យើងអាចដឹងថានរណាម្នាក់ស្អាតបាន ដោយសារតែគេនោះស្អាតមែន។ តែអ្វីដែលអ្នកមិនបានដឹងនោះគឺថា វាមកពីភ្នែករបស់អ្នកមានសុខភាពល្អ ទើបអាចឃើញមនុស្សស្អាត ស្អាតពិតប្រាកដមែន។ ដូចនេះ ភ្នែកគឺពិតជាសំខាន់ណាស់។ តែមានមនុស្សមួយចំនួនធំ មិនបានដឹងទេថា អ្វីដែលពួកគេធ្វើរាល់ថ្ងៃ កំពុងតែធ្វើឱ្យសុខភាពភ្នែកចុះខ្សោយ។ ថ្ងៃនេះ អ្នកនឹងបានស្គាល់ទម្លាប់៣យ៉ាង ដែលធ្វើឱ្យភ្នែកអ្នកមានសុខភាពមិនល្អ។

១. អង្គុយមុខអេក្រង់កុំព្យូទ័រយូរពេក

ការសម្លឹងមើលកញ្ចក់កុំព្យូទ័រយូរពេក គឺអាចបណ្ដាលឱ្យកើតជំងឺភ្នែកម្យ៉ាងហៅថា Computer Vision Syndrome ឬ ហៅកាត់ថា CVS។ ស្ថានភាពនៃជំងឺនេះ គឺច្រើនតែកើតលើអ្នកដែលធ្វើការនៅមុខកុំព្យូទ័ររាល់ថ្ងៃ។ ការសម្លឹងមើលកុំព្យូទ័រយូរពេក នឹងធ្វើឱ្យភ្នែកស្ងួត ហើយអស់កម្លាំង។ ដូច្នេះដើម្បីជៀសវាងកើតមានបញ្ហាភ្នែកណាមួយ ឬ ជំងឺ CVS  អ្នកគួរសម្រាកភ្នែកពីកញ្ចក់កុំព្យូទ័រខ្លះ ដើម្បីឱ្យភ្នែក ក៏ដូចជាសាច់ដុំជុំវិញភ្នែកបានសម្រាក។

២. ការតុបតែងមុខ

ការប្រើប្រាស់ផលិតផលតុបតែងមុខច្រើនពេក គឺអាចបង្កគ្រោះថ្នាក់ដល់សុខភាពភ្នែករបស់អ្នកបាន។ ភ្នែក គឺងាយនឹងទទួលរងគ្រោះខ្លាំងណាស់ ហើយការលាបអ្វីមួយនៅក្បែរភ្នែកបង្កហានិភ័យខ្ពស់ណាស់។ ការប្រើប្រាស់ផលិតផលតុបតែងភ្នែក ដូចជាម៉ាស្ការ៉ា អាចបង្កឱ្យកើតមានរោគឆ្លងក្នុងភ្នែក ដោយការស្ទះក្រពេញប្រេង ឬការរីករាលដាលនៃពពួកបាក់តេរីឆ្លងទៅកាន់ភ្នែក។

៣. ការញីភ្នែក

ការញីភ្នែកញឹកញាប់អាចបណ្ដាលឱ្យកែវភ្នែកទទួលរងការខូចខាត ហើយថែមទាំងអាចធ្វើឱ្យសសៃឈាមដែលនៅជុំវិញភ្នែកបែកផងដែរ។ ប្រសិនបើអ្នកមានអារម្មណ៍រមាស់ក្នុងភ្នែក ចូរជៀសវាងការញី ហើយជំនួសវិញដោយការប្រើប្រាស់ទឹកថ្នាំបន្តក់ភ្នែក។ ជាពិសេសបើមានធូលីចូលភ្នែក សូមកុំញីឱ្យសោះ ព្រោះវាមិនត្រឹមតែមិនជួយអ្វីបាននោះទេ តែវាធ្វើឱ្យធូលីនោះកូតជាមួយនឹងភ្នែកថែមទៀតផង៕