សៀវភៅគតិធម៌បានបរិយាយអំពីជីវិតនិងបញ្ហាយ៉ាងនេះថា ជីវិតមនុស្សយើងមិនអាចរស់នៅដោយអត់មានបញ្ហានោះទេ មានជីវិតគឺមានបញ្ហា ដូច្នេះកាលបើមានបញ្ហាអ្វីមួយមកដល់ត្រូវតែដោះស្រាយប្រកបដោយគតិធម៌ដើរតាមលម្អានរបស់បណ្ឌិត មិនត្រូវគេចវេះឡើយ ។
ជីវិតជោគជ័យមិនមែនព្រោះតែជីវិតអត់បញ្ហានោះទេ តាមពិតបញ្ហាជាឧបសគ្គផ្សេងៗបានជាប់មកជាមួយនឹងជីវិតរួចស្រេចទៅហើយ ដូច្នេះគតិធម៌របស់បណ្ឌិតពិតជាចាំបាច់បំផុតសម្រាប់ដោះស្រាយបញ្ហាទាំងនោះដើម្បីឱ្យជីវិតជោគជ័យ ។
ជីវិតមនុស្សមានតម្លៃក្នុងភាពជាមនុស្សដែលមានគុណធម៌ នេះគឺជាជោគជ័យដ៏ធំមួយរួចស្រេចទៅហើយ ព្រោះបានឈ្នះនូវបាបកម្មផ្សេងៗដ៏ច្រើន ហើយគុណធម៌នេះឯងដែលបាននាំជីវិតឲ្យកើតមកជាមនុស្ស ។ មិនត្រឹមតែប៉ុណ្ណោះជីវិតនៅរស់ដល់សព្វថ្ងៃនេះសុទ្ធតែជាជីវិតជោគជ័យ ព្រោះមានគុណធម៌ជាបច្ច័យក្នុងការរក្សាជីវិត ដោយបានរារាំងនូវសេនារបស់មច្ចុរាជមិនឱ្យមកបៀតបៀនបាននោះ ។
ព្រោះហេតុនោះមនុស្សត្រូវតែតស៊ូយកជោគជ័យជាទីបំផុត គឺកម្ចាត់បង់នូវអំពើទុច្ចរិតឱ្យអស់ពីសន្តាន ហើយធ្វើជីវិតឲ្យមានតម្លៃជាភិយ្យោភាព ជាមួយនឹងការងារជាប្រយោជន៍ដល់សង្គមគ្រួសារនិងសង្គមជាជាតិបន្តរហូតដល់ទីបំផុតនៃដំណើរជីវិត ៕ សាន សារិន
ចែករំលែកព័តមាននេះ