកទៅរក្សាទុកនៅអធិការដ្ឋាននគរបាលស្រុកសំរោងទង ។
លោក ចឹក បូរិន្ទ ប្រធានមន្ទីរការងារខេត្តកំពង់ស្ពឺ បានឲ្យដឹងថា រាល់ការចំណាយក្នុងការព្យាបាល គឺខាងរបបបេឡាជាតិសន្តិសុខសង្គម ហៅកាត់ថា(បសស)ជាឣ្នករ៉ាប់រងទាំងស្រុង ៕
ចែករំលែកព័តមាននេះ